Yona 1

1

2

3

4

¹Vano nihuku nimoca nuulumo na Mwaneene Nluku nahowa waYona mwana a Amitayi niiraka:

²Wunweke ni urweke isitati yuulupale yo Ninive waahimyacereke moolumo aka kontha coonanara caya cowela mpaka waryaka.

³Nanso Yona ahonwa atthawaka wamiithoni waMwaneene Nluku arwaka uTarisi, ahokhuruwela uYopa, waaphwanyalyawe ikalawa yarwaa uTarisi, aholivela ikwaha ni ahokela, wiira aatthukane nloko anakalawa yarwaa uTarisi, apheelaka waatthawela uttayi Mwaneene Nluku.

⁴Vano Mwaneene Nluku ahoruma iphyoo yuulupale mpaharini ni ahopanka nkhaya mpaka ikalawa yahanle vakani uphwyaa.

⁵Vaavale anakalawa yahoovaca venci, ni khula ntthu ananlepela nluku awe, ni yahorihela mpaharini mirintti carinaya nkalawani, wiira awukule ulemeliya nwo. Vaavale Yona ahokhuruwela nhina ikalawa weecatalenlyawe arupaka ikhove.

⁶Nhooleli okalawa ahorwaa waYona ni ahonkoha wiira unrupani? Wunwe ni unlepele nluku aa, noone toko nanoonela ikiriri wiira nihikhwe.

⁷Wahoolo yaheerelana nrwee nipanke mwavi wiira nincuwele tipani uniwiihenre nenna nihusinna. Ni yahopanka mwavi ni wahomorela waYona.

⁸Vano yahomwiirela: Unihimerye nenna va, uniwiiherenreni nenna nihusinna. Nteko aa phuvi? Unkhuma vayi? Ilapo aa phivi ni ikhapilani?

⁹Yona ahaakhula: mi Heperewu, ni kinawoova Mwaneene Nluku, Nluku o wirimu, apattusile ipahari ni itthaya.

¹⁰Vaavale atthu ale yahanca woova venci ni yahomwiirela: Isiyani yeela ipankile ela? Kontha atthu ale yahocuwela wiira atthawile wamiithoni waMwaneene Nluku, maana ahaahimyacera.

¹¹Yahomwiirelaca: Nuupankeke isiyani wiira ipahari imaale? Kontha nkhaya natepaca mpaharini.

¹²Yona ahaakhula: Nkikuse ni nkivonyere mpaharini; ipahari inaahala umaala. Ni kinacuwela wiira nkhaya ula wile mwanlattu wa waka.

¹³Vaavale anakalawa yaanvira yeettihaka ni ikuru caya apheelaka uphiya ukhopela. Nanso khayoonrye, kontha mpaharini nkhaya aantepa.

¹⁴Vano yahaalepela Mwaneene Nluku a Yona, yiiraka: Contte Mwaneene Nluku, nhinihiye nikhwaka nlattu wa coonanara ca Yona, nhinootherye hi va ukhwa wawe kontha nyu Mwaneene Nluku nhopanka wootthuna winyu.

¹⁵Vaavale yahonteesa Yona ni yahonvonyera mpaharini, ni nkhaya ahomaala ucaca.

¹⁶Vano atthu ale yahoovaca venci Mwaneene Nluku, ni yahaavahaca itthuvo Mwaneene Nluku ciicammo yakhuluvelihaka waatthara.

¹⁷Mwaneene Nluku ahoruma ihopa yuulupale wiira immirye Yona. Ni Yona ahokhala mmirimani mohopa mahuku mararu uthana ni uhiyu.