Yuunusa 2

1

2

3

4

¹Ari mmatthupo wa swi, ye khwaaza olompa anshukhurwelaka Nnyizinku awe:

²“Nhuzuni mwaka kankhuweliye Nnyizinku, na aakijipwiye. Mithili za ahera kaakhuwiye na waasiiliye huula yaka.

³Waakitupweeziye mpahari wa wiichamo, nkatthi wa khilintti, nziko wa maati khukizukulela, na mawipi awo khukikhutela.

⁴Miiyo khulupa yoori keekareliwa peeti-wene na omaasho wawo weeyo Nnyizinku. Kinta kirutele woona theenya nyuupa yawo yoottakatthiifu?

⁵Maati khukifiya vakhulo, khilintti khukizukulela na mirawa khukizokonzela eeshwa yaka.

⁶Khuzama mpakha vanchina la nyaako, tuniya ya vathi, puuro enimfukelaaye ntthu khwa siikhu zooshi. Ila weeyo Mbwanaaka Nnyizinku khuusuru nafusi yaka nkhapuri mphule.

⁷Wakathi kaari osaleelaavo ofwa, koofikhiriye weeyo Nnyizinku, khuuperekheza lompa yaka, yoori efiye nnyupa mwawo woottakatthiifu.

⁸Apale anaputwaaye sanamu zoohiina fwayita, antarawu tthakaraka ya Nnyizinku.

⁹Ila miiyo kinteela wuushukhurwela Nnyizinku na maliipo a siifwa na owinkha twaha, na kinteela oretta eti kaahitiyeeyo, maana nusura ti yaawo weeyo Nnyizinku.”

¹⁰Aphano, Nnyizinku khuruma swi etile, yoori yanchuwe Yuunusa nshini wa nttima.