Fufua 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Iŋuc hâcne ehuc sambâŋ â mâreŋ jahe kikefuŋ guru sâkofâc‐jekic jaŋehec bâfuac‐jopa‐fârekicne.

²Eme ʒoaŋ 7 ira Anutuzi gie‐ticne batara‐fârehuc gie wiac bawec irec ŋemanaocte hombaŋ ŋewec.

³Iŋuc ehuc Anutuzi ʒoaŋ 7 hâcne jambuŋkehuc bâtiriwec, i wiac mocte mâcne, wiac sasawa bâfua tararâ ŋemanaocte hombaŋ ŋewec.

⁴Kecʒi sambâŋ â mâreŋ kikefuŋfâc‐jekic jaŋehec bâfuac‐jopa wefukicne irec binaŋ. Wofuŋ Anutuzi sambâŋ â mâreŋ bâfuac‐jofawec dameŋ ira jâc me monʒaŋ wiac fuŋne fuŋne mâreŋko mi fua rawec,

⁵i Wofuŋ Anuture micte hoezi moc mi hewecte, â gie hesarac ee ŋic mi bâfuac‐jopakicnere iŋuc hâcne fowec.

⁶Dameŋ ira mâreŋ maŋnaonec rombâŋ sâkozi wefu fehuc waha mâreŋ bâgunuckewec.

⁷Eme Wofuŋ Anutu e mâreŋzi ŋic moc basarickehuc sâkenao juju mâro ficneme hume ŋic e nokafe herâ ɋârewec.

⁸Eme Wofuŋ Anutuzi ʒoaŋ wewefunaopec Edeŋko jufu gie moc sararâ ŋic bâfuawec e ira râewec.

⁹Eme Wofuŋ Anutuzi mâreŋ ecneme e jâc hone aŋacnehec â fâri nânânehec biaŋne fuŋne fuŋne âke sueme wefuwec, jufu ʒâʒâŋiŋnao ine jujujâc â fuŋne mamana jâc jahe wefupic.

¹⁰Opâ kâcɋene moc e ine Edeŋ jufu gieonec wefurâ bâbâgunuc gie baku gieonec waha fâuckeme sohocne 4 ewec.

¹¹Moc ʒâŋene Pisoŋ, izi Hawila mâreŋ orâŋke‐fârekac. Ira gol fokac.

¹²Mâreŋ irec gol i furi sâko. Ira wâc Bedolac sâfâ â Soham qânâ fokopirec.

¹³Opâ ombâŋne moc ʒâŋene Gihoŋ. Eki Kusu mâreŋ orâŋke‐fârekac.

¹⁴Â ombâŋne moc ʒâŋene Tigirisi, eki Asiria mâreŋ ʒoaŋ wewefu‐ticnao hurakac. Â ombâŋne moc ʒâŋe‐ticne Eufrata.

¹⁵Eme Wofuŋ Anutuzi ŋic rorâ Edeŋ jufu gie ira hone soŋaŋ ehuc giene baocte râewec.

¹⁶Râerâ ŋic ʒiŋuc mupaŋkecnewec: “Jufu gieo jâc fârihec doma raŋgopieŋ i sâcne ro nâc efârecmu.

¹⁷Fuŋne mamana jâc mocjaha ere fârine moc mi nâjâmbâŋkezemec! Sifu nâcmuo ine hâmo‐jâmbâŋkecmu.”

¹⁸Eme Wofuŋ Anutuzi muwec: “Ŋic e buc jume mi biaŋkekac. Irec no ere sâc jaha âgo babafic‐ticne moc bâfuazepac!”

¹⁹Wofuŋ Anutu e hae qowi â kâte qowi sasawa â sawa wipe sasawa mâreŋzi bacjoparâ ŋiczi ʒâŋe‐jeŋic weniŋuc muocmu i hone manac eocte ŋictao amec‐jopa fisiwec. Eme ŋiczi ʒâŋe‐jeŋic mufuahuc muocmu i foocte muwec.

²⁰Eme ŋic e hae qoqi â kâte qowi â sawa wipe sasawa jaŋere ʒâŋe mufârewec. E jahacne sâc âgo babafic‐ticne moc ine mi bâfuawec.

²¹Irec Wofuŋ Anutuzi ŋic ecneme guŋsâko qâmâckeme fowec. Eme tambaraŋne moc unuckerâ fofotacne biuczi bâbâzickewec.

²²Erâ Wofuŋ Anutu e ŋicte tambaraŋ rowec izi ŋokac moc barâ ŋictao jowa rawec.

²³Jowa rame ŋiczi honerâ muwec: “Keʒi jâmbomac siec‐nane â biuc‐nane! E ŋickonec rokicnere ʒâŋene Ŋokac mucnezo.”

²⁴Irec hâcne ŋiczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu.

²⁵Ŋic ŋokac jahe mâmâc jaha biuctac juhuc mi mimiepic.