Jenesis 4:4-16

⁴Aabelnoŋ kaaŋagadeeŋ lama tuuŋanoŋa mutu kolokolooya moŋ meŋ kaŋ qeŋ kitia kelegawonoŋ Pombaa siimoloŋ ooro. Ooro Poŋnoŋ Aabel aŋa ano iwaanoŋ siimoloŋ iima moro naaŋawo kolooro.

⁵‘Naaŋawo kolooroto, Poŋnoŋ Kein ano iwaanoŋ siimoloŋ ii iima togoro. Kaeŋ kolooro Keimbaa iriŋa soono uuta katitigoro jaasewaŋanoŋ bosoleero.

⁶Bosoleero Poŋnoŋ Kein kokaeŋ ijoro. “Iriŋga mono naambaajoŋ soono jaasewaŋganoŋ bosoleeja?

⁷Gii iwoi awaa ana meŋ aŋaliŋ gombe saanoŋ jaasewaŋga hak otaambaga me qaago? Iwoi awaa mende ana siŋgisoŋgowaa Toyanoŋ mono uugaa naguyanoŋ nama koumambaajoŋ awelegoŋ embomakeja. Kaeŋ embomakejato, gii mono iikawaa soŋgo ama galeŋ meŋ haamo amba.”

⁸Poŋnoŋ Kein kaeŋ ijoroto, Keinoŋ kileŋ koga Aabel kokaeŋ ijoro: “Mono kana anorodeeŋ gawonoŋ kembo.” Kaeŋ ijoro gawonoŋ kema Keinoŋ luguŋ koga Aabel qelanjiŋ meŋ qero komuro.

⁹Komuro Poŋnoŋ Kein kokaeŋ qisiŋ muro: “Koga Aabel ii dakanoŋ laligoja?” Qisiŋ muro kokaeŋ meleeno: “Nii mende mojeŋ. Nii konaa galeŋa qaago.”

¹⁰Kaeŋ meleeno Poŋnoŋ ijoro: “Gii naa iwoiga anjaŋa? Moba, kogaa sayanoŋ mono namonoŋga asugiŋ qaro mojeŋ.

¹¹Namo kokawaa qaa oota aantama kogaa saya boroganoŋga meji, niinoŋ mono kokanoŋa konjoma gombe kemba. Joramoraa aŋgonjora ii mono goo qaganoŋ ambe uja.

¹²Konjoma gombe komakoomo gawoŋ mena namonoŋ moriaŋaa hoŋa aŋgoŋ koma gono baloŋ so momolagoŋ keqeleŋ ama oloŋ koma laŋ kema kaŋ laligowa.”

¹³Kaeŋ jero Keinoŋ Poŋ kokaeŋ ijoro, “Qaanaa iroŋa meleena qananoŋ uji, iikanoŋ mono esuŋna uuguŋ bimooro bosimambaajoŋ amamaamaŋa.

¹⁴Moba, gii kete nii gawoŋqeqe balonoŋa notaana jaasewaŋganoŋa momolagoŋ baloŋ so keqeleŋ ama oloŋ koma laŋ kema kaŋ laligomaŋa. Kawaajoŋ moŋnoŋ nii niima afaaŋgoŋ nuro komumambo.”

¹⁵Kaeŋ ijoroto, Poŋnoŋ kokaeŋ jero moro: “Kaeŋ qaago! Moŋnoŋ Kein qero komuwaati eeŋ, iikawaa iroŋa mono iwaa qaganoŋ uro ambeŋa 7 koloowaa.” Kaeŋ jeŋ moŋnoŋ Kein mokolooŋ qero komuwabotiwaajoŋ selianoŋ aiwese tere moŋ ano.

¹⁶Kaeŋ ano Pombaa jaasewaŋa mesaoŋ kema kema baloŋ qata Lansaŋ ewaewaŋ (Nood) kanoŋ keuma laligoro. Baloŋ ii Eeden weeŋ koukoutanoŋ baageŋ eja. Kiaŋ.