Joná 2

1

2

3

4

¹Maʌ̃ne Jonába b̶eda b̶ited̶aʌba Ãcõrẽa nãwã iwid̶isia:

²Mʌ̃ biẽ́ b̶esid̶e mʌ̃a bed̶ea djuburiasia, mʌ̃ Boro Ãcõrẽ, maʌ̃ne bʌa mʌ̃ bed̶eara panusia. Mʌ̃ beubod̶oba mʌ̃a bed̶ea djuburiasia, maʌ̃ne bʌa mʌ̃ bed̶eara ũrĩsia.

³Bʌa mʌ̃ra pusa nãbuad̶e b̶atabuebisia. Maʌ̃ne pusaba mʌ̃ra ab̶ed̶a jũma ãnã edasia. Bʌa pusa bogozoa b̶ʌ diabued̶ara mʌ̃ ʌ̃rʌ̃ wãsia.

⁴Maʌ̃ bẽrã crĩchasia bʌa mʌ̃ra igaraped̶a bʌ quĩrãpitabemada ãyã b̶ʌsida. Mʌ̃a crĩchasia bʌ de droma biya quiruda waa unuẽ́da.

⁵Pusaba mʌ̃ra jũma ãnã erob̶asia. Ab̶ed̶a mʌ̃ra pusajãne b̶asia. Maʌ̃ne pusajãnebema chiruara mʌ̃ borod̶e bʌracuasia.

⁶Ab̶ed̶a mʌ̃ra ed̶u pusajãne ta wãsia. Mamaʌba mʌ̃ra waa ẽdrʌẽ́da crĩchasia. Baribʌrʌ mʌ̃ Boro Ãcõrẽ, bʌa maʌ̃ beuid̶ebemada mʌ̃ra ẽdrʌ edasia.

⁷Beubod̶o basid̶e mʌ̃a bʌra quĩrãnebasia. Maʌ̃ne bʌ de droma bia quirud̶eba bʌa ũrĩsia mʌ̃a bed̶ea djuburia b̶ʌda.

⁸Jʌwaba od̶a ãcõrẽ ʌb̶ʌaẽ́ b̶ea ẽpẽbadarãba bʌa careba b̶ʌra igarabadaa.

⁹Baribʌrʌ mʌ̃a bio bia b̶ʌad̶a abʌrʌd̶e animarãda bʌ́a babue dia b̶aya. Maʌ̃ awara bʌ ume bed̶ea b̶ʌd̶ara mʌ̃a jũma daucha o b̶aya. Mʌ̃ Boro Ãcõrẽ, ab̶abe bʌabʌrʌ mʌ̃ra poya ẽdrʌ b̶ʌya.

¹⁰Maʌ̃ne Ãcõrẽba b̶edaa Jonára pusa icawa webisia.