1Dameŋ ira ŋic guru sâko Jesurao tumaŋnerâ nânâ tâmiric jupie motecfâcne hefârec‐joparâ jazawec,
2“No ŋic jaŋere bunane sâqorekac, jaŋe norao ŋafe ʒoaŋ jahec â moc juku nânâre hâmoŋgopieŋ.
3Eme nânâ tâmiric hae‐jeŋicko sorec‐jopape hatao rahuc nânâre hâmo sipiric eniŋmu, gâcne jaŋe mâreŋ ʒorickonec warembiŋ.”
4Iŋuc mume motecfâcne jaŋe ʒiŋuc âzâcnembiŋ: “Mâreŋ tuhuo ʒira nânâ sâko wenirec bâfuarâ ŋic iŋucne gumec‐jopapene sâcjopaocmu?”
5Mupie wio‐jarerâ muwec, “Ŋoŋerao poroŋ wezimuc fokac?” Eme jaŋe mumbiŋ, “Seweŋ.”
6Âzâcnepie manarâ mume ŋic jaŋe qâzuckerâ mâreŋko waha ŋepie poroŋ 7 rorâ daŋge murâ bazuhuc motec jareme jaŋe bâtâc barâ ŋic jarembiŋ.
7Erâ opâ qowi piicne jahec mac ŋewec i iŋuc jaha jambuŋkerâ mume ŋic bâtâc bajarembiŋ.
8Eme ŋic jaŋe nârâ gapec‐jopawec. Erâ mâreŋko tiwâne ŋerawec i sasac 7 ira ropie hurâ fusucmawec.
9Nânâ nâmbiŋ ŋic i jaŋere ʒare 4 tauseŋ. Nâpie sorec‐jopame risiembiŋ.
10Ŋic jaŋe rapie izia motecfâcne jaŋehec wokeo ferâ raku Dalimanuta mâreŋko fisimbiŋ.
11Ira juhapie farisaio ŋic jaŋe Jesurao fisirâ dâŋzi jâiŋkerâ sambâŋko fuŋne qaqa mâsi moc mume fuame honeniŋte mumbiŋ. I esâickehuc âzâcnembiŋ.
12Âzâcnepie ʒâire‐jarehuc nokafe herâ muwec, “Ŋic iŋucnezi fuŋne weniŋucte fuŋne qaqa mâsire muŋgopieŋ? No jâmbomac ŋazape: Ŋic iŋucne fuŋne qaqa mâsi moc mi ŋowatu‐jâmbâŋkepemu.”
13Iŋuc murâ behec‐joparâ motecfâcne rocjopame wokeo ferâ riqic ocniŋucnao raʒimbiŋ.
14Eme motec jaŋe poroŋte nikec‐jopame foha raʒimbiŋ. Mocsâkoa wokeo fowec.
15Ehame uŋdâŋ ʒiŋuc muhuc jazawec: “Ŋoŋe farisaio â Herode hâmu goreŋ‐jeŋic bâec bacnehuc paŋsawa juŋʒepieŋ.”
16Jazame jaŋackoaŋ nazaŋ gazaŋ erâ mumbiŋ, “I poroŋte nikec‐nâpome foha wareŋgopeneŋte nâzâkac.”
17Dâŋ i muhapie hazec‐ticnao hume manarâ jazawec, “Poroŋte nikec‐ŋopajec irec wemocte muc manac eŋgopieŋ? Ŋoŋe fuŋne mi mana taraŋgopieŋ? Maŋŋeŋic moc mi uŋtokac me?
18Ŋoŋe ʒâŋe‐ŋeŋic foipiehame wiac mi honeeŋgopieŋ â hazec‐ŋeŋic foipiehame dâŋ mi manaeŋgopieŋ? Ŋoŋe wiac hone manac ehuc ninikecne jueŋgopieŋ me?
19No poroŋ 5 bâtâc barâ ŋic 5 tauseŋ gumec‐jopape tiwâne fome ropie sasac wezimuc hurâ fusewec?” Wio‐jareme mumbiŋ: “12”.
20“Â poroŋ 7 bâtâc barâ ŋic 4 tauseŋ gumec‐jopape tiwâne fome ropie sasac wezimuc hurâ fusewec?” Jaŋe mumbiŋ: “7”.
21Mupie jazawec, “Eme mamana‐ŋeŋic sifu mi fuakac me?”
22Eme raku Besaida haeo fisipie ŋic tiŋtuŋ moc Jesurao bawarerâ mezi bâuaocte âzâcnembiŋ.
23Âzâcnepie ŋic tiŋtuŋ menao rorâ hae râpeo bahurâ ʒâŋe‐ticne tâfec ruacnerâ mene qizecnao râehuc wiocnewec, “Wiac moc honekomec?”
24Eme tiŋtuŋzi ʒâŋe firâ muwec, “No ŋic honec‐jopape jâc hawari tinac erâ rac warec eŋgopieŋ.”
25Iŋuc mume Jesu e menezi ʒâŋene bâuame ŋic e ʒâŋene biaŋkeme fiɋaɋackerâ bembeŋko â ʒoricko wiac sasawa hone‐hâmowec.
26Eme Jesuzi sorehuc ʒiŋuc âzâcnewec: “Go haeo mi fehuc mâc ficgao rac.”
27Jesu e motecfâcne rocjopame Kaisarea hae, ŋicwofuŋ Filipozi mume bambiŋ, irec hae pitic ŋerawecko rambiŋ. Hatao rahuc Jesuzi motecfâcne indiŋ‐joparâ muwec, “Ŋic jaŋe nore mo muŋgopieŋ?”
28Indiŋ‐jopame ʒiŋuc âzâcnembiŋ: “Johane Miti Opâ fufuŋke, â gâcne jaŋe Elia, â gâcnezi ine porofete moc, gore iŋuc muŋgopieŋ.”
29Mupie esâic‐joparâ muwec, “Â ŋaŋacne ine nore mo muŋgopieŋ?” Eme Petorozi ʒiŋuc âzâcnewec: “Go Kristo hâcne.”
30Iŋuc mume ŋic gâcne mi mufua‐jareniŋte mic muac sanaŋne ejarewec.
31Eme dameŋ ira fuŋkerâ dâŋ ʒiŋuc mufua‐jarewec: “Ŋic Fâri Wâtuŋnezi juku ʒâic serereŋ manaocmu, â soŋaŋ â taha bapa micne â miti qaqazu jaŋe e beherâ qa imac ecneku qapie hâmorâ ʒoaŋ jahec â moc eha fahareocmu.”
32Dâŋ i mutaniŋkerâ jazawec. Jazame Petorozi bucko hefârerâ qataracnehuc dâŋ fuŋkerâ âzâcnewec.
33Âzâcneme fotikierâ motec jaŋerao ʒâŋe fihuc Petoro mu tutuc ecnerâ muwec, “Sataŋ go râriec, go dâŋ maŋkekic i Anuture dâŋ mâcne, i ŋicdâŋ.”
34Jesu e ŋic guru sâko jumbiŋ jaŋe â motecfâc‐ticne hefârec‐joparâ ʒiŋuc jazawec: “Ŋic moczi no bâjâpecnuzo murâ maŋ sahac‐ticnere dâŋ râpeckehuc maripoŋ‐ticne hâporâ bâjâpecnuzejec.
35Moc e juju‐ticne sakareme sifuckecneocmu â moc e nore erâ â Biŋebiaŋte erâ qikiŋneme fuacneocmu.
36Moc e mâreŋte wiac sasawa hure‐fâreku kinduŋ bânduŋ bajuhame juju‐ticne omaeme wemo wiac fârine focneocmu?
37Me juju‐ticnere kiwiric wemo wiac rome risiecneocmu?
38Moc e ŋicguru miti qiqikiŋ â hehesicne ʒi jaŋere ŋondeŋko juhuc no nahacnere me miti‐nanere maname mimi gaŋgaŋnehec eocmu, ere Ŋic Fâri Wâtuŋnezi iŋuc jaha Mamac‐ticnere sambâŋ tatamachec â tiri aŋelo jaŋehec fisirâ maname mimi gaŋgaŋnehec eocmu.”
