Text copied!
CopyCompare
Is Lalag te Megbevayà - Jonas

Jonas 2

Help us?
Click on verse(s) to share them!
1Ne zutun te ziyè si Jonas te ǥetek te isdà, mid-ampù sikandin diyà te Nengazen he Megbevayè din.
2Ke sikandin te, “Nengazen, edsempiten ku sikew tenged te kemereǥenan he neeǥiyan ku. Ne midineg a kenikew. Ne midtevangan a kenikew hein edserupatey ad.
3Ne ǥuntaan intimbag a kenikew kayi te mezalem, ne zini ad te zizalem te zaǥat. Ne nelened a wey netembunan a te zekelà he menge vaǥel he midhimu nu.
4Minsan pa te impekeziyù a puun kenikew, netuenan ku he ebpekehendiyà a ǥihapun te segradu he valey nu.
5Inteledted ad te wahig ne henduen te egkelened ad. Is ulu ku, nevukusan te sagbet diyà te zagat.
6Kunaan ku ke nepirisu ad diyà te kinezizeleman te wahig te wazà pidtemanan. Piru inggaun a kenikew puun te kinezizeleman, He Nengazen he Megbevayè ku.
7Ne hein edserupatey ad, netenuzan ku sikew. Ne zutun mid-ampù a, ne is ampù ku nezineg nu, su nekeuma ziyà te kenikew zutun te segradu he valey nu, ne midtavak nu haazà.
8Sikan is menge etew he iyan edsimbahan dan is duma he menge ed-ezapen, ne mid-engkezan dan is gaǥew nu kandan.
9Iyan, siak mulà, emun edlibriyen a kenikew ne ebpemuhaten ku sikew te kanta te kebpeselamat. Ne heini is impenaad ku, edtumanen ku. Sikew is Nengazen, iyan ka ebpekelibri!”
10Ne midsuǥù te Nengazen sikan is isdà he iutè din si Jonas diyà te veyvey, ne midtuman dutun te isdà haazà is insuǥù kandin.