Youna 2

1

2

3

4

¹Youna e menabo hagomo ganodini esala. E da ea Hina Godema sia:ne gadoi.

²E amane sia:i, “Hina Gode! Na da se bagadedafa nababeba:le, Dima wele sia:ne gadoi. Amola Dia na sia:ne gadobe amo nabalu, dabe i. Na da soge wadela:i ganodini esalu, amo da dunu bogogia:su soge diala, amola na Dia fidima:ne di. Amola na dibi amo di nabi dagoi.

³Dia na hano lugududafaga ha:digi amola da hano gafului amoea na huluane dedebosa.

⁴Na agoane dawa:i, Dia da na fisi dagoi, amola na da Dia hadigi Debolo diasu noga:idafa bu hamedafa ba:mu dawa:i galu.

⁵Hano misini na dedeboi, amola hano wayabo misini na da:i huluanedafa dedeboi amola hano gadula:me da na da:i busa:gi amola huluane lala:gili dedeboi dagoi.

⁶Na amo hano haguduga goumi, dabua gadonini dala gududafa doaga:i, amo soge amoea, na masunu gogolele, logo ga:si dialu. Be amomane Hina Gode Bagade, Di da na Godedafa, Dia na bu laiba:le. Amola, luguduga lale, na esaleawane bu walesi.

⁷Hina Gode! Na dawa:loba, na da bogomu gadenei agoai ba:i. Be amomane, na Dima dafawane dawa:i. Amola na Hina Gode, Dima sia:ne gadoiba:le, Di da Dia hadigi Debolo Diasu ganodini nabi.

⁸Dunu fifi asi gala amo da loboga hahamoi ogogosu ‘gode’ma sia:ne gadosa, amo ilia da Dima fa:no bobogesu hou yolesi dagoi.

⁹Be na da Dima hahawane gesami hea:su hamomu. Na Dima gobele salasu hou hamomu, amola ni ilegele sia:i defele hamomu. Be gaga:su houdafa da Dima fawane maha, na Hina Gode!”

¹⁰Amanoba Hina Gode da menaboma isoma:ne sia:beba:le, menabo da Youna e boso da:iya, isole ligisi.