Yosue 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Mɔwisin wɑɑti sɔɔ Isirelibɑ bɑ sinɑm be bɑ wɑ̃ɑ Yuudɛnin sɔ̃ɔ yɑri yeru ɡiɑ kɑmiɑ. Mɑ bɑ berɑ min tem mwɛɛrɑ mɛ mu wɑ̃ɑ Yuudɛnin wɔwɑ kpuro sɔɔ sɑɑ dɑɑ te bɑ mɔ̀ Aɑnɔɔn di sere n kɑ ɡirɑri ɡuu te bɑ mɔ̀ Hɛɛmɔɔwɔ.

²Sinɑm ben turon yĩsirɑ Sihoni. U sɑ̃ɑwɑ Amɔrebɑn sunɔ. Win wuuwɑ Hɛsiboni. Wiyɑ u mɔ kpuro sɑɑ Aroɛɛn di ye yɑ wɑ̃ɑ dɑɑ te bɑ mɔ̀ Aɑnɔɔn ɡoorɔ sɔ̃ɔ yɛ̃sɑn nɔm dwɑru ɡiɑ, sere n kɑ ɡirɑri ɡuu te bɑ mɔ̀ Pisiɡɑɔ, sɑɑ min di sere Bɛti Yesimɔtiɔ nim wɔ̃ku bɔruɡuun sɔ̃ɔ yɑri yeru ɡiɑ, sɑɑ mɑɑ min di, n kɑ dɑ dɑɑ te bɑ mɔ̀ Yɑbɔkuɔ Amɔnibɑn tem nɔɔ burɑ yerɔ, kɑ Gɑlɑdin tem bee tiɑ sere dɑɑ bure te bɑ mɔ̀ Genɛsɑrɛtiɔ.

⁴Turowɑ mɑɑ Oɡu, wi u sɑ̃ɑ Bɑsɑnin sunɔ. Wiyɑ u tie Refɑn bweseru sɔɔ. U wɑ̃ɑwɑ Asitɑrɔtuɔ, kɑ Edɛɛɔ.

⁵Wiyɑ u Bɑsɑnin tem kpuro mɔ sɑɑ ɡuu te bɑ mɔ̀ Hɛɛmɔɔn di sere kɑ Sɑlikɑɔ kɑ mi Gesuribɑn tem kɑ Mɑɑkɑɡibun tem nɔɔ ɡɑ yɔ̃rɑ, kɑ Gɑlɑdin tem bee tiɑ mi Sihoni, Hɛsibonin sunɔn tem nɔɔ ɡɑ yɔ̃rɑ.

⁶Tem mɛn tɔmbu kpurowɑ Mɔwisi, Yinni Gusunɔn sɔm kowo kɑ Isirelibɑ bɑ ɡo. Mɑ Mɔwisi u tem mɛ Rubɛnin bwese kɛrɑ kɑ Gɑdin bwese kɛrɑ kɑ Mɑnɑsen bwese kɛrɑn sukum bɔnu kuɑ.

⁷Yosue kɑ win tɔmbu Isirelibɑ bɑ sinɑm be bɑ wɑ̃ɑ Yuudɛnin sɔ̃ɔ duu yeru ɡiɑ kɑmiɑ. Sinɑm ben temɑ mu wɑ̃ɑ sɑɑ Bɑɑli Gɑdin di Libɑnin ɡuunun wɔwɑ sɔɔ, sɔ̃ɔ yɛ̃sɑn nɔm ɡeuɔ, sere ɡuu tèn mi ɡɑ̃ɑnu ku rɑ kpi te tɑ wɑ̃ɑ Seirin bɔkuɔ, sɔ̃ɔ yɛ̃sɑn nɔm dwɑru ɡiɑ. Tem mɛyɑ Yosue u Isirelibɑn bwese kɛri bɔnu kuɑ.

⁸Mɛyɑ mu wɑ̃ɑ ɡuunun berɑ ɡiɑ kɑ sere Sefɑlɑn berɑn bɑtumɑɔ kɑ Yuudɛnin wɔwɑɔ kɑ min ɡuunɔ kɑ sɔ̃ɔ yɛ̃sɑn nɔm dwɑru ɡiɑ mi ɡɑ̃ɑnu ku rɑ kpi. Hɛtibɑrɑ bɑ wɑ̃ɑ tem mi, kɑ Amɔrebɑ kɑ Kɑnɑnibɑ kɑ Feresibɑ kɑ Hefibɑ kɑ sere mɑɑ Yebusibɑ.

⁹Sinɑm be bɑ mɑɑ kɑmiɑ mi, ben wusu wee, siyɑ Yeriko kɑ Ayi ye yɑ wɑ̃ɑ Betɛlin bɔkuɔ

¹⁰kɑ Yerusɑlɛmu kɑ Heboroni,

¹¹kɑ Yɑɑmuti kɑ Lɑkisi,

¹²kɑ Eɡoloni kɑ Gesɛɛ,

¹³kɑ Debiri kɑ Gedɛɛ,

¹⁴kɑ Hɔɔmɑ kɑ Arɑdi

¹⁵kɑ Libinɑ kɑ Adulɑmu

¹⁶kɑ Mɑkedɑ kɑ Betɛli,

¹⁷kɑ Tɑpuɑ kɑ Hefɛɛ,

¹⁸kɑ Afɛki kɑ Lɑsɑroni,

¹⁹kɑ Mɑdoni kɑ Hɑsori

²⁰kɑ Simuroni Mɛroni kɑ Akusɑfu

²¹kɑ Tɑnɑki kɑ Mɛɡido,

²²kɑ Kedɛsi kɑ Yokunɛɑmu ye yɑ wɑ̃ɑ ɡuu te bɑ mɔ̀ Kɑɑmɛliɔ,

²³kɑ Dori ye yɑ wɑ̃ɑ Dorin ɡuunun berɑ ɡiɑ, kɑ Goyimu ye yɑ wɑ̃ɑ Giliɡɑlin bɔkuɔ,

²⁴kɑ Tirisɑ. Sinɑm be kpuro bɑ sɑ̃ɑwɑ tɛnɑ kɑ tiɑ.