1Josefe e iŋuc murâ ra Farao biŋedâŋ ʒiŋuc muhuc âzâcnewec: “Mamac hahacfâc‐nane â bulimakaofâc‐jeŋic erâ wiac sasawa‐jeŋic jaŋe Kanaaŋ mâreŋkonec warembiŋ Goseŋ mâreŋko juŋgopieŋ.”
2Erâ hahacfâcne jaŋeraonec 5 rocjoparâ Faraore maio râec‐jopame domambiŋ.
3Eme Faraozi Josefe hahacfâcne ʒiŋuc wio‐jarewec: “Ŋoŋe wemo gie bahuc jueŋgopieŋ?” Iŋuc wio‐jareme ʒiŋuc âzâcnembiŋ: “Kiŋaŋŋicfâcge nâŋe mamacfâc‐nâŋec jaŋe iŋucne lama soŋaŋ jueŋgopeneŋ.”
4Erâ ʒuhuckerâ Farao ʒiŋuc âzâcnembiŋ: “Nâŋe mâreŋ ʒira jaba junaŋte warembeŋ. Kanaaŋ mâreŋko roroc qaŋqaŋ fuarâ fokacte kiŋaŋŋicfâcge nâŋere lamazi nânâ basambiŋ. Eme irec hâcne kiŋaŋŋicfâcge nâŋe Goseŋ mâreŋko juzo muŋgopeneŋ.”
5Eme Faraozi Josefe âzâcnewec: “Mamac hahacfâcge jaŋe gorao sâcne warembiŋ.
6Aigita mâreŋ i gore meo râekicne, irec mamac hahacfâcge mâreŋ dâkâne biaŋnao râec‐jopazemec, jaŋe Goseŋ mâreŋ hâcne mujaretec sâcne juniŋmu. Ehame go jaŋere ŋondeŋkonec ŋic ʒoɋachec moc manac‐jopakicko no nahacne qowi guru irec soŋaŋ juniŋte râec‐jopazemec.”
7Eme irec faicnao Josefezi mamac‐ticne Farao jâutuocte erao jowa fewec; eme Jakobozi Farao jambuŋkewec.
8Eme Faraozi Jakobo wiocnewec: “Go jarage wezimuc?”
9Jakobozi Farao dâŋ ʒiŋuc bâtikiecnewec: “Mâreŋko jaba juju‐nanere dameŋ jara 130 tarawec, i dameŋ bembeŋne mac erâ sifu ʒâic busâqoc‐ticnehec. Erâ mamac ŋosafâc‐nane jaŋe mâreŋko jaba juju‐jeŋicte dameŋ ʒoricne, no irec sâc mi bâfuakopac.”
10Jakobo e iŋuc murâ Farao jambuŋkerâ rawec.
11Josefezi ine mamac hahacfâcne fic hae bâfua‐jarehuc Aigita mâreŋte dâkâne moc jaŋe jaŋacne biŋe eocte qikiŋne‐jarewec. Mâreŋ i mâreŋ biaŋne jâmbâŋ, Faraozi muwec sâc, Ramesesi mâreŋ hâcne.
12Erâ Josefe e mamac hahacfâcne â mamac‐ticnere wiacfâc sasawa naru motecfâc‐jeŋic jaŋere sâcko nânâ wiac râe‐jarewec.
13Eme mâreŋ sâc nânâ poroŋ basambiŋ, roroc qaŋqaŋ jaha fome Aigita mâreŋ â Kanaaŋ mâreŋ irec rune jaŋe nânâre hâmo sipiric embiŋ hâcne.
14Josefezi ine Aigita â Kanaaŋ mâreŋkonec nânâ furire moneŋ warewec i sasawa ro qâzuc ewec. Erâ moneŋ i Faraore ficko bafewec.
15Eme juku Aigita mareŋko mecne, Kanaaŋ mâreŋko mecne moneŋ omaeme ŋic jaŋe Joseferao fisirâ mumbiŋ: “Go nânâ bâfua‐nârec! Nâŋe wemocte gore maio hâmo sipiric ehapene hone qâoma enâreekic? Moneŋ‐nâŋec omaewec hâcne.”
16Josefezi muwec: “Moneŋ omaekacko qowi wiac‐ŋeŋic bacjopa wareniŋ, eme noni irec okacne nânâ ŋarepemu.”
17Iŋuc mume jaŋe qowifâc‐jeŋic bacjopa warepie becâsic â lama bulimakao erâ doŋgi irec okacne nânâ jarewec. Jara ira hâcne iŋuc epie qowifâc‐jeŋic sasawa izi nânâ kitâcne‐jareme gumec‐jopawec.
18Eme jara i tarame jara moc ira mocwâc ware fisirâ ʒiŋuc âzâcnembiŋ: “Bomboŋ‐nâŋec, nâŋe gore maio fuŋne‐nâŋec wemocko hesoŋkenaŋmu: Moneŋzi omaewec erâ qowi gurufâc‐nâŋec jaŋe biac gore biŋe embiŋ, irec sahac‐nâŋec â gie hesarac mâreŋ‐nâŋec sawa bomboŋ‐nâŋec gore biŋe eocte fokac.
19Nâŋe nâŋâcne mecne, â mâreŋ‐nâŋec mecne wemocte gore maio sipirickenaŋmu? Irec nâŋe nâŋâcne â hesarac mâreŋ‐nâŋec nânâre furine bacnâpotecne Faraore kiŋaŋ qanʒepeneŋ. Nâŋe hâmo sipiric epene mâreŋ tuhu fuazacte nânâ ukicne nâretec gie he sarac enʒepeneŋ.”
20Iŋuc mupie Josefezi Aigita mâreŋko hesarac mâreŋ sasawa furi bame Faraore biŋe ewec. Roroc qaŋqaŋ foha nânâre boc hâmombiŋte Aigita ŋic jaŋe ʒeŋgoma hesarac mâreŋ‐jeŋic furire qikiŋne‐fârembiŋ, eme mâreŋ i Faraore biŋe efârewec.
21Ehame Josefezi Aigita mâreŋ ŋifec â ŋifec, faic â juwic ŋic jurambiŋ jaŋe sasawa Faraore kiŋaŋ qaqa bacjopa‐fârewec.
22Taha bapa jaŋere mâreŋ mocjaha ine furi mi bawec; jaŋe Faraonec gie furi rombiŋ; irec Faraozi gie furi jarewec izi nânâ kitâcne‐jarewecte mâreŋ‐jeŋic furire mi qikiŋnembiŋ.
23Eme Josefezi ŋic ŋokac ʒiŋuc jazawec: “No miŋecgac ŋoŋe â mâreŋ wiac‐ŋeŋic furine bacŋopape Faraore biŋe eŋgopieŋ, irec nânâ ukic ʒi rorâ gie he sarac eniŋ.
24Eme juku fârine fuame ine 5‐konec wâŋ i Faraore biŋe eha, 4 ŋaŋacne biŋe ezejec, i gie mocwâc he sarac epie fârine fuame ŋaŋacne â wiacfâc‐ŋeŋic erâ naru motecfâc‐ŋeŋic ŋoŋe nâniŋte iŋuc enʒepieŋ.”
25Jaŋe mumbiŋ: “Go juju‐nâŋec ŋezickekomec, irec juranaŋmu sâc bomboŋ‐nâŋec go honec‐nâpotec biaŋkeme ine afeckerâ Farao kiŋaŋ qacnenaŋmu.”
26Josefe e iŋuc hâcne ehuc Aigita mâreŋ‐jeŋicko sâcmutâc ʒiŋuc râeme foweczi fokac: Nânâ wiac 5‐konec wâŋ i Faraore biŋe râezo. Taha bapa jaŋere mâreŋ sawa Faraore biŋe mi ewec.
27Iŋuc fuame Israe ŋic jaŋe Aigita mâreŋko, Goseŋ mâreŋko hâcne, ŋec juc embiŋ, ehuc mâreŋ i rauckerâ fua sawec ehuc sawe mâririackembiŋ.
28Eme Jakobo e Aigita mâreŋko jara 17 ʒuhuckerâ jufeku jara‐ticne 147 bazuwec.
29Eme hâmoc dameŋ‐ticne qândâŋkeme ŋokâ‐ticne Josefe hefârerâ ʒiŋuc âzâcnewec: “Go bubiaŋ wiac moc enarecmurâ ʒiŋuc ezemec: Mege gâjoŋ‐naneo râerâ jauŋnuhuc mupaŋke‐narec: Go Aigita mâreŋko mi ducnuzemec.
30No mamac ŋosafâc‐nane jaŋerao ʒuhuckerâ hâmope Aigita mâreŋkonec bacnu rarâ jaŋere ʒâŋeruŋko ducnuzemec.” Eki muwec: “Mukomec irec sâcko epemu.”
31Eme muwec: “Mupaŋke‐narec!” Eme mupaŋkecnewec. Eme Israe e fofo‐ticnere roŋgâŋkopec dapewec.
