Yona 2

1

2

3

4

¹Vano Yona nari mmirimani mohopa ahoswali aasukuruku Mwaneene Nluku

²eeraka: Mmahuvihoni kihokhuwelela Mwaneene Nluku ni ahokaakhula. Mmirimani mahiye kihokhuwa, ni nyu nheewa ncu naka.

³Nhokirihela mpaharini mapuro oowiisya cinenne ni kihokhala oorukureriya ni maasi ni mawimpi moolupale othene yaavira waculu waka.

⁴Kihoona toko kihomwalaanihiya ni nyu. Akaacuwela wiira kaanhala woona tho inupa enyu ittakattifu.

⁵Maasi othene yahokikhuneela mpaka ukittiya iphumu; ni ipahari yahokimirya ni makukhu o mpaharini yahokivilikelela mmuru.

⁶Kihokhuruwela mpaka vathi waya myaako, mpaka ilapo ya atthu ookhwa ni mikhora caya cahokitthukela mommo. Nanso nyu nhokikumiha mapuro oowiisa, nuukivaha ukumi; Mwaneene Nluku; Nluku aka!

⁷Upheelaka nnepa aka urimela mi kihowuupuwelelani nyu, Mwaneene Nluku, ni iswali caka cowela warinyu, mpaani mwinyu moottakattifihiya.

⁸Ale anaswalela anluku oohimaana ahiyaka ikiriri ca Nluku.

⁹Nanso mi kinaahala uwiipelani macipo oowunnuwihani ni wuuvahani itthuvo. Kinkopanka ile yookhuluvelihilyakani. Woopwa ukhuma wa Mwaneene Nluku.

¹⁰Vano Mwaneene Nluku ahoolumana ihopa wiira inraphye Yona, ni Yona ahoraphenya ucenkweni.