Genesi 4:4-16

⁴Maʌ̃ne Abelba oveja zaquerã dji naãrã toped̶ad̶ada beaped̶a dji dragada Ãcõrẽa diasia. Ãcõrẽba Abelera idjia diad̶a sid̶a bia unusia.

⁵Baribʌrʌ Caiʌ̃da idjia diad̶a sid̶a bia unuẽ́ basía. Maʌ̃ carea Caiʌ̃ra bio quĩrũsia. Ab̶ed̶a quĩrã cadjirua nũmesia.

⁶Maʌ̃ carea Ãcõrẽba Caiʌ̃a jarasia: –¿Cãrẽ cãrẽã quĩrũ nũmʌ? ¿Cãrẽ cãrẽã quĩrã cadjirua nũmʌ?

⁷Bʌa biada oibʌrʌ ¿bʌra b̶ʌsrid̶a b̶aẽ́ca? Baribʌrʌ bʌa biada oẽ́bʌrʌ cadjirua jʌwaed̶a b̶aya. Baribʌrʌ bʌa cadjiruara poyaida b̶ʌa.–

⁸Ewari ab̶a Caiʌ̃ba idji djabaa jarasia: “Ãyã pʌrrʌad̶e wãna.” Ara maʌ̃da wãsid̶aa. Néud̶e ãbaa nĩnane Caiʌ̃ba Abelera adua b̶ʌd̶e beatasia.

⁹Maʌ̃ bẽrã Ãcõrẽba Caiʌ̃a iwid̶isia: –¿Sãma b̶ʌ bʌ djaba Abelera?– Maʌ̃ne Caiʌ̃ba panusia: –Cawaẽ́a. Mãwãra ¿mʌ̃ra idji acʌbarica?–

¹⁰Ãcõrẽba jarasia: –¿Cãrẽ cãrẽã bʌ djabara jãwã beasi? Idji oa egorod̶e erozoad̶aba jĩgua jara b̶ʌa mʌ̃a jipa cawa omãrẽã.

¹¹Bʌ djabada bead̶a bẽrã mʌ̃a bʌra biẽ́ b̶ʌya. Mʌ̃a bʌra idji oa erozoad̶amaʌba ãyã jʌretaya.

¹²Bʌa ẽjũã obʌrʌmĩna bʌ néura bia zauca baya. Bʌra naʌ̃ ẽjũãne ara jãwã pʌrrʌa nĩbaya. Ʌ̃nãũi sid̶a neẽ́ b̶aya.–

¹³Caiʌ̃ba Ãcõrẽa jarasia: –Mʌ̃ mãwã b̶aira jũmawãyã zarea b̶ʌa. Maʌ̃ra mʌ̃a droaẽ́a.

¹⁴Id̶i bʌa mʌ̃ra naʌ̃ druad̶ebemada ãyã jʌretabʌrʌa. Bʌ quĩrãpita mʌ̃ra wãcara b̶aya. Id̶iba ʌ̃taa mʌ̃ra naʌ̃ ẽjũãne pʌrrʌa nĩbaya drua ãĩbema quĩrãca. Bariduaba mʌ̃ra ununibʌrʌ, bead̶ia.–

¹⁵Ãcõrẽba jarasia: –Bariduaba bʌda beaibʌrʌ, mʌ̃a idjira bʌ cãyãbara aud̶uara cawa oya.– Maʌ̃ bẽrã Ãcõrẽba Caiʌ̃ cacuad̶e sẽyãda b̶ʌsia, bariduaba maʌ̃ sẽyãda unusid̶ara Caiʌ̃ra bearãnamãrẽã.

¹⁶Ara maʌ̃da Caiʌ̃ra Ãcõrẽ quĩrãpitabemada ãyã wãped̶a Nod druad̶e b̶ad̶e wãsia. Maʌ̃ Nod druara Edeʌ̃neba ʌ̃mãdau odjabariare b̶ʌa.