Yosuwe 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Mangane ni i ra Isirayila kaane naxanye nɔ, e yi e yamanane tongo Yurudɛn baan sogeteden binni, keli Arinon xuden ma han sa dɔxɔ Xerimon geyaan na, sa Yurudɛn mɛrɛmɛrɛne fari sogeteden binni. E itoe nan nɔ:

²Amorine mangan Sixɔn naxan yi dɔxi Xɛsibɔn yi. A tan nan ma mangaya yi kelima Arinon xude wunla ma, Aroyeri taan yi dɛnaxan yi siga han Yaboko xudena Amoni yamanan danna. Galadi yamanan fɔxɔ kedenna fan yi na nan kui.

³A tan nan mɔn yi Yurudɛn sogeteden binna mɛrɛmɛrɛne xun na, keli Kinɛrɛti Daraan ma han Araba Daraan naxan xili Fɔxɔ Ige Darana, sa dɔxɔ Beti-Yɛsimoti taan na, han Pisiga geyaan san bun yiifari fɔxɔn binni.

⁴E mɔn yi Ogo fan nɔ, Basan mangana, Refa bɔnsɔnna muxu dɔnxɛna nde. A yi dɔxi Asatarɔti nun Edere taane nin.

⁵A tan nan yi mangayani keli Xerimon geyaan nun Salaka nun Basan yamanan birin yi siga han Gesuri kaane nun Maka kaane yamanan danne nun Galadi yamanan bode fɔxɔna, siga han Manga Sixɔn ma mangayaan fɔlɔdena, Xɛsibɔn taan mangana.

⁶Musa Alatalaa walikɛɛn nun Isirayila kaane yi na mangane birin nɔ. Alatalaa walikɛɛn Musa yi e yamanan so Rubɛn bɔnsɔnna nun Gadi bɔnsɔnna nun Manase bɔnsɔnna fɔxɔ kedenna yii, mɛnna yi findi e gbeen na.

⁷Mangane ni i ra Yosuwe nun Isirayila kaane naxanye nɔ Yurudɛn baan sogegododen binni, keli Baali-Gadi taani Liban lanbanni han sa dɔxɔ Xalaka geyaan na naxan tema Seyiri geyane binni. Yosuwe yi bɔxɔni itoe birin so Isirayila bɔnsɔnne yii, a bɔnsɔnne birin yi e gbee kɛɛn sɔtɔ:

⁸geya yamanan nun Sefela geya yiren nun Yurudɛn mɛrɛmɛrɛne nun geyane lanban yirene nun tonbon yirene nun Negewi tonbonna. Siyani itoe nan yi dɔxi na yirene yi: Xitine nun Amorine nun Kanan kaane nun Perisine nun Xiwine nun Yebusune.

⁹E taa mangan naxanye nɔ, ne xinle ni itoe ra: Yeriko mangana, Ayi taan mangan naxan yi Betɛli fɛma,

¹⁰Yerusalɛn mangana, Xebiron mangana,

¹¹Yaramuti mangana, Lakisi mangana,

¹²Egilon mangana, Geseri mangana,

¹³Debiri mangana, Gederi mangana,

¹⁴Xoroma mangana, Aradi mangana,

¹⁵Libina mangana, Adulan mangana,

¹⁶Makeda mangana, Betɛli mangana,

¹⁷Tapuwa mangana, Xeferi mangana,

¹⁸Afeki mangana, Lasarɔn mangana,

¹⁹Madon mangana, Xasori mangana,

²⁰Simiron Meron mangana, Akisafa mangana,

²¹Taanaki mangana, Megido mangana,

²²Kedesi mangana, Yokanayimi mangan naxan yi Karemele yi,

²³Dɔrɔ mangan naxan yi Dɔrɔ yamanani, Goyin mangan naxan yi Giligali yi,

²⁴e nun Tirisa mangana. Na taane birin taa keden manga keden. E malanxina, manga tonge saxan e nun keden.