Fufua 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Eme Anutuzi Jakobo ʒiŋuc âzâcnewec: “Ajoc, go ʒawierâ Bete haeo ferâ ira ŋec juc ezemec. Ehuc hahacge Esaure hâwicgume wisehaŋtec Anutuzi fua‐garewec, e hâcne ira alata moc bacnezemec.”

²Iŋuc mume Jakobozi wiacfâcne â ŋic ehec jumbiŋ jaŋe ʒiŋuc jaza‐fârewec: “Ŋondeŋ‐ŋeŋicko nemuɋâŋ forakac i behepie raha sahac‐ŋeŋic emasaŋkehuc ŋaqi wiac‐ŋeŋic ɋaɋacne hepie huzejec.

³Eme faharerâ Bete haeo fenʒepeneŋ, no fific guguriŋ faio juhape mana‐narehuc hatao ŋezicnuwec, Anutu e hâcne ira alata moc bacnezepac.”

⁴Iŋuc jazame nemuɋâŋ bajumbiŋ i mecne â hazec warawa wiac‐jeŋic i mâmâc Jakobo râcnepie, Sikem hae qaŋeŋnao boriŋjâc domawec irec fuŋnao duckewec.

⁵Eme faharerâ rambiŋ. Ehame hae rârec rârec ŋerawec irec rune jaŋe ine Anuture hâwic‐jopame Jakobo â ŋokâfâcne wemocko jopa jâpec ejarenʒapiŋ.

⁶Eme Jakobo â ŋicfâcne ehec jumbiŋ jaŋe Kanaaŋ mâreŋko Lusi haeo, Bete hâcne, ira fisi‐fârembiŋ.

⁷Ehuc Jakobo e ira alata moc barâ ʒâŋene El‐Bete muwec. E hahac‐ticnere hâwickeme wiserâ raha Anutuzi ira hâcne fuacnewecte iŋuc ewec.

⁸Eme Rebeka jauŋ ŋokac‐ticne ʒâŋene Debora, e ira hâmome Bete hae juwicnao boriŋjâc fuŋnao duckembiŋ. Boriŋjâc ʒâŋene “Ki mamakuc boriŋ” muwec.

⁹Eme Jakobo e Mesopotamia mâreŋkonec warerâ juhame Anutuzi mocwâc fuacnerâ jambuŋkewec.

¹⁰Ehuc ʒiŋuc âzâcnewec: “Go ʒâŋege Jakobo, ʒi ine Jakobo mocwâc mi muhuc Israe muzo.” Iŋuc murâ Israe muwec.

¹¹Erâ Anutuzi ʒuhuckerâ âzâcnewec: “No Anutu tâpiri rune, go fua sawec ehuc sawe mâririackezemec, ehame goraonec ŋicguru mocjaha sawa mâcne, ŋic gurune gurune fua ranʒepieŋ, erâ ŋicwofuŋ jaŋe gore bifuŋkonec fuanʒepieŋ wâc.

¹²Eme Abraham â Isaka mâreŋ jactepo i go garehuc ɋâricfâcge jaŋe mâmâc jarezepac.”

¹³Eme Anutu e Jakobohec dâŋ muc manac epic irecnec fahare fewec.

¹⁴Ehame Jakobo e Anutuzi dâŋ âzâcnewec mâreŋ ira qânâma moc âkendâŋnewec, erâ fainao taha bâzi râerâ wokemaŋ ruacnewec.

¹⁵Ehuc Anutuzi dâŋ âzâcnewec mâreŋ irec ʒâŋe Bete muwec.

¹⁶Eme jaŋe Bete beherâ rahuc juku Efarata hae bâqiŋkehuc Rahezi ʒâic sâko manahuc motec rowec.

¹⁷Motec roocte ŋemâckeme gozi bapa‐ticnezi ʒiŋuc muhuc âzâcnewec: “Go mi hâwicguoc, ŋokâ jaha rocmu.”

¹⁸Eme motec rorâ hâmozo ehuc ʒâŋene Ben‐oni muwec, Mamacnezi ine ʒâŋene Benjamiŋ muwec.

¹⁹Eme Rahezi hâmome Efarata hatao, Betelehem hatao hâcne, duckembiŋ.

²⁰Eme Jakobo e ʒâŋeruŋ‐ticnao qânâma moc âkendâŋnewec. Qânâ izi Rahe ʒâŋeruŋ‐ticnere ma ŋeweczi ŋekac.

²¹Eme Israe e hata mocwâc ʒuhuckerâ raku Migida‐Ede ficʒora ocniŋucnao fisirâ qoruc boze‐ticne fârewec.

²²Erâ mâreŋ ira ŋec juc ehame Rubeŋzi mamac‐ticnere ŋonâŋoc Biliharao rame ehec fopic. Eme Israezi biŋe manarâ aarickewec.

²³Jakobo ŋokâfâcne 12 jumbiŋ. Leare ŋokâfâc ʒiŋuc: Rubeŋ, e Jakobo mârâc ŋokâ‐ticne, erâ Simeoŋ, Lewi, Juda, Isasa â Sebuloŋ.

²⁴Rahe ere ŋokâ jahec ʒiŋuc: Josefe â Benjamiŋ.

²⁵Biliha, Rahe kiŋaŋ naru‐ticnere ŋokâ ʒiŋuc: Daŋ â Naftali.

²⁶Silipa, Leare kiŋaŋ naru ere ŋokâ ine Gade â Ase. Jakobo ŋokâfâcne iŋuc hâcne Mesopotamia mâreŋko fuambiŋ.

²⁷Eme Jakobo e mamac‐ticne Isaka Mamere haeo Kiriati‐Araba, Heboroŋ hâcne, juwecko ra fisiwec. Hae mâreŋ ira hâcne Abraham â Isaka jahe jupic.

²⁸Isaka e jara‐ticne 180 bazuwec.

²⁹E jujâmbâŋkeku ŋicqizec erâ hâmohuc mimiŋnefâc‐ticne jaŋerao ʒuhuckewec. Eme ŋokâ jahec‐ticne Esau â Jakobo jahe duckepic.