LUKA 6:2-32

²Farasi cawngsaw thaikheh tah Zisu cawh, “Sabat ning letah tua phung a cang lypaw zecawtamaw naa tua?” tatah aa tah he.

³Zisu taco, “David tei a vesaw sahlo khatah aa ngaidi ning tei a tuapaw khah rei bang bei he ceh maw?

⁴Khazing behnah ing lang a nae ka, tlangbui sahlo tah ly co ahotahmai e phung a cang lypaw, Khazing aa dangnah very khah a e! Taico a chy khah a vesaw sahlo zong a peh hrah he kho!” tatah a palei he.

⁵Taico Zisu tah aa hai letah, “Cawngsaw Sawcapaw heh Sabat Buipaw a cang,” a tah he.

⁶Sabat ning vypaw leco Zisu cawh synagog lang a nae ka, a cawngpah he. Ma leco cawngsawpaw pakheh a cacang lang kih a songpaw a ung.

⁷Farasi le phungbia cawngpahtu sahlo taco Zisu cawh sua aa pu khy nápawtah a bo he ka, Sabat ning tah ma cawngsawpaw cawh a dangsah maw dangsah ly takhah aa ngia thlang.

⁸Canghrasala, Zisu tah aa lungchung tei aa pacangpaw khah hnih thlang ka, a kih a songpaw hai leco, “Ming vytei hme lehei tho la, a daw,” tatah a tah. Taico tho ka, a daw.

⁹Ma khy taico Zisu tah aa hai letah, “Sabat ning tahei chahnah tua maw a phung a cang, chahlynah maw? Hringnah pachah heh maw a phung a cang, thaw heh maw?” tatah a hae he.

¹⁰A kaekang leteipaw sahlo cawh ming he ka, ma cawngsawpaw hai leco, “Na kih pathlang,” tatah a tah. Taico a kih cawh pathlang ka, a dang.

¹¹Canghrasala, Farasi le phungbia cawngpahtu sahlo cawh aa thingae ngetei ka, Zisu cawh zekhatamaw tua he peh seh la, a cha a, tahpaw khah pakheh le pakheh aa reisia.

¹²Ma cai leco Zisu cawh thlawchang rua pawtah tlaang cung lang ke ka, a zing zaikhuadui Khazing khatah thlaw a chang.

¹³Mong khua va dui ka, a hningzuitu sahlo cawh y he ka, pahrawhluihning khah thing he ka, aaning sahlo cawh apostol rai a khing he.

¹⁴Simon (Piter tatei ming sahpaw) a unypaw Andru, Jeims, Johan, Filip, Barthalomeo,

¹⁵Mathai, Thomas, Alfas sawcapaw Jeims, ci le phing a dawkhuipaw Simon,

¹⁶Jeims a sawcapaw Juda le Zisu a luitu paw Judas Iskariot a cang he.

¹⁷Zisu cawh aaning sahlo khaco seithlah ka, bai arainah letah a ung. Ama a hning a zuipaw he mehlupui le Judia raang le Jerusalem khuapui, Tair le Sidon khua rili ngaekang raang sahlo taitah mehlupui a va chuh he.

¹⁸A bia khah nawthlia rua pawtah le a sawnah pawhe zong dangsah rua pawtah aa va chua. Thlawpaw pialuipaw tei a tlepaw sahlo zong he tah dangnah aa hmuh.

¹⁹Mehlupui tah Ama khah tong khy cy a zong he. Zecawtamaw tatah Ama taikhei hmingtuakhynah khah pia ka, aaning vytei cawh a dangsah he.

²⁰A hningzuitu sahlo cawh ming he ka, “Naaning sisahpaw sahlo bonghnang naa ting, Khazing painah raang cawh naa cawtah a cang.

²¹Ato letei a ngai a dipaw sahlo bonghnang naa ting, naa ri a vaw tae a. Ato letei a cah leimeipaw sahlo bonghnang naa ting, na hnui tae he ceh.

²²Cawngsaw sahlo tah aa ca hua tih he tah bonghnang naa ting, Cawngsaw Sawcapaw a cawngsaw naa cangnah rawng tah ca patlia a he ka, naa zy ca lang a he ka, naa ming aa ca pachia tih he tah bonghnang naa ting.

²³Ma ning taco naa thawchah seh la, lunglawng thawchah tah a pathlo my lo, zecawtamaw tatah vaicung letah naa longmai rungnaw ngeteipaw a ung. Ma hrahei aaning aa pathlahtu sahlo he takhei Khazing khuavang sahlo khah aa za tua tei he.

²⁴Canghrasala naaning mehrung sahlo naa cing a ping, zecawtamaw tatah a nawngnah cawh naa hmuh thlu thah.

²⁵Ato letei naaning a ri a vawpaw sahlo naa cing a ping, zecawtamaw tatah naa ngai a di tae a. Naaning ato letei a hnui leimeipaw sahlo naa cing a ping, naa ngechia a ka, na cah tae he ceh.

²⁶Cawngsaw maikaw tah aa ca pachaw tih he tah naa cing a ping. Ma hrahei aaning a pathlahtu sahlo tah khuavang pakheipaw sahlo khah aa za tua tei he.

²⁷Canghrasala, ka bia naw a thliapaw sahlo, ka ca ching he hi, naa carae sahlo cawh va do la, a ca huapaw sahlo cung leco chahnah va tua my lo.

²⁸Chia a ca reipahpaw he sahlo cawh bonghnang song my lo, a ca zongtepaw sahlo cawh thlawchangpah my lo.

²⁹Pakheh kheh tah na bai rakheh lang a ca cabai caco, a rakheh lang zong khah cong pah vy thlang. Pakheh kheh tah na pai a ca lah pah caco, na angkilai lah zong ei kheh.

³⁰A ca haepaw maikaw cawh pei la, na hnuipaw a ca lah pahpaw he cawh hae kaw khawh khe lo.

³¹Na cung letah tua he seh tah na dupaw hrakhei male cung letah va tua my lo.

³²Naaning a ca dopaw suipaw naa do caco he zemaw amia naa hmuh a? Mehsua zong tah ma hapaw cawh aa tua thlang hrah.