Mareko 16

1

2

3

4

5

6

7

8

9

10

11

12

13

14

15

16

¹Owâ ririŋte sabata hombaŋ taraha Maria Madala haeonec â Maria Jakobore neŋgoc â Salome jaŋe Jesure qâŋɋâŋ ruacneniŋte wokemaŋ âsu biaŋ â kâŋâ furine barâ bâmockembiŋ.

²Erâ Sonda hae fufurecte rarâ ʒâŋeruŋko fisihapie ʒoaŋ wefuwec.

³Eme ʒâŋeruŋ bâqiŋkehuc nazaŋ gazaŋ erâ mumbiŋ, “Ʒâŋeruŋ motâckonec qânâ mozi qârândiŋke‐nâreocmu?”

⁴Iŋuc murâ ʒâŋe fipie rame honembiŋ: Qânâ e wiac sâkozi qârândiŋkekicne fowec.

⁵Eme ʒâŋeruŋ aaŋ fome honerâ raʒirâ fâreopec ŋicmotec moc ŋaqi ʒora qaŋqaŋ rodomame honerâ mâretec fâfârembiŋ.

⁶Eme ʒiŋuc jazawec: “Mi fâfâreniŋ, ŋoŋe Jesu Nazarete rune maripoŋko qakicne honeniŋte wareŋgopieŋ. E ʒira mi fokac, e faharejec; fofotacne ʒi honeniŋ.

⁷Ŋoŋe rarâ motecfâc‐ticne â Petoro jazaniŋ. E Galilaia mâreŋko bânie‐ŋareocte ŋazawec ira rarâ honeniŋmu.”

⁸Mume ŋokac jaŋe hâwic‐jopa sâqoreme ɋarac ɋarac qahuc ʒâŋeruŋkonec wefu gagasac jaha wiserâ rambiŋ. Erâ maŋjeŋic gâckeme ŋic wemocko biŋe moc jazanʒapiŋ.

⁹Jesu e Sonda hae fufurecte faharerâ qanaŋ Maria Madala haeonec mârâc demoŋ 7 jâpecnewec e fuacnewec.

¹⁰Fuacneme rarâ fuŋfuŋfâc‐ticne ki busâqoc ehuc juhapie biŋe jazawec.

¹¹Eme jaŋe Jesu faharerâ ŋokac fuacnejec dâŋ i manapie fârimâc ewec.

¹²Eme ŋic jajahec hae mocko ranicte rahapire hawarine bâtikierâ hatao fua‐jactewec.

¹³Fua‐jacteme ra gâcne jazapire iŋuc jaha manapie fârine mi ewec.

¹⁴Izi ʒâhec motecfâcne 11 tumaŋnerâ nânâ nâhuc ŋehapie fua‐jarewec. Erâ fahareme honembiŋzi biŋedâŋ jazapie maŋjeŋic bâzickeme mi mana ʒakiembiŋ irec mumu hehec ejarewec.

¹⁵Erâ ʒiŋuc jazawec: “Ŋoŋe mâreŋne mâreŋne rarâ ŋic juraŋgopieŋ sâc Biŋebiaŋ jazanʒepieŋ.

¹⁶Mamanasiŋhec Miti Opâ ruaocmu e sambâŋte biŋe eocmu, mamanasiŋ tâmiric e ine hârâcte biŋe eocmu.

¹⁷Mamanasiŋhec juniŋmu jaŋe tâpiri qikiŋne‐jarepe fuŋne qaqa mâsi kecʒiŋuc bâfuaniŋmu: Nore ʒâŋe muhuc demoŋ jâpe‐jareniŋmu, dâŋ marac furune muniŋmu,

¹⁸homa ba bâuac eniŋmu, opâ momori nâpie mi sipiric‐jopaocmu, huchec jaŋere qizecko mejeŋic râepie ɋiɋic qaniŋmu.”

¹⁹Wofuŋ Jesu e dâŋ iŋuc jaza mutâc efârerâ afeckehuc sambâŋko fewec. Ira Anuture fâreo juhuc jukac.

²⁰Eme jaŋe ine rarâ hae mâreŋ sâc miti‐ticne murambiŋ. Ehame Wofuŋzi qâtec‐joparâ mâsi bahuc dâŋjeŋic dopecke basanaŋ ewec.