1Eme raku Jerusalem hae bâqiŋkezo ehuc Oliwa tikio Betefage â Betania hae ŋepicko fisimbiŋ. Ira fisirâ Jesuzi motec jajahec
2sorec‐jofahuc muwec, “Hae raecko ŋekac ira ranic. Raferâ izia doŋgi motecne niŋgiŋko domakac i bâfuanicmu. Motecne i ŋiczi fainao mi ŋekicne furune. Eme i bâfuarâ firuerâ bawareniŋ.
3Firuepire ŋic moczi, wemocte rokopirec, mume ʒiŋuc muhuc âzâcnenic: ‘Wofuŋ‐nâheczi irec mukac, erâ biac mocwâc râeme wareocmu.’”
4Iŋuc muhuc jasame motec jahec rarâ doŋgi motecne ficmotâcko mai jaha niŋgiŋko domame bâfuarâ firuepic.
5Firuepire ŋic domambiŋ jaŋe honec‐jofarâ mumbiŋ, “Hâc, mozi mume rokopirec?”
6Mupie Jesuzi dâŋ jasawec i jazapire manapie tarawec.
7Eme Jesurao bararâ fainao ŋaqi‐jeŋic râepie eki ferâ ŋewec.
8Eme ŋic bocjahazi ŋaqi‐jeŋic hatao rumacke rambiŋ â tucnezi gieonec ʒariŋ bazurâ râe rambiŋ.
9Eme ŋic guru sâko roʒâc bâʒâŋiŋ ecnembiŋ jaŋe kecʒiŋuc muhuc ofac hecnembiŋ: “Ohec, Wofuŋte micte ware‐nârekomec go mumbiaŋgunaŋ.
10Apa‐nâŋec Dawidi ere guriŋ bapa risie‐nârekacte ʒerienaŋ. Ohec, Anutu fâic sambâŋko.”
11Iŋuc ecnehapie Jerusalem haeo fe fisirâ Jesuzi taha ufuŋko raʒiwec. Raʒirâ wiac sasawa hone manac efârerâ hae biac owâeme waharâ motecfâc‐ticne 12 rocjopame Betania haeo fembiŋ.
12Hae fureme jaŋehec Betania haeonec wahahuc Jesu nânâre hâmowec.
13Ehuc fime rame jâmbo jâcne moc rehacnehec honerâ fârine ŋekac muhuc ra basawec: Fârine fufua dameŋ mi maickewecte rehacne sawa domawec.
14Iŋuc honerâ jâc ʒiŋuc âzâcnewec: “Goraonec fârine nânâ i ŋic moczi mocwâc mi nâjâmbâŋkezejec.” Eme dâŋ i motecfâcne jaŋe manambiŋ.
15Eme Jerusalem haeo fembiŋ. Eme Jesuzi taha ufuŋko ferâ ŋic ira wiac nareŋ gareŋ ehuc domambiŋ jaŋe jâpec‐joparâ moneŋ katapa‐jeŋic â hapâ ŋeŋe herândiŋkewec.
16Erâ taha ufuŋko wiac iŋucne moc ba rac warec mi eniŋte muac‐jopawec.
17Iŋuc ejarerâ dâŋ ʒiŋuc jazawec: “Dâŋqâreŋ kecʒiŋuc fokac: Ficnane i mâreŋ sâc ŋic jaŋere nunumu fic ezejec. Ŋoŋe ine epie fiuc sindaŋhec jaŋere qânâuŋ tinac ekac.”
18Iŋuc eme taha bapa micne â miti qaqazu jaŋe honerâ, weniŋuc erâ qapene arictac ezejec muhuc nazaŋ gazaŋ embiŋ. Erâ fuŋne ʒiŋucte ere hâwic‐jopawec: Ŋic mâmâc sasawa miti‐ticnere manapie bipine sâkohec ewec.
19Eme Jesu â motecfâcne jaŋe hae owâeme sâc hae sâko beherâ rahuc jumbiŋ.
20Hae fureme jâmbojâc domawecko mocwâc ra fisirâ honembiŋ: Jâc hâmo bâŋeŋ erâ domawec.
21Eme Petorozi honerâ Jesu dâŋ muwec i manasurâ âzâcnewec, “Qaqazu honec, jâmbo jâc sâweckemec e ururuckejec domakac.”
22Mume Jesuzi ʒiŋuc jazawec: “Ŋoŋe Anutu manasiŋkehuc junʒepieŋ.
23No jâmbomac ŋazape: Moc e tiki kecocni hockerâ hâwecko huc âzâcneocmu, ehuc mupe sanaŋkeocmu me mâcne, maŋjahec iŋuc mi erâ manapaŋkehuc muocmu, i fârine fuaocmu.
24Irec ŋazape mananiŋ: Ŋoŋe wiac irec me irec manasurâ numuniŋmu, ine biac roŋgopeneŋ muhuc mana ʒakiepie fua‐ŋareocmu.
25Erâ numuzo murâ ŋic mocte kiŋtofa bajuŋgopieŋko behenʒepieŋ. Iŋuc epie sambâŋ Mamac‐ŋeŋiczi iŋuc jaha ŋoŋere kiŋtofa beheocmu.
26Me ŋoŋe ŋic jaŋere kiŋtofa bajupie sambâŋ Mamac‐ŋeŋiczi iŋuc jaha ŋoŋere kiŋtofa bajuocmu.”
27Jesu motecfâc jaŋe mocwâc Jerusalem haeo risiembiŋ. Risierâ Jesuzi taha ufuŋko ferâ juhame taha bapa micne â miti qaqazu â soŋaŋ erao fisirâ
28indiŋkerâ mumbiŋ, “Go ʒira wiac eekic i more micte eekomec? Mozi iŋuc ecmurâ mugareme eekomec?”
29Esâickepie dâŋ ʒiŋuc bâtikie‐jarewec: “No dâŋ mocjaha sawa wio‐ŋarepe nazapie noni iŋuc jaha more micte wiac eekopac i okacne ŋazapemu.
30Johane Miti Opâ gie‐ticne i wenirec fuawec, sambâŋkonec me ŋickonec? Mupie manape.”
31Iŋuc jazame jaŋackoaŋ ʒiŋuc muhuc nazaŋ gazaŋ embiŋ: “Nâŋâc sambâŋkonec fuawec iŋuc mupene muocmu ‘Hâc, eme wemocte dâŋticne mi mana ʒakiembiŋ?’
32Me ŋickonec fuawec iŋuc moc munaŋ?” Erâ iŋuc muniŋte ŋic jaŋere hâwic‐jopawec. Jaŋe ʒeŋgoma Johanere manapie porofete jâmbâŋ ewec.
33Eme Jesu ʒiŋuc âzâcnembiŋ: “Nâŋe mi manaŋgopeneŋ.” Mupie Jesuzi ʒiŋuc jazawec: “Wiac murâ sâcne, eme noni iŋuc jaha more micte ʒira wiac eekopac okacne wâc mi ŋazapemu.”
