1Eme farisaio â Jerusalem haeonec miti qaqazu gâcne fisirâ Jesurao tumaŋnembiŋ.
2Ehuc motecfâc‐ticne jaŋeraonec tucnezi mejeŋic mi ʒuʒure nânâ mâc ro nâc epie honec‐jopambiŋ.
3Farisaio â Judaŋic mâmâc sasawa mejeŋic ʒurerâ jaha nânâ nâeŋgopieŋ. I mimiŋnefâc‐jeŋic jaŋere mumutâc dâŋ reŋkehuc iŋuc eeŋgopieŋ.
4Erâ furi bapa tomaonec risierâ iŋuc jaha opâ rurua tâmiric nânâ mi ro nâc eeŋgopieŋ. Erâ sawa mâcne, kuʒi, râqâc, oto gomba ʒuʒure â wiac gâcnere mumutâc dâŋ bajueŋgopieŋ, i mimiŋzi ɋâric ewarehuc jumbiŋ.
5Irec farisaio â miti qaqazu jaŋe Jesu wiocnerâ mumbiŋ, “Motecfâcge jaŋe wemocte mimiŋnefâc‐nâŋec jaŋere mumutâc dâŋ qâsuarâ mejeŋic mi ʒuʒure wiac ro nâc eeŋgopieŋ?”
6Mupie ʒiŋuc jazawec: “Jesajazi burecŋic ŋoŋere hâcne findaŋdâŋ ʒiŋuc qâreŋke‐hâmowec: ‘Ŋicguru ʒi jaŋe micbipiczi sâsecnuhuc maŋjeŋiczi ine qikiŋnueŋgopieŋ.
7Erâ dâŋ fârinere okacne ŋicdâŋ mu qaqazuc ehuc no mai enarepie honepe racne eekac.’
8Ŋoŋe Anuture sâcmutâc dâŋ behepie wahaha ŋicdâŋ basanaŋkerâ bajueŋgopieŋ.”
9Iŋuc murâ muwec, “Mimiŋnefâc‐ŋeŋic jaŋere mumutâc dâŋ qame qoŋgiŋ eniŋte Anuture sâcmutâc dâŋ qâqâsuare mâsi esarickeeŋgopieŋ hâcne, ŋoŋe.
10Mose e dâŋ kecʒiŋuc ŋaza mutâc ewec: ‘Go neŋgoc mamac jahecge sâsec‐jofazemec. Moc e neŋgoc mamac jahec‐ticne mu surec ejacteocmuzi mi juzejec.’
11Ŋoŋe ine ʒiŋuc mueŋgopieŋ: Ŋic moc e mamac‐ticne me neŋgoc‐ticne âzâcneocmu ‘Wiac garehuc dopecguzapo i Anutu taha bacnepemu’;
12iŋuc âzâcneme ŋoŋe dâŋticne basanaŋkehuc, neŋgoc mamac jahec‐ticne jauŋ babajacte irec aka hecneeŋgopieŋ.
13Iŋuc ehuc Anuture dâŋ igockepie raha ŋaŋacne dâŋ mimiŋzi ɋâric baju warekicne i heʒakiepie foekac. Erâ i sawa mâcne, wiac tucnere ijaha eeŋgopieŋ.”
14Iŋuc murâ ŋic mocwâc hefârec‐jopame fisipie ʒiŋuc jazawec: “No dâŋ ŋazape mâmâc sasawa manahuc mana taraniŋ:
15Hobu‐ŋeŋicko wiac huekac izi mi hegâpârec‐ŋopaekac, maŋŋeŋickonec wiac wefuekac izi ine hegâpârec‐ŋopaekac.
16Hazecneheczi dâŋ kecʒi manazejec.”
17Iŋuc murâ ŋic behec‐joparâ ficko feme motec jaŋe dâŋ suŋsuŋne kecirec indiŋkembiŋ.
18Indiŋkepie jazawec, “Hâc, ŋoŋe iŋuc jaha maŋ mamanasu tâmiric juŋgopieŋ? Fuŋne kecʒiŋucte mi manaŋgopieŋ? Hobu‐ŋeŋicko wiac huekac izi wemocko hegâpârec‐ŋopaocmu!
19Izi maŋŋeŋicko mi fotâcneekac, i mâc hobu‐ŋeŋicko hume bâwosâeme hata‐ticnao wahaekac.” Jesu e iŋuc muhuc nânâre dâŋ mufâsâe‐fârewec.
20Erâ moc ʒiŋuc muwec: “Maŋŋeŋickonec wiac wefuekac izi ine hegâpârec‐ŋopaekac.
21Ŋicmaŋkonec wiac kecʒiŋuc wefuekac: Mamanasu mamakâcne, sasec gie, fiuc, ʒika, ŋokac roc behec,
22andac, sindaŋ hârindaŋ, eeatuc, nâareŋ, liŋguuŋ, maricmaŋ gâpâc dâŋ mumu, penaroŋ, maŋmutuc.
23Wiac sâqocne wosekopac izi hâcne maŋŋeŋickonec wefurâ hegâpârec‐ŋopaekac.”
24Jesu e hae mâreŋ i beherâ raku Tiro Sidoŋ hae ŋepicko fisiwec. Fisirâ fic mocko ferâ gâcne jaŋe biŋe‐ticne mi mananiŋte muwec. Erâ wemocko soŋsoŋ juzac.
25Fisi fisiha izia ŋokac moczi biŋe‐ticne manawec. E otâ macticne demoŋ moczi boc ecnewecte ware Jesu maŋfuŋnao fodapewec.
26Ŋokac e Grikŋokac, Sirofoinikia hae mâreŋ irec rune. E otâ‐ticne demoŋ jâpecneocte âzâcnewec.
27Âzâcneme Jesuzi ʒiŋuc muwec: “Naru motec jaŋe qanaŋ nâ gapec eniŋte mukicne. Irec jaŋe wemocko nânâ jowac rorâ qâto behe‐jarezo.”
28Mume ŋokaczi dâŋ ʒiŋuc bâtikiecnewec: “Wofuŋ, i manakopac, erâ qâto jaŋe naru motec jaŋere teboonec nânâ huŋgaŋne wahame sifu mac nâeŋgopieŋ.”
29Eme Jesuzi ʒiŋuc âzâcnewec: “Dâŋ iŋuc mukicte mana‐garekopac, rac, demoŋzi otâge behejec.”
30Eme ŋokac e rarâ ficticnao fisirâ honewec: Otâ‐ticne e demoŋzi beheme fofo‐ticnao niniŋkerâ fowec.
31Jesu e Tiro haeonec risierâ Sidoŋ hae fotâcnerâ wareku Galilaia riqickopec hae 10 ŋerawec ira fisiwec.
32Ira fisihame ŋic qepoŋ nâŋguŋ moc erao jowa rarâ meticnezi bâuaocte numucnembiŋ.
33Numucnepie manarâ ŋic e râricne mocko râeme buc domame memotec‐ticne hazecnao râerâ tâfeckerâ nameŋnao bawec.
34Erâ sambâŋko fime feha nokafe herâ muwec, “Efata”, Kâtedâŋko: Uŋtoc.
35Mume hazecne uŋtowec â nameŋne forisieme dâŋ biaŋne dâŋewec.
36Eme Jesu e biŋe i mi mufuaniŋte mic muac ejarewec. Erâ ejare‐bipieme jaŋe ʒoɋac erâ muromackembiŋ.
37Jaŋe warecke sâqorerâ ʒiŋuc mumbiŋ: “Wiac sasawa bame biaŋke‐fâreekac, wiac gâcne bahuc qepoŋ jaŋere hazec wâc bâuŋtoekac â nâŋguŋ jaŋe dâŋ bâfua‐jareekac.”
