Joona 2

1

2

3

4

¹Joonanoŋ sara uutanoŋ eŋ Poŋ Anutuya qama kooliŋ muŋ

²kokaeŋ ijoro: “Oo Poŋ, nii kokojinjiŋ uutanoŋ qama kooliŋ gombe gii qaana moma leeya meleemba. Nii koomuwaa senjoŋ dusiitanoŋ eŋ komuŋ tagoŋ welema gombe gii geja ama jejewelenwelena mojaŋ.

³Gii monago kowe biiwi jabiriŋanoŋ (jauŋanoŋ) hagoŋ noŋgi kamaaŋ ejeŋ. Geeŋgo riiwagoŋ nona gomaŋ siŋsiŋgoyaa dutanoŋ kamaabe gboulu somatanoŋ esuuŋ nonja. Goo apu kokopa kuuya ii musuluŋgoŋ nonja. Goo kowe siriga ii turuŋ neŋ olaaŋ nonja.

⁴Nii kokaeŋ romoŋgojeŋ: Gii geeŋgaa jaasewaŋganoŋa konjoma nona sooŋ tintuaŋ ejeŋ. Ii kileŋ nii mombo jaananoŋ goo jiwowoŋ jigo kowogaageŋ uuwe keno jejeromoŋromoŋ anjeŋ.

⁵Apu ano omanjareya ii qananoŋ uma turuŋ nondaboroja. Kowe biiwi jauŋagadeeŋ liligoŋ nondaboroja. Kowewaa tokoleya ii jamojuju kaaŋa waŋna momosiiŋ esuuja.

⁶Nii kowe biiwi jauŋaa dusiitanoŋ koi kanoŋ uluŋgoŋ kamaajeŋ. Kowe biiwi jauŋaa jaa unuŋa ii koŋgi pondaŋ qananoŋ eu somoŋgoŋ nonja. Oo Poŋ Anutuna, nii koi laligojento, gii mono koomuwaa senjoŋ dusiita koi kanoŋa gou koma nona saanoŋ mombo laaligonoŋ koumaŋ.

⁷“Noo laaligonanoŋ qaomambaajoŋ ano kambaŋ koi kanoŋ oo Poŋ, nii romoŋgoŋ gombe qamakoolinanoŋ keuma goo Siwe jigo kowoganoŋ eu uma gejaganoŋ kemebaati, ii mojeŋ.

⁸“Ejemba gadokopa beŋ lopioŋ omaya goda qeŋ usugoŋ oŋomakejuti, iyoŋonoŋ kaeŋ ama kaleŋmoriaŋ Toya gii gema guŋkejuto,

⁹nii mono mepemepesee ooŋsaa qama mamatewoo ama siimoloŋ ooŋ gomambaajoŋ mojeŋ. Nii iwoi amambaa qaa jeŋ somoŋgobeti, iikawaa so mono ama sorogoŋkemaŋa. Oo Poŋ, gii gou koŋkoŋ Tona koloojaŋ. Qaa ii oŋanoŋ.”

¹⁰Kaeŋ qama kooliro Poŋnoŋ sara ii jeŋ kotoŋ muro kaŋ kouma Joona lono namo toboganoŋ kamaaro. Kiaŋ.