Text copied!
CopyCompare
Holi Baibul - Jona

Jona 2

Help us?
Click on verse(s) to share them!
1Wal brom insaid langa det fish binji Jona bin jingat langa YAWEI det trubala God.
2“YAWEI, wen aibin abum trabul, aibin jingat langa yu, en yubin irrim mi. Wen aibin gulijap binij, aibin jingat langa yu blanga album mi, en yubin irrim mi jingat.
3Yu na bin tjakam mi insaid langa dijan dipwan woda. Olawei raitdan insaid langa dijan solwoda yubin tjakam mi. Ola solwoda bin draundim mi, en det win en weib bin jidan longwei ontop langa mi.
4Wal aibin reken yubin andimwei mi olagija, en aibin reken ai kaan luk det seikridwan Serramoni Pleis blanga yu deya langa main kantri enimo.
5Wal aibin godangodan, en det solwoda bin draundim mi, en imbin meigim mi lujim main win na. Detmatj solwoda bin olaran langa mi, en ola gras insaid langa det solwoda bin taiyimap mi langa main hed.
6Aibin godangodan raitdan raidap aibin gajimap det graun, en deya na ai bina dai olagijawan. Bat najing. Ai nomo bin dai, dumaji yu, main God, yubin bringimbek mi laibala brom det solwoda.
7Wal wen aibin gulijap dai, aibin jinggabat yu, en yubin irrim mi deya brom det Serramoni Pleis blanga yu, en yubin jandim det fish blanga julurum mi wulijim ai kaan dai.
8Wal detlot pipul hu bulurrum olabat ronwei nomo bulurrum det wei blanga yu.
9Bat ai gibit theingks langa yu, en ai garra meigim det sekrifais serramoni blanga yu du. En ebrijing weya aibin dalim yu wen aibin jingat langa yu, ai garra duwit langa yu na. Wal YAWEI, yu na det trubala God, en oni yu gin seibum pipul.”
10Lagijat na Jona bin tok langa YAWEI, en God bin tok langa det fish, en det fish bin baku Jona langa det senbeingk wansaid langa det solwoda.