Yona 4

1

2

3

4

¹Nanso vaavale, Yona ahorusiya ni ahocaca.

²Vano ahoswali akohaka Mwaneene Nluku toko co: We Mwaneene Nluku, mi akeenre kihinaaya ukhuma ilapo aka wiira phi yeeyo yahalaa upanka? Phimaana kipankaka mananna ootthawela uTarisi! Mi kahocuwela wiira we uri Nluku ookiriri ni oothunku, wiira we uri Nluku oopica ucaca, eemaani ni ooreera, ciicammo ukati wothene uri oolevelela.

³Pahi, nyu Mwaneene Nluku, nkiive, kontha fatari kikhwe kihikhale nkumi.

⁴Mwaneene Nluku ahaakhula: We Yona wookupali wiira uhaana isariya yoorusiya toko co?

⁵Vaavale Yona ahokhuma uNinive, phurwaaka mphante unkhuma ncuwa ni ahonkoma. Vano ahoteka nrapattha ni ahonkoma wantthuucini waya, awehereryaka woona itthu yahala wiiranyaa nsitati mmo.

⁶Vano Mwaneene Nluku ahomeliha mwamwiri wootthavelaca wiira Yona amumule wantthuucini ni atteeliye. Vaavale Yona ahotteeliya venci.

⁷Nanso usa waya, ncuwa nipheelaka ukhuma, Nluku ahonruma mwaamunku wiira eeve mwamwiri uyo ni wahokhwa.

⁸Wakhumilyaya ncuwa, Nluku ahowiha iphyoo yooviha cinenne ikhumaka unkela ncuwa. Yona ahociriphuwa nlattu wo nttukuttha ni ncuwa nampaha mmuruni mwawe. Vano ahopheela ukhwa ni aheera: Fatari kikhwe kihikhale nkumi.

⁹Nluku ahonkoha Yona eeraka: Uhaamini urusiya nlattu wo yoola mwamwiri ula? Yona ahaakhula: Khweeli kihaana isariya yoorusiya toko co mpaka ukhwa.

¹⁰Vano Mwaneene Nluku aheera: Ula mwamwiri ula wunnuwile uhiyu, ni uhiyu nkhwawe uyo wahokhwa. We khiiwo ipankenlyaa ula mwamwiri ula ni khawunnuwihile, vano unawoonela uthunku.

¹¹Mi ni isariya caka cothene akinlamuliya woonela ikiriri isitati yo Ninive, uryaya atthu enci oohicuwela itthu yooreera ni yoonanara woopwaha elufu iminya wosirini (120.000) ni inama cinci ciriwo?