1Eme Jesuzi harierâ riqic moŋgeŋko hurâ miti fuŋkerâ jaza qazuc ewec. Ehame ŋic hâmbâŋ sâko fisi erao tumaŋnepie woke mocko fewec. Eme ŋic moŋgeŋko ŋerahapie e jahacne riqicko woke faio ŋehuc miti jazawec.
2Ehuc kesaicdâŋ fuŋne fuŋne jazahuc moc ʒiŋuc muwec:
3“Ŋazape mananiŋ, ŋic moczi wiac hândâŋne tieocte gieo rawec.
4Rarâ tiehame hândâŋ gâcnezi hatao waha hewec. Ehame wipezi fisirâ nâfârewec.
5Hândâŋne gâcnezi qânâ siec, mâreŋ bocjaha mi fowecko hewec. Ira mâreŋ faisuc sawa fowecte bâpâŋne biac wefuwec.
6Ehame ʒoaŋzi wefurâ qame gâtâne aricnere ɋaŋarâ hâmowec.
7Â hândâŋne gâcnezi hofâ qinʒiŋ ŋondeŋko hewec. Eme âkeʒume hofâ qinʒiŋzi wefurâ hehâmome fârimâc ewec.
8Â hândâŋne gâcnezi ine mâreŋ guecko herâ âkeʒurâ fârine fua sawec ewec. Jâcne mocte hândâŋne 30, mocte 60, mocte 100, fârine iŋuc fuawec.”
9Dâŋ i murâ ʒiŋuc mutarawec: “Hazecneheczi dâŋ kecʒi manazejec.”
10Ŋic ŋokac gâcne rafârepie e jahacne motecfâc â fuŋfuŋfâc‐ticne tucne jaŋe dâŋ irec fuŋnere wiocnembiŋ.
11Wiocnepie muwec, “Anuture uucmaŋko raraʒire dâŋ soŋne i ŋoŋe mananiŋte mukicne, â ŋic râpene juŋgopieŋ jaŋe ine dâŋ suŋsuŋne sawa mananiŋte mukicne.
12Jaŋe ʒâŋe fiipiehuc wiac mi hone taranʒepieŋ â hazec‐jeŋiczi mana‐bipiehuc mi mana taranʒepieŋ â maŋjeŋic mi bârisiepie ine kiŋ fojarezejec.”
13Iŋuc murâ muwec, “Kesaic mupac irec fuŋne mi manaŋgopieŋ me? Eme kesaic dâŋ sasawa mupe weniŋuc mana taraniŋmu?
14“Ŋic hândâŋ tieekac ine miti tieekac.
15Hândâŋne hatao hewec sâc iŋucne juniŋmu jaŋe miti manapie maŋjeŋicko hurâ fohame Sataŋzi biac fisirâ maŋjeŋickonec ro bawiseekac.
16Â hândâŋne qânâ siecko hewec sâc iŋucne juniŋmu jaŋe miti manahuc izia aŋac‐jopame maŋke juniŋmu.
17Erâ maŋjeŋicko gâtâ mi bakicnere dameŋ bembeŋne mac bajuniŋmu. Izi mitire fific guguriŋ â ʒika kâpâcwâru fuame miti beherâ dockeniŋmu.
18Â hândâŋne hofâ qinʒiŋko hewec sâc iŋucne jaŋe miti mamana i mananiŋmu;
19ehame ine mâreŋte wiac irec mamaŋ gugutuŋ ee â moneŋ mafa sâkore aŋac â wiac fuŋne fuŋnere sasec izi maŋjeŋicko hurâ miti hehâmome fârimâc eocmu.
20Â mâreŋ guecko hewec sâc iŋucne jaŋe miti manarâ bajuhuc fârine bâfuaeŋgopieŋ, gâcnezi 30, gâcnezi 60, gâcnezi 100, fârine iŋuc bâfuaeŋgopieŋ.”
21Dâŋ moc ʒuhuckerâ ʒiŋuc jazawec: “Mozi lambe ficmaŋko baferâ kuʒizi hetutuckeocmu, me mozi ŋeŋe rurumaŋko heocmu? Aricne, ŋeŋe‐ticnao hepene ŋehuc tamaeocmu.
22Wiac soŋsoŋ fokac i foku mi foocmu, i bataniŋkezo, â wiac hemackekicne fokac i foku mi foocmu, i qaratie‐fârezo.
23Hazecneheczi dâŋ kecʒi manazejec.”
24Iŋuc murâ muwec, “Ŋoŋe dâŋte ruc banʒepieŋ. Ŋaŋac wiac ehuc sâc bâfuaniŋmu, sâc ijaha risie‐ŋareocmu, erâ i sawa mâcne, fehuc risie‐ŋareocmu.
25Moc e wiac râcnekicne bajume kiqecnecnezo, â moc e wiac râcnekicne mi bajume jâoc rozo.”
26Jesuzi dâŋ moc kecʒiŋuc muwec: “Anuture miti hata irec fuŋne ʒiŋuc: Ŋic moczi gieo wiac hândâŋne tieocmu.
27Erâ ŋafeo â ʒoaŋko ju fofo ehame hândâŋ i âkeʒurâ wefuocmu, ŋic e fuŋne hone manac mi eha.
28Mâreŋ e jahac hândâŋ gume hesiwiŋ ecneme âkeʒume qanaŋ bâpâŋ wefuekac, izi rehacne heekac, izi fârine râeekac.
29Fârine wozeme qa roro eocmu, fâri roro dameŋ maickekac hâcne.”
30Dâŋ moc ʒuhuckerâ kecʒiŋuc muwec: “Anuture miti hata i wemo wiachec sâc hepe me wemo wiacko iticnerâ mupe?
31I nemuja hândâŋ iŋucne. Hândâŋ i piticne, jâchândâŋ gâcne irec wahamicne.
32Erâ sifu, mâreŋko râepene fua sokac erâ wiac nâkicne gâcne jâururâ jâcsâko eekac. Ehuc tieŋne heme sawa wipe jaŋe fisi mumucnao sâcne herâ ŋeeŋgopieŋ.”
33Jesu e kesaic dâŋ fuŋne fuŋne muhuc miti jaza jujec. Ehuc mamana‐jeŋicte sâc jazawec.
34Â mutaniŋkerâ jajaza ine mi jaza jujec. Mâc motecfâc‐ticne jaŋehec bucko juhuc fuŋne mufuarâ jaza jujec.
35Eme ʒoaŋ gie bapa ijaha hae owâeme motecfâcne ʒiŋuc jazawec: “Nâŋâc riqic ocniŋucnao raʒinaŋ.”
36Jazame jaŋe ŋic guru sâko behec‐joparâ acmâc jaha wokeckerâ rambiŋ. Rapie woke gâcne bâbâjâpec rambiŋ.
37Rahapie mâŋâŋ hâhâwicne fisirâ qame sirizi wokemaŋko hurâ fusezo ewec.
38Ehame Jesu jahacne woke ʒâhecnao fofoo guŋ fowec. Eme motecfâcne jaŋe wiwickerâ ʒiŋuc âzâcnembiŋ: “Qaqazu, riqicko huzo eŋgopeneŋ irec mi mezacgukac me?”
39Mupie ɋârerâ mâŋâŋ muackehuc riqic ʒiŋuc âzâcnewec: “Go niniŋkerâ foc.” Mume mâŋâŋ niniŋkeme benoŋ fuawec.
40Eme motec ʒiŋuc jazawec: “Ŋoŋe wemocte hâwic sahac eŋgopieŋ, mamanasiŋ‐ŋeŋic moc mi fokac me?”
41Eme jaŋe bipic tatara ejareme nazaŋ gazaŋ erâ mumbiŋ, “E ŋic mo iŋucne, irec mâŋâŋ â riqic jahe micne reŋkekopirec!”
