LUKA 6:2-32

²A Farisea taudia haida ese e nanadaidia, eto, Umui na dahaka dainai hegwau-tao karana Dina Helaḡa ai o karaiamu?

³Iesu ese e haere henuida, eto, David sivaraina asio duatua a, ia mai bamona ida e hitolodiava negana ai ede e kara toma?

⁴Ia na Dirava ena ruma ai e dae kau, malamala helaḡana e abi, e ani, bona bamona e henidia; a una malamala na helaḡa vaitani, hahelaḡa taudia mo adia.

⁵Ma e hamaoro-lia, eto, Taunimanima Natuna na Dina Helaḡa biaguna.

⁶Dina Helaḡa ma ta ai, ia na dubu ai e dae kau, unuseni ai tau ta imana idibana e heveri.

⁷Bena itorena taudia bona Farisea taudia ese e hasinadoa, Dina Helaḡa ai baine hamauria eiava, bena bae habadelaia eto.

⁸Ia na edia lalo-hadai dibana, bena ima-heveri tauna e hamaoroa, eto, A tore isi, bogaragidiai a gini. Bena e gini tore.

⁹Iesu ese e nanadaidia, eto, Na nanadaimuimu, edena namo, Dina Helaḡa ai baita hahenamo e iava baita hahedika? Baita hahemauri eiava baita heala?

¹⁰E itadia nenenene, bena hari tau e haduaia, eto, Imamu a toia roro. E haroroa, bena imana vada e namo, laurina heḡereḡerena.

¹¹A idia na e badu dikadika, e henega bou, Iesu ede bae karaia toma.

¹²Una negana ai, ia na ororo e dara dae, ḡuriḡuri totona; hanuaboi ia ese Dirava e ḡuria rani.

¹³Daba ai ia ese ena hahediba e boiridia, gwautararua e abidia hidi, e gwauraidia “aposetolo”. Ladadia bini:

¹⁴Simona, e nemaia Petro, mai tadina Andrea ida; Iakobo bona Ioane; Filipo bona Batolomeo;

¹⁵Mataio bona Toma; Iakobo Alfeo bona Simona, Selote tauna;

¹⁶Iuda Iakobo; bona Iuda Iskariote, ia na tao-tore tauna.

¹⁷Idia ida e hekei diho, taora ai e gini, mai ena hahediba hutuma ida, bona taunimanima logora, Iudea amo bona Ierusalem amo bona Turo mai Sidono hetoadia amo, ena hereva ikamonaidia bona edia gorere ihamauridia totona e aru ela.

¹⁸Bona ia ese lauma dikadia e bolodia taudia danu e hamauridia.

¹⁹Bena aru taudia iboudiai idau-tohona urana e urava, badina be siahu na iena amo e lasi, iboudiai e hamauridia.

²⁰Bena ia ese ena hahediba e haḡeredia, eto, Ogoḡami taumui be nanamo, badina be Dirava ena basileia na umui emui.

²¹Harihari e hitolomuimu taumui be nanamo, badina be bogamui do bae kunu. Harihari o taimu taumui be nanamo, badina be umui na do ba kiri.

²²Taunimanima ese bae inai henimui, bae dadaraimui, bae uduguiraimui, ladamui bae hadikadia, Taunimanima Natuna bagunai, negadia ai na ba namo.

²³Una dina ai ba moale, ba hisi dae; davamui guba ai baine bada; badina be senedia ese peroveta taudia unu e karadia toma.

²⁴A taḡa taumui madi ihabaimui, badina be ihanamomui na vada o abia vaitani.

²⁵Bogamui e kunumu taumui madi ihabaimui, badina be umui na do ba hitolo. Harihari o kirimu taumui madi ihabaimui, badina be daramui do bae doko, ba tai.

²⁶Taunimanima iboudiai bae hanamomui negadia ai, madi habaimui; badina be senedia ese peroveta taudia koikoidia unu e hanamodia toma.

²⁷O hakala henigumu taumui, na hamaoromuimu, inaimui ba lalokau henidia, bona e hadikamuimu taudia na ba kara namo henidia;

²⁸e uduguiraimuimu taudia na ba hanamodia, bona e daḡedaḡe henimuimu taudia na edia ba ḡuriḡuri.

²⁹Tau ta ese vahamu kahana baine pataia, kahana danu ba mede henia. Bona tau ta ese emu hahedoki baine dadihaia, emu rami danu basio rua.

³⁰E noimumu taudia na ba henidia, bona emu ḡau e dadihaimu tauna ena amo iabi-louna basio gwauraia.

³¹Umui na o uramu taunimanima ese bae kara henimui karana na umui ese unu mo ba kara henidia toma.

³²E lalokau henimuimu taudia mo boma lalokau henidia, emui namo be dahaka? Kara dika taudia ese e lalokau henidiamu taudia na e lalokau henidiamu.