1Goreŋ sowa juhuc aakic hombaŋ ŋeniŋte dameŋ Neŋgocgieo maickewec. Ehame irec juwicnao Mituâcko taha bapa micne â miti qaqazu jaŋe Jesu soŋsoŋko rorâ qaniŋte dâŋ mumockembiŋ.
2Ehuc ʒiŋuc mumbiŋ: “Hombaŋkoa misac, ŋic bâiŋ‐jopapene ʒika kosa fuazackohec.”
3Jesuzi Betania haeo Simoŋ wicsanaŋ ecnewec ere ficko ferâ ŋewec. Ira nânâ nâhuc ŋehame ŋokac moczi opâ âsu biaŋ furi sâko kiruŋnehec baferâ qizec‐ticnao furu jaha hesieme ruacnewec.
4Ruacneme ŋic ŋembiŋ jaŋeraonec tucnezi mu takic erâ mumbiŋ, “Wiac furi sâko wemocte sipirickekac?
5Opâ âsu biaŋ izi siliwa moneŋ 300 kitâcneme ŋic hapetac jarepene sâckezac me!” Iŋuc muhuc ŋokac dâŋ ɋeŋɋeŋne ecnembiŋ.
6Mupie Jesuzi manarâ ʒiŋuc jazawec: “Ŋoŋe ŋokac e beheniŋ, wemocte mumu hehec ecneŋgopieŋ? Ŋokac e jauŋ bacnume biaŋkekac.
7Ŋic hapetac dameŋ sâc ŋoŋerao juhapie jauŋ bacjopazo murâ bacjopanʒepieŋ, noni ine ŋoŋerao boc mi jupemu.
8Ŋokac e eesâc‐ticne enarekac. No biac hâmope ducnuniŋmu, irec sahac‐nane qanaŋ mâzockekac.
9No jâmbomac ŋazape: Biŋebiaŋ mâreŋne mâreŋne mupie haŋ baocmu sâc, ŋokac kecʒi mâzocnukac ere manasuhuc biŋe‐ticne mâmâc mupie haŋ baocmu.”
10Eme motec jaŋere âgo moc ʒâŋene Juda Karioto haeonec, eki taha bapa micne jaŋerao rarâ Jesu doc bajareocte mufua‐jarewec.
11Iŋuc eme manarâ bujeŋic biaŋkeme furine moneŋ râcneniŋte mumbiŋ. Eme i manarâ Jesu kamierâ doc baocte hone jâjâpehuc juwec.
12Goreŋ sowa juhuc aakic lama hezu rikec ezore dameŋ maickeme motec jaŋe Sekiqanâcko Jesu wiocnerâ mumbiŋ, “Aakic lama fic wena rike bâmoc egarenʒepeneŋ?”
13Iŋuc mupie motec jajahec ʒiŋuc jasahuc sorec‐jofawec: “Ŋohe haeo ferâ ŋic moc opâ râqâchec bâfuarâ bâjâpenic,
14erâ ficko feme ferâ fic rune ʒiŋuc âzâcnenic: ‘Qaqazu e gore ʒiŋuc mukac, fic maŋne wena motecfâc‐nane jaŋehec aakic lama nanaŋmu?’
15Iŋuc âzâcnepire fic maŋne kâcɋene moc ŋeŋe fofo wiac rumacke emasaŋ ekicne i ŋofatume ira aakic lama rike bâmoc ezepirec.”
16Eme motec jahec dâŋ i reŋkerâ haeo raferâ Jesuzi muwec sâc i bâfuarâ aakic lama rike bâmoc epic.
17Eme hae ŋafeme e motecfâcne 12 jaŋehec fic maŋne ira fisimbiŋ.
18Eme teboo nânâ nâhuc Jesuzi ʒiŋuc jazawec: “No jâmbomac ŋazape: Ŋoŋeraonec moczi no doc bacnuocmu, nohec nânâ nâhuc ŋeŋgopieŋ ŋoŋeraonec moczi hâcne.”
19Mume motec jaŋe bujeŋic sâqoreme buc buc wiocnehuc mumbiŋ, “Go nore wiac moc murâ?”
20Wiocnepie jazawec, “Motec 12 ŋoŋeraonec moczi nohec poroŋ sicko âke uruckerâ nakac eki hâcne.
21Ŋic Fâri Wâtuŋne e mitio hata muʒâwecnekicne ira razo ekac hâcne. Â Ŋic Fâri Wâtuŋne doc baocmu e ine, jei, okacne mo iŋucne roocmu! Ŋic e neŋgoc bumaŋkonec mi fuame muzac, afeckecnezac.”
22Eme tiwâ nârâ Jesuzi poroŋ rorâ jambuŋkerâ motecfâcne ʒiŋuc muhuc jarewec: “Ro nâniŋ, kecʒi fâri‐nane.”
23Iŋuc murâ waiŋ râqâc rorâ daŋge murâ jareme mâmâc sasawa nâmbiŋ.
24Nahapie jazawec, “Ŋoŋehec ʒâʒâfic ezore socnane keci hâcne, i ŋic bocjaha ŋoŋere erâ qikiŋnekicne.
25No jâmbomac ŋazape: No waiŋ opâ mocwâc mi nânâ juku Anuture uucmaŋko waiŋ opâ fuŋmoc nâzokopac.”
26Eme gae herâ haeonec rahurâ ocniŋuc Oliwa tikio fembiŋ.
27Fehuctecne Jesuzi ʒiŋuc jazawec: “Ŋoŋe mâmâc sasawa miŋecgac nore manapie sâqoreocmu. Dâŋqâreŋ moc ʒiŋuc fokac i sanaŋkeocmu: ‘No soŋaŋ qape lama jaŋe siŋsaŋ qaniŋmu.’
28Eme hâmockonec faharerâ ine Galilaia mâreŋko rahuc bânie‐ŋarepemu.”
29Iŋuc mume Petorozi ʒiŋuc âzâcnewec: “Jaŋe mâmâc sasawa gore manapie sâqoreocmu mecne, â no ine iŋuc mi egarepemu.”
30Mume Jesuzi ʒiŋuc âzâcnewec: “No jâmbomac gazape: Miŋecgac ŋafeo qâqâczi jajahec mi dâŋeha go jahec â moc mic bacnucmu.”
31Mume Petoro qizec qarâ muwec, “Go gahacne guhuc no mâmâc nuzo mupie sifu mi mic bacgupemu.” Mume motec âgofâcne bafickerâ ijaha mufârembiŋ.
32Eme raku jufu mocko fisimbiŋ, ʒâŋene Gezemane. Ira fisirâ motec ʒiŋuc jazawec: “Ŋoŋe ʒira ŋehapie no ocna rarâ numupe.”
33Iŋuc murâ Petoro, Jakobo â Johane rocjopame rahuc hâhâwic fuŋkerâ me kike tatara ecnewec.
34Iŋuc ecneme jazarâ muwec, “Maŋnane hâhâtâweme hâhâmocne enarekac, irec ŋoŋe ʒira ŋehuc nohec mâmâc maŋɋâri juniŋ.”
35Iŋuc murâ ipec rarâ ʒâŋe maine mâreŋko hetutuckerâ ʒâic dameŋ i Mamacnezi maname eene eha rireocte numuwec.
36Ehuc ʒiŋuc muwec: “Mamac‐nane, go wiac moc mi bâipieekiczi mutec ʒâic guru kecʒi nowaruzejec. Erâ sifu nore dâŋ mâcne, gore dâŋ sanaŋkezejec.”
37Iŋuc murâ risierâ guŋ fohapie honec‐joparâ Petoro ʒiŋuc âzâcnewec: “Simoŋ, go wemocte guŋ fokomec? Go piticne ɋâricne sâcne mi junʒaŋ me?
38Eesâicko dockenʒipiŋte maŋɋâri juhuo numuniŋ. Maŋzi afeckekac â sahaczi ine ŋemâckekac.”
39Iŋuc jazarâ mocwâc rarâ, mârâc numuwec ijaha numuwec.
40Numurâ risierâ guŋ jaha fopie honec‐jopawec. Jaŋe guŋkonec fi qeruruc erâ wemocko afeckerâ dâŋ moc âzâcnenʒapiŋ.
41Eme mocwâc ra numurâ risiehame jahec â moc eme jazawec, “Ŋoŋe guŋ jaha fohuc fomanaŋgopieŋ me? Ʒi sâckekac. Ŋic Fâri Wâtuŋne e sâqocne bapa jaŋere meo feocte dameŋne maickekac.
42Faharepie ranaŋ, docbapazi bâqiŋnukac ine.”
43Iŋuc jazahuc domahame izia motec âgo‐jeŋic moc, Juda Karioto haeonec, eki râsi guru micne bajareme ɋeŋfâfâc jaha fisimbiŋ. Taha bapa micne, miti qaqazu â soŋaŋ jaŋe sorec‐jopapie ʒika ɋaruc wiac barâ fisimbiŋ.
44Docbapa eki ine madâŋ qanaŋ ʒiŋuc jazawec: “Muduckepe honerâ ine hâcne muhuc deŋnea ro basanaŋkerâ barâ ranʒepieŋ.”
45Eme fisirâ izia Jesurao rarâ “O Qaqazu‐nane” muhuc muduckewec.
46Iŋuc eme honerâ rorâ basanaŋkembiŋ.
47Ehapie motec domambiŋ jaŋeraonec moczi ʒika‐ticne unuckerâ taha bapa sâkore kiŋaŋ motec qaocte hazecne qatarawec.
48Eme Jesuzi ʒiŋuc jazawec: “Ŋoŋe nore manapie ʒika qaqa eme ʒika ɋaruchec fisirâ rocnuŋgopieŋ me?
49No ʒoaŋne ʒoaŋne taha ufuŋko ŋic miti qazu‐jarehuc juekopac, ehame ŋoŋe ira mi rocnumbiŋ. Erâ sifu enarepie miti papiao nore dâŋqâreŋ fokac i sanaŋkezejec.”
50Eme mâmâc sasawa beherâ wise‐fârembiŋ.
51Ehame ŋicmotec moc qoruc qaŋqaŋ‐ticneheczi e bâjâpehame rombiŋ.
52Ropie qoruc hetararâ biuctac wisewec.
53Jaŋe Jesu rorâ taha bapa sâkore ficko barambiŋ. Ere ficko hâcne taha bapa micne â soŋaŋ â miti qaqazu tumaŋne‐fârembiŋ.
54Eme Petoro e taic taic bâjâpehuc taha bapa sâkore sacmaŋko raʒiwec. Raʒirâ kiŋaŋŋic jaŋere ŋondeŋko ŋehuc ʒoc ruawec.
55Eme taha bapa micne â micne guru jaŋe gupe sioc bâfuarâ qorickehuc ʒikao râeniŋte mu basac ehuc ŋembiŋ.
56Eme ŋic bocjahazi mu âke hotac dâŋ mupie hatane guguru ewec.
57Mukupie ŋic jahec maczi fuarâ dâŋ burec kecʒiŋuc mumbiŋ:
58“Nâŋe ʒiŋuc mume manambeŋ: ‘No taha ufuŋ mezi bapa kecʒi heropierâ ʒoaŋ jahec â moc eha mezi mi bapa mâc mupe fuaocmu.’”
59Erâ dâŋ i mupie sisifucne ewec wâc.
60Ekupie taha bapa sâkozi faharerâ mai jaha domahuc Jesu indiŋkerâ muwec, “Go ŋifecne mi mukic me? Ʒi jaŋe gore dâŋ muŋgopieŋ i manatec weniŋuc ekac?”
61Mume Jesuzi micnao mi rohuc dâŋemâc domawec. Eme harierâ taha bapa sâkozi wiocnerâ muwec, “Go Kristo, muteŋ bâteŋ ecneeŋgopeneŋ ere Ŋokâ me mâcne?”
62Eme Jesuzi muwec, “Ine hâcne mukomec. Erâ moc ŋazape mananiŋ: Juku Ŋic Fâri Wâtuŋne e tâpiri rune ere ŋifecko domahuc sambâŋte karorac faio fisime hone ʒâirenʒoŋgopieŋ.”
63Iŋuc mume taha bapa sâkozi dâŋ i maname gâpâreme ŋaqi‐ticne bâsuckehuc ŋicfâc‐ticne jazawec, “Dâŋ wemocte mocwâc muzo?
64E Anutu âkehockehuc sâckekacte manarâ weniŋuc muŋgopieŋ?” Eme jaŋe micne mic sâc musereckerâ mumbiŋ, “E ʒikare biŋe ekac.”
65Iŋuc murâ gâcnezi tâfeckembiŋ â gâcnezi ʒâŋe maine bâsoŋkerâ mehuhuŋzi qahuc mumbiŋ, “Go porofete jukomecko fuŋnege bataniŋkec.” Eme kiŋaŋŋic jaŋe iŋuc jaha rorâ me tatapezi qambiŋ.
66Eme Petoro e juwic sacmaŋko juhame taha bapa sâkore kiŋaŋ naru moczi fisiwec.
67Fisirâ Petoro ʒoc ruahuc ŋeha honerâ hone dendeŋnehuc âzâcnewec, “Go Nazarete haeonec ŋic Jesu ehec hâcne mâmâc juekopirec.”
68Mume Petorozi mickehuc muwec, “Go dâŋ weniŋuc mukomec? Mutecne kâuc bakopac.” Iŋuc murâ motâcko huzo ehame qâqâczi dâŋewec.
69Ehame kiŋaŋ naru e ira mocwâc bâfuarâ ŋic domambiŋ ʒiŋuc jazawec: “Ŋic keci e jaŋere guruonec.”
70Eme eki harierâ mic bawec. Eme dameŋ mi ʒoraha ŋic domambiŋ jaŋe mocwâc âzâcnembiŋ, “Â go jâmbomac jaŋeraonec, go Galilaia ŋic.”
71Mupie e jahacne sahac mu qaisoc ecneku Anuture maio mupaŋkerâ muwec, “Ŋic ʒâŋene muŋgopieŋ e mi hone‐jâmbâŋkeekopac.”
72Mume izia qâqâczi dâŋeme jajahec ewec. Eme Jesuzi dâŋ ʒiŋuc âzâcnewec, “Qâqâczi jajahec mi dâŋeha goki jahec â moc micnucmu”, dâŋ i manasurâ bune herickeme kio sâqorewec.
