1Eme Jesuzi taha ufuŋkonec waha rame motecfâcne jaŋeraonec moczi mu warec ehuc ʒiŋuc âzâcnewec: “Qaqazu honec, ufuŋ aŋac baŋac biaŋ, qânâ hâhâwicnezi basirickerâ bakicne.”
2Mume Jesuzi ʒiŋuc âzâcnewec: “Dameŋ ʒiŋuczia ufuŋ sâko mako ŋehame honeekic? Juku ine râsi jaŋe heroc qâropiepie ŋetâc qâtâtiezokac.”
3Eme Jesu â motecfâcne Oliwa tikio ferâ opâ ocniŋucnao ŋehapie ufuŋ e ʒiŋucnao ŋewec. Ira ŋehuc Petoro, Jakobo, Johane â Anderea jaŋe Jesu bucko wiocnerâ mumbiŋ,
4“Wiac mumec i wezimucko fuazokac â dâŋ i sanaŋkezo eha sowi weniŋucne moc fuazokac?”
5Eme Jesuzi dâŋ ʒiŋuc fuŋkerâ jazawec: “Juku maŋ bâsifuc eŋarenʒipiŋte sawaŋ‐ŋeŋic qahuc junʒepieŋ.
6Ŋic bocjaha fuarâ nore ʒâŋeo mâc âke hotahuc muniŋmu ‘No Kristo’. Iŋuc muhuc ŋic bocjaha maŋ bâsifuc ejareniŋmu.
7Erâ ʒika fârine â ojowane fuame manarâ maŋŋeŋic mi gâckezejec. Wiac iŋucne hâcne fuaocte mukicne, erâ fuame sifu dameŋ biac mi taraocmu.
8Mâreŋne mâreŋne ŋic guru sâko guru pitic jaŋe rârâsi efârerâ ra qa ware qa ehuc qaqac ranʒoŋgopieŋ. Ehame homeŋ iŋuc jaha ra ba ware ba ezokac. Erâ roroczi roroc fua razokac. Erâ i mâc gozi kikine sawa ezokac.
9“Ŋoŋe sawaŋ‐ŋeŋic qahuc junʒepieŋ. Jaŋe dâŋko râec‐ŋopaniŋmu â mitificko kâcbiŋzi ŋopaniŋmu. Erâ i sawa mâcne, kia â ŋicwofuŋ jaŋerao wâc bacŋopa rapie jaŋere maio domahuc nore erâ mumutaniŋ gie baniŋmu.
10Erâ dameŋ ine jâpec mi taraocmu, qanaŋ Biŋebiaŋ mâreŋ sâc murapie haŋ baocte mukicne.
11Eme kia jaŋerao bacŋopa rapie dâŋ weniŋuc munaŋmu muhuc mana mezac mi enʒepieŋ. Dameŋ ira Mârozi maŋŋeŋicko dâŋ râeocmu ijaha munʒepieŋ. Iŋuc ehuc dâŋ mupie ŋoŋere dâŋ mi eocmu, i Tiri Mârore dâŋ eocmu.
12Eme ŋic jaŋe wiac kecʒiŋuc eniŋmu: Hahac moczi ɋaticne doc bame qaniŋmu â mamac moczi ŋokâ‐ticne doc bame qaniŋmu â naru motec jaŋe neŋgoc mamacfâc‐jeŋic kisâ ejarehuc doc bacjopapie jopaniŋmu.
13Eme ʒâŋe biŋe‐nanere erâ ŋic mâmâc sasawa jaŋe ŋoŋere manapie aaricnehec eocmu. Eme moc e miti paŋnea barâ domakume dameŋ tarame rozo.
14“Juku mamakâc qizecne sisipiric‐ticnehec, mi dodomanao domazokac. (Ŋoŋe dâŋ i aimuŋ mac wose manac enʒepieŋ.) Iŋuc fuame honerâ Judaia mâreŋkonec ŋiczi tiki mâreŋko wiserâ ranʒepieŋ.
15Ehuc hae ʒoŋao juocmuzi ficmaŋ‐ticnao risie ferâ mafa‐ticne mi rozejec.
16Â gieo juocmuzi haeo rarâ ŋaqi bilaŋke‐ticne mi rozejec.
17Jei, ŋokac kiwecheczi â susuonecheczi ine weniŋuc enʒoŋgopieŋ!
18Ŋoŋe Wofuŋ numucnepie maname wiwise‐ŋeŋic hoemaŋko mi fuazejec.
19Eme dameŋ ira bâŋeŋkerâ weaŋsic nânâ femicne sâko fuazokac, sâc iŋucne Anutuzi ŋic bâfuac‐jopaweckonecteaŋ mi fuawec â juku wâc mi fuazokac.
20Wofuŋ e dameŋ i mi bâtâcneme muzac, ŋic moczi miti barâ jukume rorone i mi fua‐jâmbâŋkezac. Bâwosâecfâc‐ticne jaŋere erâ ine dameŋ bâtâcnewec.
21Eme ‘Kristo e ʒira nâŋerao fuakac’, ‘Kristo e ocna jaŋerao fuakac’, dâŋ iŋuc mupie mi mananʒepieŋ.
22Dameŋ ira Mesia burecne â porofete burecne fuarâ mâsi â wiac hâhâwicne bahuc ŋic maŋ bâsifuc ejareniŋmu. Ehuc bâwosâecfâc‐ticne jaŋere maŋ bâsifuckeniŋte gie sâko baniŋmu wâc. Erâ jaŋe maŋ bâsifuc eejarene mi fokacte eipieniŋmu.
23Wiac i mi fuaha qanaŋ ŋazakopacte sawaŋ‐ŋeŋic qahuc junʒepieŋ.
24“Eme bâŋeŋkerâ weaŋsic nânâ qaʒueha ʒoaŋ gâpârezokac â mosa tatamacne arictac ezokac
25â bâpiŋ gâcne tararâ mâreŋko wahanʒoŋgopieŋ. Ehame sambâŋ qiriŋ qame tâpirine ŋeŋgoroŋkezokac.
26Eme Ŋic Fâri Wâtuŋne e karorac faio ŋehuc ɋuŋɋasaŋ bâric bâricnehec fisime jaŋe hone ʒâirenʒoŋgopieŋ.
27Ehuc aŋelo sorec‐jopame jaŋe bâwosâecfâc‐ticne mâreŋ ŋifec â ŋifec, faic â juwic, sambâŋ â mâreŋ qaŋeŋ‐jekickonec qânusuc‐jopanʒoŋgopieŋ.
28“Firindoaczi mâsi eekac irec manasuhuc fuŋne mananʒepieŋ. E âric qame honerâ mueŋgopieŋ ‘Ʒoaŋ dameŋ bembeŋkekac’.
29Eme ŋoŋe iŋuc jaha, ŋazakopac wiac i fua‐fâreme ʒiŋuc munʒepieŋ: ‘E maic‐nâpozo ehuc motâc râpeo domakac’.
30No jâmbomac ŋazape: Mâreŋ ʒirec rune mi sisirowe jufehuc juhapie wiac sasawa fua tarazokac.
31Sambâŋ â mâreŋ jahe sirowezokopirec, nore dâŋ ine mi sirowe‐jâmbâŋkezokac.
32Erâ dameŋ sâko irec ʒoaŋ me aua ŋic moczi mi mana‐jâmbâŋkekac, sambâŋko aŋelo jaŋe wâc mi manaŋgopieŋ, Ŋokâzi wâc mi manakac, Mamac e buc manakac.
33“Dameŋ mi manaŋgopieŋte maŋŋeŋiczi rucjari bahuc numunʒepieŋ.
34Ŋic moczi ficgie‐ticne beherâ mâreŋ wiwicko raocte kiŋaŋ motecfâcne gie mutâcne‐jarehuc wiac‐ticne hone qâzuc eniŋte jazaocmu â soŋaŋ e rucgereŋ biaŋne juocte âzâcneocmu.
35Eme ŋoŋe iŋuc jaha rucgereŋ‐ŋeŋic biaŋne bahuc junʒepieŋ. Ficrune e owâcne me ŋafe ʒâŋiŋko me ŋafe furec hehec‐jekicko me furicte fisiocmu mi manaŋgopieŋte mukopac iŋuc hâcne ehuc junʒepieŋ.
36Ŋoŋe guŋ fohapie ututuŋ fisirâ bâfuac‐ŋopazackohec.
37Erâ ŋoŋe â gâcne sâko mâmâc ʒiŋuc ŋazakopac: Maŋɋâri jaha junʒepieŋ.”
