1Eme Wofuŋzi Abram âzâcnewec: “Go mâreŋ qizecge â mame sâkofâcge â fic haege behe‐fârerâ noni mâreŋ moc gowatupemu ira ra juzemec.
2Eme no jambuŋgupe ɋâricfâcge fua sawec epie gore ʒâŋe biŋezi haŋ bazejec. Eme go jambuŋte qizec ezemec.
3Go jambuŋguniŋmu i noni wâc jambuŋ‐jopapemu, â go sâwecguniŋmu i noni iŋuc jaha sâwec‐jopapemu. Â goraonec jambuŋzi ŋeratierâ mâreŋŋic sâcjopa‐fârezejec!”
4Eme Abram e Wofuŋte mic reŋkehuc hata fuŋkerâ raha Loti e bâjâpeme mâmâc rapic. Abram e jara 75 bazuhuc Haraŋ mâreŋ behewec.
5E ŋonâŋ‐ticne Sarai â hahac‐ticnere ŋokâ Loti erâ kiŋaŋ qaqafâc‐ticne â mafa wiac‐ticne rocjopame Kanaaŋ mâreŋkopec raku mâreŋ ira fisimbiŋ.
6Fisirâ fotâcne raku Sikem hae bâfuambiŋ, ira qâpuc jaŋere boriŋjâc bâtirikicne domawec.
7Dameŋ ira Kanaaŋ ŋic jaŋe hae mâreŋ irec rune jumbiŋ. Eme Wofuŋzi Abram fuacnerâ muwec: “Ɋâricfâcge jaŋe mâreŋ ʒi hâcne jarezokopac.” Eme Abram e Wofuŋzi fuacnerâ dâŋ âzâcnewecte ira alata moc bawec.
8Eme mocwâc tiki mâreŋkopec feraku Bete hae ʒoaŋ wewefunao fisirâ ira qoruc boze‐jeŋic fârembiŋ. Bete hae ʒoaŋ huhunaopec ŋewec â Ai hae ine ʒoaŋ wewefunaopec ŋewec. Eme Abram e ira Wofuŋ alata moc bacnehuc numu wâwâsic ecnewec.
9Erâ mocwâc faharerâ Negebe mâreŋkopec rawec.
10Eme mâreŋ ira roroc fuame Abramzi Aigita mâreŋko jaba juocte ira rawec, roroc ŋemâc bâmâcne fowec irec.
11Eme Aigita mâreŋ bâqiŋkezo ehuc ŋonâŋ‐ticne Sarai ʒiŋuc âzâcnewec: “Manakic, go ŋokac sahac hawarige biaŋne i kâuc mi bakopac.
12Aigita ŋic jaŋe honecguhuc ʒiŋuc muniŋmu: O, e ŋonâŋ‐ticne hâcne. Iŋuc murâ no nuniŋmu â go ine akicguniŋmu.
13Irec go ʒiŋuc muzemec: No seŋticne. Iŋuc mutecne no gore erâ akicnupie sâcne jupemu.”
14Eme Abram e Aigita mâreŋko ra fisime Aigita ŋic jaŋe ŋokac e sahac hawari‐ticne biaŋne jume honembiŋ.
15Eme Farao fekicnefâc‐ticne jaŋe ŋokac honerâ ra Faraore maio mumbiaŋkembiŋ. Erâ ŋokac e rorâ Faraore ficko jowa fembiŋ.
16Eme Farao e Saraire erâ Abram jauŋ biaŋne bacnehuc lama, bulimakao, doŋgi, kiŋaŋ motec â kiŋaŋ naru erâ kamele bocjaha tahackewec.
17Eme Wofuŋzi Farao â wiacfâcne jaŋe Abram ŋonâŋ‐ticne Saraire erâ ʒâic guru fekicne bâfua‐jarewec.
18Iŋuc fuame Faraozi Abram hefârerâ ʒiŋuc muhuc wiocnewec: “Keci wemo mâsi mo enaremeŋ?
19E ŋonâŋ‐nane, go iŋuc wemocte mi nazameŋ? E seŋnane, iŋuc wemocte mutec nore ŋonâŋ erâ juocte ficnaneo râepo? Ajoc, ʒi ŋonâŋge mocwâc jowarâ wisec!”
20Eme Faraozi momori ejareme Abram ŋonâŋ‐ticne â mafa wiac‐ticne qâzuc‐joparâ mâreŋ‐ticnaonec jowac‐jopa rambiŋ.
