Iona 2

1

2

3

4

¹Iona owa moia bupa bedewe wandie Iawe God mampe rauparilene wanase,

²“O Iawe God ne poka debama etedina, bedewe manawo rauparinteno etaneana. Bolala bolau bedewe iane aidantene sau baiwa iririntedino etaneana.

³E ne aubaneano owa didiweido iane aidanten. E rabamaa mukawa epaubanedie leusaitunedie. E rabamaa ne osonawo epedie tutuwadie.

⁴Ne insenase, e ne enabodaneano eidaene nambeido anten, ita ando e dua kakaiwa mai osowe ewapa.

⁵Ne owa bedewe iane antene nuana boidalen, owa numanen, ita ina owa bedewe inintoia uwana taunboden.

⁶Ne iane owa bedewe aidantene wadi didiuwoido nonen. Sape ne diburantene wainedine, bola sa intawa moau gudulala winei. Tane e Iawe God ne Godna e ipa sa ne inaneana, ita e ne don sa bedewe wainedino wadaubanee inaneana.

⁷Walama sawo ne insaisana koaleno boida baiwantedine. O Iawe God ne e insaene manawo rauparinten, ita e dua kakaiwa bedewe wainie etaneana.

⁸Apana mida god lagawaau wadaposimoia, e nuawadawadaa winakasala adiananasai.

⁹Tane ne nebaida e os wadaposiepina; Ne e manawo pulo itupa, ne dima e manawo sauatena rua dewamopa. Iawe God e os apana inamoiana.”

¹⁰Walama isiwa diantono aupe Iawe God owa moia debama dieno Iona uta rua einaubeno owa waiwe nosen.