1Jesu e irecnec wahaku Judaia mâreŋko Jordaŋ ocniŋucnao fisiwec. Ira juhame ŋic hâhâwicne jâmbâŋ ŋetararâ mocwâc fisimbiŋ. Eme ejujec iŋuc harierâ miti jaza qazuc ewec.
2Ehame farisaio jaŋe wiocnerâ mumbiŋ, “Ŋic moczi ŋonâŋ‐ticne beheme sâckeocmu me mâcne?”
3I mâc esâickehuc mupie okacne ʒiŋuc wio‐jarewec: “Mose e irec dâŋ weniŋuc mufua‐ŋarewec?”
4Eme jaŋe mumbiŋ, “Ŋonâŋ moc behezo murâ pasi râcnehuc sorezo. Mose e irec mana‐nârewec.”
5Mupie Jesuzi ʒiŋuc jazawec: “Mose e maŋsanaŋ‐ŋeŋicte erâ sâcmutâc dâŋ i qâreŋke‐ŋarewec.
6Erâ fufuŋkenao Anutuzi ŋic bâfuac‐jopaocte ŋic â ŋokac râec‐jofawec.
7Eme irec hâcne ŋic moczi neŋgoc mamac jahec‐ticne behec‐jofarâ ŋonâŋ‐ticnerao qohotame
8jahe maŋsahac mocjaha erâ junicmu. Dâŋ iŋuc fokacte jahe jajahec mâcne, jahe mocjaha erâ jukopirec hâcne.
9Anutuzi bâturec‐jofawec i ŋiczi mi bârâwiŋ‐jofazo.”
10Eme ficko fisirâ motec jaŋe Jesu irecteaŋ mocwâc wiocnepie
11fuŋne ʒiŋuc jazawec: “Ŋic moczi ŋonâŋ‐ticne beherâ moc baocmu, e ŋokac sahacko râec ecnehuc ʒuhuc bâtâcte kiŋsâko hureocmu.
12Â ŋokac moczi ŋowe‐ticne beherâ moc baocmu, e iŋuc jaha ʒuʒuhuc‐jekic bâtâcnehuc kiŋsâko hureocmu.”
13Eme ŋic ŋokac jaŋe ɋiefâc‐jeŋic Jesurao amec‐jopa rarâ mezi bâuac‐jopaocte mupie motec jaŋe hâhâwic hejarembiŋ.
14Iŋuc epie Jesuzi maname sâqoreme ʒiŋuc jazawec: “Ŋoŋe behehapie ɋie jaŋe norao wareniŋ, aka mi hejareniŋ. Iŋucne jaŋe hâcne Anuture uucmaŋ biŋe qajarekicne.
15No jâmbomac ŋazape: Moc e ɋie jaŋere sâc ehuc Anuture uucmaŋ mi biŋeckeocmu e maŋnao mi raʒiocmu.”
16Iŋuc murâ totoc‐jopahuc meticne qizec‐jeŋicko râerâ jambuŋ‐jopawec.
17Jesu e mâreŋ i beherâ razo ehame ŋic moczi gasackerâ Jesurao fisirâ maŋfuŋnao fodapehuc wiocnewec, “Qaqazu biaŋ, no weniŋuc erâ juju sanaŋte biŋe epemu?”
18Mume Jesuzi ʒiŋuc âzâcnewec: “Biaŋne wemocte munarekomec? Biaŋne rune Anutu mocjaha.
19Erâ go sâcmutâc dâŋ manaekic, kecʒiŋuc: Go ʒika mi qazemec, ŋowe ŋonâŋ ŋohe bebehec mi ezepirec, go fiuc mi rozemec, go micko âkec mi ezemec, go ŋic wiac kâŋgâc mi jowac rozemec, go neŋgoc mamac jahecge sâsec‐jofazemec.”
20Iŋuc muhuc âzâcneme ŋic e muwec, “Qaqazu, no i sasawa ɋie‐naneonecteaŋ reŋke warehuc juekopac.”
21Eme Jesuzi honerâ ere ecneme âzâcnewec, “Mocjaha fokac, i ezemec, go rarâ moneŋ mafa wiacge ŋic hapetac qikiŋne‐jarezemec. Eme sambâŋko boreŋ ʒeŋaŋ fua‐gareocmu. Erâ ware bâjâpecnuzemec.”
22Jesuzi iŋuc muhuc âzâcneme ŋic e bune sâqoreme mana ŋemâckerâ rawec, e moneŋ mafa ɋâfoŋne focnewec irec.
23Rame Jesuzi fotikierâ motecfâcne honec‐jopahuc jazawec, “Moneŋ mafa sâkoheczi Anuture uucmaŋko raʒiniŋte ququŋkenehec eekac.”
24Eme motec jaŋe dâŋ i manarâ fâfârepie harierâ jazawec, “Motecfâc‐nane, Anuture uucmaŋko raraʒi i wiac ŋemâcne.
25Kamelezi buŋic hawecnao raraʒi i wiac afecne, â moneŋ mafa sâkoheczi Anuture uucmaŋko raraʒi i wiac ŋemâcne.”
26Iŋuc mume manarâ weaŋkerâ mumbiŋ, “Hâc, eme mozi Anuture uucmaŋko raʒiocmu?”
27Mupie Jesuzi honec‐joparâ muwec, “I ŋiczi eene mi fokac, erâ sifu Anutuzi wiac i me i hatane bâfuaocte mi quŋkeocmu.”
28Petorozi dâŋ i manarâ Jesu ʒiŋuc âzâcnewec: “Manakic, nâŋe wiac‐nâŋec sasawa râpecke‐fârerâ go bâjâpecgumbeŋ.”
29Eme Jesuzi muwec, “No jâmbomac ŋazape: Moc e fic hae, hahac ɋa, seŋ qo, neŋgoc mamac, naru motec, jufu mumuc nore erâ â Biŋebiaŋte erâ beheocmu,
30e okacne wiac qame hukicne jâmbâŋ raʒime raʒi roocmu. Ʒira mâreŋko fic hae, hahac ɋa, seŋ qo, neŋgoc, naru motec, jufu mumuc wiac i fific guguriŋ faio okacne fuacneocmu, erâ juku ʒâhec dameŋko juju sanaŋ rauckeocmu.
31Erâ ine bâbâni jaŋeraonec bocjahazi ʒâhec eniŋmu â ʒâhec jaŋeraonec bocjahazi bâbâni eniŋmu.”
32Jaŋe Jerusalem haeo feniŋte rambiŋ. Ehuc Jesuzi bânie‐jarehuc irapec rame wareckembiŋ. Â bâjâpec‐jopambiŋzi hâwic sahac jumbiŋ. Eme Jesuzi motecfâcne 12 mocbuc qâzuc‐joparâ wiac fuacneocmu irec dâŋ mufua‐jarehuc ʒiŋuc muwec:
33“Manaŋgopieŋ, nâŋâc Jerusalem haeo feŋgopeneŋ. Eme ira Ŋic Fâri Wâtuŋne e taha bapa micne â miti qaqazu jaŋere meo feme jaŋe hâmoocte qâpuc jaŋerao râeniŋmu.
34Eme jaŋe mu âke sisic ecnehuc tâfeckerâ becsahac biriŋneheczi qa qâʒâic ecnerâ qâhâmoniŋmu. Eme ʒoaŋ jahec â moc eha mocwâc ɋârerâ fahareocmu.”
35Eme Ʒebedaiore motec jahec Jakobo â Johane jahe Jesurao rarâ mupic, “Qaqazu, nâhe wiac irec me irec numu‐garepere enâctecmurâ numukoperec.”
36Mupire wio‐jactewec, “Weniŋuc eŋactepere mukopirec?”
37Eme jahe mupic, “Go manatecne juku tâpiri huririgao nâhe gâjoŋgao ŋifec â ŋifec ŋezeperec.”
38Mupire Jesuzi ʒiŋuc jasawec: “Ŋohe fuŋne kâuc bahuc iŋuc mukopirec. No opâ ʒaʒacne nâpemu i ŋohe sâcne nânicmu, â opâ fârone ruapemu i ŋohe sâcne ruanicmu me?”
39Mume jahe mupic, “Ea, sâcne enacmu.” Mupire Jesuzi ʒiŋuc jasawec: “Noni opâ nâpemu i ŋohe jâmbomac nânicmu, â opâ ruapemu i ŋohe ruanicmu wâc.
40Erâ gâjoŋ‐naneo ŋeŋe irec dâŋ mumu ine norao mi fokac, irec biŋe qajarekicne i jaŋe ŋeŋe ira ŋeniŋmu.”
41Iŋuc epire motec gâcne jaŋe Jakobo â Johane mana‐jactepie sâqorewec.
42Eme Jesuzi hefârec‐joparâ ʒiŋuc jazawec: “Mâreŋ ŋicwofuŋ jaŋe ŋic rauc‐jopahuc kiŋaŋ qaqafâc‐jeŋic bacjopa jueŋgopieŋ â fekicne jaŋe omane qâhuc‐joparâ ŋicbomboŋ ejareeŋgopieŋ i manaeŋgopieŋ.
43Â ŋoŋerao ine iŋuc mi fuazejec. Ŋoŋeraonec moczi fekicne ezo murâ âgofâc‐ticne jaŋere kiŋaŋ qaqa juzejec.
44Â ŋoŋeraonec moczi micne‐ŋeŋic ezo murâ âgofâc‐ticne jaŋere gie bapa ŋic juzejec.
45Wemocte? Ŋic Fâri Wâtuŋne e ŋoŋe kiŋaŋ qacneniŋte mi wahawec e jahac kiŋaŋ qaqa gie bahuc ŋic bocjaha kiwiric‐jeŋic rora juju‐ticne qikiŋneocte wahawec.”
46Jesu motecfâc jaŋe raku Jeriko haeo fisimbiŋ. Eme hae i fotâcnerâ rapie râpefuŋ‐jeŋicko ŋic guru sâko mâmâc rambiŋ. Ehame hatamecko ŋic tiŋtuŋ hapetac jâmbâŋ moc ŋewec, ʒâŋene Batimaio, Timaiore ŋokâ.
47Eme eki Jesu Nazarete haeonec ware rakac mupie manarâ fâfâcnehec wirahuc muwec, “Jesu, go Dawidire ɋâriczi nore mac buge sâqoreoc!”
48Boc wirame ŋic jaŋe niniŋkerâ ŋeocte mu hâhâwic ecnembiŋ. Eme eki dâŋjeŋic mana takirehuc fotarierâ wirawec, “Go Dawidire ɋâriczi nore mac buge sâqoreoc!”
49Wirakume Jesuzi manarâ hatao domahuc muwec, “Ecnepie wareoc.” Mume ŋic jaŋe tiŋtuŋ wiracnehuc mumbiŋ, “Sahacge âke urueme fahare warec, hefârecgukac.”
50Eme tiŋtuŋzi dâŋ i manarâ izia bilaŋke‐ticne hetararâ furutuc herâ faharerâ Jesurao rawec.
51Ra fisime ʒiŋuc muhuc wiocnewec: “Wemo egarepemurâ mukic?” Eme tiŋtuŋzi muwec, “Qaqazu‐nane, no ʒâŋe fifihec epemurâ enarekac.”
52Mume Jesuzi ʒiŋuc âzâcnewec: “Go rac, mamanasiŋgere biaŋkekomec.” Muha izia ʒâŋe fifihec erâ Jesu bâjâperâ rawec.
