Annabi Yunusa 2

1

2

3

4

¹Alatala naxa yɛxɛ xungbe nde yamari baa ma a xa Yunusa gerun. Yunusa naxa lu yɛxɛ furi kui fɛɛɲɛn saxan, kɔɛ saxan.

²A naxa a Marigi Alatala maxandi yɛxɛ furi kui yi ki:

³«Alatala, n to n xui rate i ma n ma bɔɲɛ mini kui, i bara n yaabi. N to i xili kelife aligiyama, i bara n xui mɛ.

⁴I to n woli baa bɔtini ma, ye bara n makoto, i nu fa i xa mɔrɔnyie radin n ma.

⁵N naxa a maɲɔxun i bara n keri, kɔnɔ n a kolon n man fama nɛ i xa banxi sɛniyɛnxi tode.

⁶N naxa madula ye xɔɔra, baa naxa nɔ n na. Baa ɲooge naxa filin filin n kɔnyi ma.

⁷N goro nɛ baa bɔtini ma han geyae fɔlɔde. N nu na geeli aligiyama, kɔnɔ i tan Marigi Alatala, i naxa n namini na yili tilinxi kui n ɲiɲɛ ra.

⁸N nii to nu na bafe n fate i, n naxa n maɲɔxun Alatala ma. N ma maxandi naxa siga han a sa i li, i xa hɔrɔmɔbanxi sɛniyɛnxi.

⁹Mixi naxee e nii taxu kuye sɛnbɛtare ra, nee e yɛtɛ raganma hinnɛ fanyi nan na.

¹⁰Kɔnɔ n tan tantui bɛɛti nan bama i bɛ sɛrɛxɛ ra, n na n ma kɛrɛ tongoxi rakamalima nɛ. Kisi fatanxi Alatala nan na.»

¹¹Na dangi xanbi, Alatala naxa yɛxɛ yamari, a xa sa Annabi Yunusa bɔxun xare ma.