Text copied!
CopyCompare
Buka Hope - Zona

Zona 2

Help us?
Click on verse(s) to share them!
1Pa korapa tiana sa igana lavata si varavara la se Zona koe Zihova sa nana Tamasa:
2“Kei Zihova, sipu tasuna sisigiti rau, si tepa atu si rau meke va tabe au Goi. Pa korapa popoa tadi pu matedi si tepa atu tinokae si rau, meke avosau Goi.
3Ele oki gore nau Goi pa hubina hokara sa lamana peava; vasina vari likohae nau na kolo lamana, meke opo tamunau ri doduru mua bogusu lavalavata si rau.
4Balabala ia rau sapu namu ele ta paqaha palae hokara si rau pa Kenumu Goi, meke lopu kaqu hite dogoro pulea rau sa Mua Zelepade hope, gua.
5Mae tamunau na kolo, ke kuzu si rau; namu na tamunu toa au sa meke ilupu vari likohae nia aroso patu sa batuqu.
6Lodu gore taloa si rau, kamo pa hubidi rina toqere, pa korapana sa popoa sapu ta tuku ninae rane ka rane. Ba Agoi Zihova sa qua Tamasa si harupu pule nau pa minate, ke toa si rau.
7Kei Zihova, totoso va gilagila ia rau sapu tata mate si rau, si varavara atu koa Goi si rau, meke avosau Goi pa Mua Zelepade hope.
8Arini sapu vahesi sari na beku hoborodi si veko pania rini sa dia sinoto koa Goi.
9Ba arau si kaqu kera vahesi Igo si Agoi. Kaqu va vukivukihi sage atu si rau, meke kaqu va gorevura i rau gua sapu va tatara Nigo rau. Sa tinaharupu si mae guana koe Zihova!” gua si asa.
10Ke garunia Tamasa sa igana lavata pude lua vura nia se Zona pa masamasa, meke ta evaṉa tugo si asa.