1Eme Jakobo e, Aigita mâreŋko nânâ sâcne furine bazo, iŋuc manarâ ŋokâfâcne ʒiŋuc jazawec: “Ŋoŋe wemocte mana qâoma ehuc juŋgopieŋ?
2Aigita mâreŋko nânâ wiac sâcne furine bazo, no iŋuc mupie manakopac i! Irec ŋoŋe ira ra furine barâ bawareniŋ, nâŋâc nânâre hâmo sipiric enʒipeŋte.”
3Eme Josefe hahacfâcne 10 jaŋe nânâ furine baniŋte Aigita mâreŋko rambiŋ.
4Josefere ɋa, Benjamiŋ hâcne, e ine mamacnezi hahacfâcne jaŋehec mi raocte ʒiŋuc manasuhuc sakarewec: E raku hatao ʒâpâ faio fezackohec.
5Eme Kanaaŋ ŋic gâcne rambiŋ jaŋere ŋondeŋko Israe ŋokâfâcne jaŋe mâmâc nânâ furine baniŋte raku fisimbiŋ. Kanaaŋ mâreŋko iŋuc jaha roroc sâko fowec hâcne.
6Josefe e Aigita mâreŋte ŋicbomboŋ juhuc mâreŋ sâc irec ŋic sasawa nânâ jareme furine bambiŋ. Ehame hahacfâcne jaŋe erao fisirâ fodapecnembiŋ.
7Eme Josefe e hahacfâcne honec‐joparâ ʒâŋitac‐jopawec, ehuc fuŋne‐ticne hesoŋke‐jarerâ dâŋ fâfâcnehec ehuc ʒiŋuc wio‐jarewec: “Ŋoŋe wenirec wareŋgopieŋ?” Jaŋe mumbiŋ: “Kanaaŋ mâreŋkonec, nânâ furine banaŋte wareŋgopeneŋ.”
8Josefe e hahacfâcne ʒâŋitac‐jopahame jaŋe ine e mi ʒâŋitambiŋ.
9Eme Josefe e mârâc jaha jaŋere guŋ manawec irec manasuwec. Ehuc ʒiŋuc jazawec: “Ŋoŋe doc bapa ŋic, ŋoŋe mâreŋ‐nâŋec moc wena soŋaŋ tâmiric kosa fokacko hone tâcnezo wareŋgopieŋ.”
10Jaŋe mumbiŋ: “Bomboŋ, iŋuc mâcne! Kiŋaŋ qaqafâcge nâŋe nânâ furine banaŋte warembeneŋ.
11Nâŋe ŋic mocjahare ŋokâfâc sasawa, nâŋe ŋic sioc tâmiric, kiŋaŋ qaqafâcge nâŋe doc bapa ŋic aricne.”
12Eki ine jazawec: “Aricne, ŋoŋe mâreŋ ʒi moc wena soŋaŋ tâmiric kosa fokacko hone tâcneniŋte warembieŋ hâcne.”
13Mume jaŋe ʒiŋuc mumbiŋ: “Kiŋaŋ qaqafâcge nâŋe 12‐zi jumbeŋ. Nâŋe hahac ɋa, ŋic mocjahare ŋokâfâc, Kanaaŋ mâreŋkonec. Ɋaʒâc‐nâŋec mamac‐nâŋehec jukac â ɋanâŋec moc ine mârâc jaha sifuckewec.”
14Eme Josefezi jazawec: “No mupac i, ŋoŋe doc bapa ŋic.
15Irec dâŋŋeŋicte fuŋne taniŋkezejec. No Faraore ʒâŋeo mupaŋkekopac: Ɋaʒâc‐ŋeŋic mi ware fisiocmuo ine ŋoŋe mâreŋ ʒirecnec mocwâc mi risie raniŋmu.
16Irec ŋoŋeraonec moc râepie rarâ ɋaʒâc‐ŋeŋic jowa warezejec, â gâcne ŋoŋe ine kâpâcwâru ficko ŋeniŋmu. No dâŋŋeŋicte fuŋne bataniŋkezepac, eme dâŋ muŋgopieŋ i honepe burec eme doc bapa ŋic mucŋopapemu, i Faraore maio mupaŋkekopac.”
17Iŋuc murâ kâpâcwâru ficko râec‐jopa‐fâreme ʒoaŋ jahec â moc ira fombiŋ.
18Eme ʒoaŋ jahec â moc eha Josefezi ʒiŋuc jazawec: “No Anutu araŋ bacneekopac. Irec no akic‐ŋopapemurâ muŋgopieŋko kecʒiŋuc enʒepieŋ:
19Ŋoŋe ŋic eeatuc tâmiric juŋgopieŋko ŋoŋeraonec mocsâkoa ʒira kâpâcwâru ficko râepie ŋeha gâcne ŋoŋe ine wiacfâc‐ŋeŋic jaŋe nânâre hâmo sipiric enʒipiŋte padi jacgoŋ barâ ranʒepieŋ.
20Erâ ɋaʒâc‐ŋeŋic norao jowa warepie, dâŋ jâmbomac muŋgopieŋ, iŋuc manarâ akic‐ŋopape juniŋmu.” Eme jaŋe mume sâc embiŋ.
21Ehuc jaŋaczia nazaŋ gazaŋ erâ ʒiŋuc mumbiŋ: “Jambomac, wiac ʒi ɋanâŋec behembeŋ irec okacne fisi‐nârekac hâcne. E nokafe tataeŋ ehuc mu wâwâsic enâreme dâŋticne mana‐bipierâ behembeŋ. Eme irec hâcne wiac hâhâwicne ʒi fai‐nâŋecko fekac.”
22Eme Rubeŋzi ʒiŋuc jazawec: “No ŋazapo i! Ŋoŋe motec mac e wiac sâqocne mi ecnenʒepieŋ, ŋoŋe ine dâŋnane mana takirembiŋ irec ʒi fuŋne honeŋgopieŋ: Socticnere kiŋte okacne fisi‐nârekac.”
23Jaŋe ine Josefezi dâŋnâŋec manakac i mi manambiŋ, e jaŋehec dâŋ dâŋ eocte dâŋ bâbâtikie ŋic ecneme dâŋ mu bâtikic ehuc juwec hâcne.
24Erâ Josefe e behec‐joparâ ra kiowec. Izi ʒâhec jaŋerao risierâ jaŋehec dâŋ dâŋ ewec. Ehuc mume ŋondeŋ‐jeŋickonec Simeoŋ rorâ mai‐jeŋickoa bândeŋnembiŋ.
25Erâ mume târu‐jeŋicko padi â jacgoŋ ŋiepie hurâ fusucmame moneŋ‐jeŋic ru sâc târu‐jeŋicko ŋiembiŋ. Erâ hatare nâsiŋ jareniŋte mâmâc jazawec. Eme iŋuc ejarembiŋ.
26Eme jaŋe nânâ wiac‐jeŋic doŋgifâc‐jeŋic jaŋere faio herâ rambiŋ.
27Raku tomafic mocko fisirâ jaŋeraonec moczi doŋgi‐ticne nânâ gumeocte târu‐ticne firuerâ honewec: Moneŋ‐ticne nânâ fainao ŋiekicne fowec.
28Iŋuc honerâ hahac ɋafâcne ʒiŋuc jazawec: “Moneŋ‐nane bârisie‐narekicne, ʒi târu‐nane micnao fokac hâcne.” Eme jaŋe manarâ maŋjeŋic gâckeme fâfârerâ hohonec ehuc mumbiŋ: “Anutuzi weniŋuc enârekac?”
29Eme jaŋe Kanaaŋ mâreŋko, mamac‐jeŋic Jakoborao fisirâ wiac fua‐jarewec irec dâŋ binaŋ ninic sininic ecnehuc mumbiŋ:
30“Mâreŋ rambeŋ irec ŋicbomboŋ e dâŋ hâhâwicne enârehuc, ‘ŋoŋe docbapa’ iŋuc muhuc kâpâcwâru ficko râec‐nâpowec.
31Iŋuc enâreme ʒiŋuc âzâcnembeŋ: ‘Nâŋe ŋic wamane, nâŋe docbapa aricne.
32Nâŋe hahac ɋa 12 mamac‐nâŋecte ŋokâfâc, mocjahazi mârâc jaha sifuckewec â ɋaʒâc‐nâŋec e ine Kanaaŋ mâreŋko mamac‐nâŋechec jukac.’
33Iŋuc mupene mâreŋ irec ŋicbomboŋ e ʒiŋuc nâzâwec: ‘Ŋoŋe ŋic wamane me mâcne, irec fuŋne ʒiŋuc ehuc bataniŋkepie honezepac: Ŋoŋeraonec mocsâkoazi ʒira juha gâcne ŋoŋe wiacfâc‐ŋeŋic jaŋe nânâre hâmo sipiric enʒipiŋte padi wiac rorâ baraniŋ.
34Juku ine ɋaʒâc‐ŋeŋic jowa warenʒepieŋ, eme ŋoŋe docbapa mâcne, ŋic wamane jueŋgopieŋ, irec fuŋne hone tarazepac. Iŋuc epie hahac‐ŋeŋic bârisie‐ŋarepe ŋoŋe mâreŋ ʒira rambaŋ juhuc rac warec ezo murâ enʒepieŋ.’”
35Eme jaŋe ru sâc târu‐jeŋickonec padi hoŋkehapie mi moneŋ kânoŋ‐jeŋic moneŋhec wahame bâfuanʒepieŋ i! Eme motec jaŋe mecne, mamac‐jeŋic mecne, moneŋ kânoŋ moneŋhec honerâ hâwic‐jopawec.
36Eme mamac‐jeŋic Jakobozi ʒiŋuc jazawec: “Ŋoŋe ŋokâfâc‐nane nowac rofâreniŋmu, Josefezi sifuckewec, Simeoŋzi mocwâc mi junarekac, ehame Benjamiŋ e wâc iŋuc jaha jowa razo muŋgopieŋ. Busâqoc wiac i sasawa fai‐naneo fekac.”
37Iŋuc mume Rubeŋzi âzâcnewec: “No Benjamiŋ mocwâc mi bârisie‐garepemuo ine okacne ŋokâ jahec‐nane sâcne qâhâmoc‐jofazemec. Irec sifu e nore meo râec, eme no sâcne bârisie‐garepemu.”
38Eki ine muwec: “Ŋokâ‐nane e ŋoŋehec mi rajâmbâŋkeocmu, hahac‐ticnezi hamowecte e buc mac junarekac. Ŋoŋe hata raniŋmu ira wiac hâhâwicne moc fuacneme no jaŋɋâŋheczi busâqocko hâmope kiŋnane ŋoŋere faio feocmu.”
