1Juku jara jajahec tarame Faraozi guŋ moc kecʒiŋuc manawec: E Nilu opâ mecnao domaha
2bulimakao 7 biaŋne biuc sâko jaŋe Nilu opâonec wefurâ kecɋaŋ nâhuc domambiŋ.
3Ehame bulimakao 7 jaha ʒuhuckerâ wefumbiŋ, jaŋe ine sâqocne â siec sawa, erâ bâbâni wefumbiŋ jaŋerao rambiŋ.
4Erâ bulimakao sâqocne â siec sawazi mi biaŋne biuc sâkohec jaŋe ɋâcjopanʒepieŋ i! Eme Farao e guŋkonec ɋârewec.
5Erâ mocwâc qâmâckeme fohuc guŋ mocwâc ʒiŋuc manawec: Padi wefurâ domawec, kikene mocsâkoa â fârine ine 7, biaŋne â kâcɋene.
6Ʒâhec ine padi kikene moc wefuwec, fârine 7 jaha erâ piticne â jowareczi qakume ɋaŋakicne.
7Eme fârine piticne jaŋe fârine biaŋne â kâcɋene ɋâcjopambiŋ. Eme Faraozi ɋârerâ ʒiŋuc mana tarawec: No guŋ fârine manapac.
8Hae fureme ine Faraozi manabâc ewec. Irec qaŋgec bapa â fuŋne mamana ŋic Aigita mâreŋko jumbiŋ jaŋe sasawa hetumaŋ‐jopaocte dâŋ râeme rawec. Fisipie guŋ manawec i binaŋ bajarewec. Eme jaŋeraonec moczi wemocko Farao guŋticnere fuŋne mana tarahuc âzâcnezac.
9Eme waiŋ soŋaŋ micnezi Farao ʒiŋuc âzâcnewec: “No miŋecgac bahac‐nane manasukopac.
10Farao go kiŋaŋŋicfâcge nâŋere aaric manahuc poroŋ ririke micne â no nâhe kâpâcwâru ficko râec‐nâfomeŋ
11dameŋ ira ŋafe mocko guŋ manapec. Erâ guŋ manapec i fuŋnehec.
12Eme dameŋ ira Hebiraio ŋicmotec moczi momori soŋaŋte kiŋaŋ qaqa juhuc nâhehec fowec. Eki hâcne guŋ manapec i âzâcnepere fuŋne nâsâwec, ehuc guŋ manapec sâc fuŋne buc buc mutaniŋke‐nâctewec.
13Eme fuŋne mutâcnewec irec sâcko jâmbâŋ fârine fuawec, no mocwâc gie‐naneo râecnukicne â poroŋ ririke micne e ine bituambiŋ.”
14Eme Faraozi Josefe wareocte mume izia kâpâcwâru fickonec jowa warembiŋ. Erâ qizec‐ticne bâtâcnepie ŋaqi ɋâricne heme hume Faraore maio fuawec.
15Fuame Faraozi ʒiŋuc âzâcnewec: “No guŋ manapac, eme irec fuŋne ŋic moczi moc mi mana tararâ nazakac. Gore ine ʒiŋuc mupie manapac: Go guŋ manarâ gazapie fuŋne mutaniŋkeekic.”
16Iŋuc âzâcneme Josefezi Farao dâŋ ʒiŋuc bâtikiecnewec: “No maŋnanere wemocko epemu, Anutuzi ine Farao go bubiaŋ dâŋ gazazo murâ gazaocmu.”
17Eme Faraozi Josefe ʒiŋuc âzâcnewec: “No Nilu opâ mecnao domapac.
18Ehame opâonec bulimakao 7 biaŋne â biuc sâko wefurâ kecɋaŋ nâhuc domambieŋ.
19Eme ʒâhec bulimakao 7 jaha, sâqocne â siec sawa iŋuc jaha wefumbieŋ. No bulimakao sâqocne iŋucne Aigita mâreŋko moc mi honec‐jopahuc jupo.
20Eme bulimakao sâqocne jaŋe bâbâni bulimakao 7 biaŋne â biuc sâko nâcjopambieŋ.
21Nâcjopa‐fârepie sifu bujeŋic mi sokajec. Qanaŋ sâqocne â siec sawa domambieŋ sâc ijaha ʒâhec domambieŋ. No guŋ iŋuc manarâ ɋârepac.
22Erâ guŋ mocwâc manapac ine kecʒiŋuc: Padi wefurâ domajec, kikene mocsâkoa â fârine ine 7 biaŋne â kâcɋene.
23Eme ʒâhec padi kikene moc wefujec fârine 7 jaha, erâ jowareczi qakume ɋaŋakicne.
24Eme fârine aputaczi fârine biaŋne ɋâcke‐fârejec. Eme irec mamana ŋic jazape fuŋne nazaniŋte eipieŋgopieŋ.”
25Eme Josefezi Farao ʒiŋuc âzâcnewec: “Farao, go guŋ jajahec manamec irec fuŋne mocjaha sawa fokac. Anutuzi mâsi moc baocte gazakac hâcne.
26Bulimakao biaŋne 7 izi jara 7 irec sâc ekac, erâ padi fârine biaŋne 7 izi jara 7 irec sâc jaha, irec guŋ jajaheczi mocjaha ekac.
27Bulimakao sâqocne 7 ʒâhec wefumbieŋ jaŋe jara 7 irec sâc jaha, erâ padi fârine aputac jowareczi qakicne izi roroc jara 7 irec sâc.
28No irec hâcne manasuhuc Farao go ʒiŋuc gazapac: Anutu e mâsi baocte mukac i go mufua‐garezo ekac.
29Manakic, ʒi Aigita mâreŋko jara 7 mâriri sâko fuarâ foocmu.
30Eme mâriri dameŋ tarame roroc sâko fuarâ fokuhame jara 7 jaha taraocmu. Dameŋ irec maŋnao mâririre nikec‐jopame nânâre hâmo sipiric efâreniŋmu.
31Mâririre kâuc baniŋmu i roroc qaŋqaŋ fuarâ fofeocmu irec.
32Farao go guŋ ijaha arec jajahec manamec irec fuŋne ine ʒiŋuc: Anutu e wiac i biac jâmbâŋ fuaocte mupaŋkewec fokac.
33Irec Farao go ŋic moc mamana â maŋɋârâŋhec bâwosâerâ Aigita mâreŋ sâko soŋaŋkeocte mucnezemec.
34Erâ go hae sâc kia râec‐jopa ratec jaŋe jara 7 mâriri maŋnao wiac fuaocmu sâc irec 5‐konec wâŋ rorâ râepie mâc fozejec.
35Jaŋe dameŋ irec maŋnao padi â jacgoŋ fuaocmu sâc ro qâzuc erâ gore micte râepie fozejec, jaŋe padi â jacgoŋ wiac hae sâkoo râepie rame soŋaŋkepie fozejec.
36Iŋuc epie jacgoŋ â padi izi roroc jara 7 irec biŋe fozejec. Eme Aigita mâreŋko roroc fuarâ foha ŋiczi nânâre hâmo sipiric mi enʒepieŋ.”
37Eme Farao â ŋicfâcne jaŋe dâŋ irec manapie biaŋkewec.
38Ehame Faraozi kiŋaŋŋicfâcne ʒiŋuc muhuc wio‐jarewec: “Nâŋâc ŋic kecʒi Anuture Mârohec jukac iŋucne moc sâcne bâfuanaŋmu me?”
39Erâ Josefe ʒiŋuc âzâcnewec: “Anutuzi dâŋ i sasawa mufua‐garewecte ŋic mamana â maŋɋârâŋhec go iŋucne moc mi jukac.
40Irec go hâcne ficnanere soŋaŋ râecguzo mukopac, eme ŋicfâc‐nane jaŋe gore dâŋ reŋke‐fârenʒepieŋ. Mocjaha, ŋicwofuŋ ŋeŋezi sawa nore biŋe ŋezejec.”
41Erâ Faraozi Josefe ʒuhuckerâ âzâcnewec: “Manakic, no ʒi hâcne Aigita mâreŋ sâko irec soŋaŋ râecgukopac.”
42Farao e iŋuc murâ meo fefe‐ticne, ŋicwofuŋ mahec, i heunuckerâ Josefere meo hecneme fewec, erâ ŋaqi biaŋne moc hecneme huwec â qoqonaŋ golzi bakicne qonaŋkecnewec.
43Erâ mume namba 2 keretac‐ticnao ferâ rahame ŋiczi bâniecnerâ ʒiŋuc wirahuc mumbiŋ: “Dieŋzi hecneniŋ!” Iŋuc ecnehuc Aigita mâreŋ sâko irec soŋaŋ âkendâŋnewec hâcne.
44Erâ Faraozi Josefe ʒiŋuc âzâcnewec: “No hâcne Farao, erâ sifu goki mi manahaŋtecne Aigita mâreŋ sâkoo ŋic jaŋe maŋjeŋicte iŋuc me iŋuc moc mi enʒepieŋ.”
45Eme Farao e Josefe ʒâŋe‐ticne Zafena‐Panea muwec, erâ Oŋ haeonec taha bapa moc, ʒâŋene Potifera, ere otâ Asinati râcneme ŋonâŋ‐ticne ewec. Iŋuc fuaha Josefe e Aigita mâreŋ irec soŋaŋ juwec.
46Josefe e jara‐ticne 30 bazurâ Aigita ŋicwofuŋ Farao ere maio fuarâ domawec. Erâ Farao beherâ keretacko Aigita mâreŋ sâko fotâcne‐fârewec.
47Jara 7 irec maŋnao mâreŋ ira mâriri sâko jâmbâŋ fuawec.
48Eme Josefe e jara 7 irec maŋnao padi â jacgoŋ guru fufusuc fuawec i ro qâzuc erâ hae sâkoo râeme rafârewec. Hae sâko sâc râreckehuc gie forawec irecnec padi â jacgoŋ rorâ haeo râe qâzuc ewec hâcne.
49Josefe e iŋuc ehuc padi â jacgoŋ i hâwecko moŋgeŋ fokac irec sâc fofo dunduŋ fome râe qâzuc ekume wowosere sâc jâurume mâc kosa rome fewec.
50Eme roroc mi fuahame Josefe ŋokâ jajahec fuacnepic, Oŋ haeonec taha bapa Potiferare otâ Asinatizi rocjofawec.
51Eme Josefe e mârâc ŋokâ‐ticnere ʒâŋe ʒiŋuc muhuc Manase muwec: “Anutuzi baficnume ʒâic busâqoc‐nanere â mamac‐nanere ficte nikecnuwec.”
52Ʒâhec ŋokâre ʒâŋe ine ʒiŋuc muhuc Eferaim muwec: “Anutuzi mâreŋ ʒira fific guguriŋ faio juhape manasu‐narerâ ɋâric bâfua‐narekac.”
53Eme Aigita mâreŋko jara 7 mâriri sâko fowec i tarame jara 7 jaha roroc dameŋ fuŋkerâ fuawec.
54Josefezi muwec irec sâc fuawec hâcne. Ehame mâreŋ sâc roroc fuarâ foha Aigita mâreŋ sâkoo nânâ mi basambiŋ.
55Eme Aigita mâreŋko roroc fuame ŋic jaŋe nânâre hâmohuc Farao kiocnembiŋ. Eme Faraozi Aigita ŋic ʒiŋuc jaza‐fârewec: “Ŋoŋe Joseferao raniŋ, eme eki mume sâc enʒepieŋ.”
56Roroczi ine mâreŋ sâcke‐fârerâ fowec. Iŋuc fuame Josefezi Aigita ŋic nânâ rowaŋ irec motâc rojareme nânâ furine bambiŋ. Ehame roroczi Aigita mâreŋko ɋârâŋkewec.
57Eme mâreŋ sâc irec ŋic jaŋe nânâ furine baniŋte Aigita mâreŋko fisimbiŋ, i mâreŋ sâc roroc ɋârâŋkerâ fowec irec.
