Tjawunanyatjarra 2

1

2

3

4

¹Nyangka Tjawunalu kuka kapingkatjaku tjuninguru Mama Kuurrnga ngaapirinypa marninypungkula-lu watjaranytja,

²“Yuwa Puurr, kapingka mirrirrikitjalu-rnanta tjapirnu, nyangka-rnin kuliralpi yirringkanu. Mirrirrikitjalu-rnanta mirrangu watjarnu, ‘Wankala-rni!’ Nyangka-rnin kuliralpi wankarnu.

³Tjiinya-rnin warningu kapi kaninytjarra tjarrpatjunu, nyangka-rni kapi purlkanyalu tjuturnu kanyiranytja. Nyangkan kapi purlkanya yurritjingaranyangka tirtu-rni rulyupungkula kanyiranytja.

⁴Tjiinya-rna yarlaku kuliranytja nyuntulu-rnin payira witura-wanarnu wantingu tiwa-rna yankula nyinatjaku, puru tjurrtju purlkanyangka tjarrpanytjamaaltu wantitjaku. Palunyakukantjalu-rna kuliranytja.

⁵Kapi kaninytjarra-rna tjarrpangu ngita-ngitarringkulalpi purtu ngaalymaranytja. Tjiinya kapilu-rni tjutura kanyiranytja. Nyangka-rni yukiri kapingkatjalu kata karrpirnu kanyiranytja.

⁶Tjiinya-rna kapi kaninytjarra pitjalayirnu yapu kaninytjarrangkatja pampurnu. Palunyalu-rna kulirnu, ‘Wartalpitjanu-rna mirrirriku. Palunyalu-rna marlaku pakalkitjamunu.’ Nyangka-rnin nyuntulu wankarnu pakaltjingarnu.

⁷Yuwa Puurr, nguwanpa mirrirringkulalpi-rnanta tjapirnu nyangka-rnin yilkaringuru kulirnu.

⁸Nyangka kutjupatjarralu-ya yapu wartatarrartu kunpu-kunpu pupakatirra marninypungkula. Tjiinya-ya nyuntuku mula-mularringkutjamaalarringu.

⁹Nyangka-rnanta ngayulu yinkaku marninypungku. Kuka-rna pungku tililku tjunkulalpi nyuntuku nintilku. Puru-rna kalkurnu wantitjalu palyalku. Yuwa Mama Kuurr, nyuntulu kutjulun wankalpayi.” Palunyapirinypa Tjawunalu marninypungkula watjaranytja.

¹⁰Nyangka Mama Kuurrtu kuka kapingkatja watjarnu Tjawunanya mantangka yulkapatjunkutjaku. Nyangka mularrpartu mapitjangu mantangka-lu yulkapatjunu.