Text copied!
CopyCompare
Buk Baibel long Anuki - Jona

Jona 2

Help us?
Click on verse(s) to share them!
1Raghanina Jona patana noko ighanina kamone na Yawe yana God biidi irupari.
2Iwona bo, “O Yawe God, yagu nuwabero ghamana kamone bi tam biidi arukwatu, na kuwonabodegu. Bi wawaya raborabobodi yadi kubura kamonakinama wiiwiita kiiravine adou na tam kuwaiyanegu.
3Tam boga dumadumaye kuvitavenayowoyegu, da ayowogha anagho dibune, meme yegii yana maragata tupana ivikenaviviregu, bi yam yabarata ghamanakidi tupadi na debaguve siyatamotamo gawowora.
4Tagu anoghosi da ware gwabimma kudarutavegu, bi gegha, akovi da kate yam Bare Kabikabikuwayina anakitamayeni.
5Bi yegii isowomumugu da gerubana yawiigu ayatavenina, bi boga dumaduma ivikenaviviregu, da watawata gayamigu siviruvivireni.
6Tagu ayori ayowogha koya kaye parapine. Bi noko kuburine avibiwa kabikabi wawayina, noko gawarine na matamketa gudu makewaghawaghasina. Bi gegha da tam, Yawe yagu God kuviyawiigu, da noko doguna wautapunama yawayawiigu bi kukabiwiiveramayigu.
7Bi raghanina ayaparoparoro, na Yawe God anoghosim, da arupari tam biidi, bi yam Bare Kabikabikuwayine kuwaiyanegu.
8Nokodi iiyawogha god wiiwiiyaba sapeepetedi, na yam nuwamonika simiiri kubuteni.
9Bi kiiraviguve, na tam anakabepepim; tagu na tam anasuwarim, bi avisuwona da nokodi sawara ayabera tam biidi na anabera. Yawe God, tam kawagha kuviyawiigu.”
10Raghanina gabudara viya sikovi, na Yawe God yana sisiya bagibagine na ighana, Jona kikire tepaye iguruwiitaveni.