Luke 6:2-32

²Than pam Pharisees al-alangan thathinan thanang aꞌ thawin thant, “Ayyang, niiy may wheatan ngeenak thuth-thuthaniy e? Aak in Saturdaya! Aak ngamparan ngench thayan wunana! Niiy wik ngench thayanan pip-pipaniy ey?”

³Nil Jesus.an thaw thant, “Niiy ngul wik inan keꞌam ngeeyan ey? Nil David.an aꞌ pam nungantam anangan meechan wun-wunin ey?

⁴Nil David.an aawuch ngench thayanak iiy, aawuch God.antamak, aꞌ angan ngoonch aꞌ may bread ngench thayanan maay, thanana mungkin ngul. In wik thayan ngamparamana yimanangan wunan thanam thonakama priests al-alangan may bread ngench thayanan mungkayna. Puth nungkway than wik ngench thayanan pipin-a, an than David weeꞌanang al-alangan ep mungkin.”

⁵Aꞌ nil Jesus.an thaw thant ngul, “Puth ngayana, pam inmana nil God.angan kuch ngayang niiyantana, ngayam thonakam ep thawānga than pam wanch want-wanttakan iiyayn aak Saturday.ana, puth ngay inana moom piꞌan niiyantama, Saturday.akan thampa.”

⁶Saturday thon ngulan-a, nil Jesus.an aak church Jews.antamakan iiy, aꞌ thaaꞌ-aath-aath thanang pam wanch anangan. Nil aak angmana nil pam inan maꞌ mal nungantaman-a, makar yaꞌ yalam nungant, nil angman nyiin-nyiin.

⁷Pam piꞌan wiy anangan angman nyiin-nyiinin, pam Pharisees anangan aꞌ puth pam anangan wik thayanan thaaꞌ-aath-aathinan. Than thath-thathin nunang Jesus.an nil nath paman maꞌ min yumpowa, nath yaꞌa, puth aak anan Saturday.an, aak ngench thayan wun thanta. Thanana meeꞌangam kalin nunang, than puth kaangk wik aak-yaꞌangan waaꞌ-waaꞌayn nunang wiyantan.

⁸Nil puth Jesus.angan kan meeꞌmiy thanang than wanttakan ngaantam-ngeeyin kuchek thanttamangan, nil puth thaw pam alantan, “Nint meeꞌ yotantangan ingan thanāna.” Nil paman wur eka, aꞌ angman than.

⁹Anpalan-a, nil thaw thant pam wanch al-alantan than churchangan nyiin-nyiinin, “Ayyang, niiyalang, kan niiy in ngeeyāna, nil wik thayan ngamparaman wanttak thawan e? An ngul kan ey? Ngamp ngul min anman kaangk iiyāmp thant pam wanchantan aak Saturday.angan ey? Ngamp nath kaangk pam wanch anangan kaaꞌ-piichanathāmp thanangwey ey? Yaꞌ nathwey-a, ngamp kaangk nath wayathāmp thanang ey?” Puth thanan angman ngul nyiin-nyiinin popam.

¹⁰Nil Jesus.angan pal-puy thath-thath thanang. Anpalana, nil pam alantan thaw ngul, “Ayyang, nint maꞌan ongkarathāna!” Nil puth pam alangana maꞌan ongkarath, aꞌ maꞌan minam ngul wun nungantweya.

¹¹Man kul paththam wamp thant pam piꞌan al-alantan, aꞌ than kan-ngul wik thaw-thawin thanttakaman than wanttak nathan yumpayn nungant Jesus.antan.

¹²Amanamaniya nil Jesus.angan want thanang aꞌ nil iiy ngul pokkapang aꞌ yoykang mat nil yipam meeꞌ-wuthanamow nungant God.antan. Nil Jesus.an meeꞌ-wuth-wuthanam ngut ongk, aakam paanth nungant.

¹³Ngaaꞌ thon ngulana kinch kanan mat-a, nil ump thanang pam ngurp nungantam yot anangan wampayn nungant. Than kanan wampin nungant-a, nil Jesus.angan pam al-alantamana pam twelve thonakam miꞌ thanang nungantangan iiy-iiyayn. Aꞌ nilana apostles waaꞌ thanang nil puth ngulan kuchow thanang work nungantan iiy-iiyayn ngula aꞌ wik min nungantaman waaꞌ-waaꞌayn thant pam wanchantan. Pamiya namp inangan miꞌ thananga:

¹⁴Simona (ngul-ngulana Jesus.angan namp thon ngulan theeꞌ nunganta, Peter), putha kuunch nungantam Andrew, putha James-a, John-a, aꞌ putha Philip-a, aꞌ Bartholomew,

¹⁵putha Matthew-a, thoniya Thomasa, aꞌ putha James-a, nhengk nungantam Alphaeus.antama, aꞌ putha Simona thanan waaꞌ-waaꞌin nunang Patriota, nil puth aak nungantamakana kaangk wun paththama,

¹⁶putha Judas-a, nhengk nungantam James.antama, aꞌ putha Judas Iscariota. Nil pam ilangaman ngulan maꞌaman theeꞌow nunangan Jesus.an pam soldiers al-alantan mulathaynan nunangana.

¹⁷Than Jesus weeꞌanangan yoykaman kanan ukin-a, nil aak pampang than-than ngurp nungantam yot-yotam al-alantangan. Pam wanch thaaꞌ-wantanam angman thamp — than pam wanch aak Judea.amana, aꞌ aak Jerusalem anpalana aꞌ puth aak towns Tyre aꞌ Sidon anpalan, aak kucham inangan thomp thinth.

¹⁸Than wampin yipam ngeeyayn nunang wikan waaꞌ-waaꞌow aꞌ nil yipam miyalathow thanang pam wanch anangan weechanan thanang. Than wiy anangan wampinan-a, oony way piꞌ-piꞌin ngangkangan, aꞌ nil Jesus.angan miyalath thanang thamp.

¹⁹Than yotamangan keꞌ mamiythan nunang than yipam miyal wunayn. Nil Jesus.an kan-kanam thayan paththam, nil keꞌ-paal maꞌmangkam anangan miyalath thanang.

²⁰Nil Jesus.angan thath-thath thanang ngurp nungantam anangan, aꞌ thaw thant, “Niiy wiy inanganiya wukal keꞌanangan iiy-iiyaniya. Yaa, an puth niiyaniya ngangk minangam ngul iiy-iiyānweya, nil puth God.angan ngul min-minam piꞌ-piꞌow niiyang, maꞌ nungantangana.

²¹Niiy wiyiya meech wun-wunaniya, may keꞌanangan. Yaa, an puth niiyaniya ngangk minangam ngul iiy-iiyāna, nil puth God.angan may ngul theeꞌ-theeꞌow niiyant. Niiy wiyiya ngangk way anman iiy-iiyaniya, peey-peeyaniya. Yaa, niiy ngulan ngangk minangam iiy-iiyāna, thaaꞌ-thengkanang iiy-iiyāna.

²²“Wiyiya, pam wanch wiyangan ngangk-way-wayangam kalantan niiyang, man-mangkam theeꞌantan niiyant, thaaꞌ-thengkathantan niiyang, aꞌ aak-yaꞌang waaꞌantan niiyang, ngeenama? puth ngatharam peyanang, ngay puth wuny niiyantaman niiy ngayangan monkan-wak-wakaniy. Yaa, niiyana ngangk minangam ngul iiy-iiyāna.

²³Puth nungkway than way-way yumpiythan niiyant-a, niiy ngangk minangam iiy-iiyāna, aꞌ thengkanam keeꞌ-keeꞌāna. Aꞌ ngulana, nil God.angan aak nungantamak kalow niiyang, aꞌ way min min-miniy an kenyan nilan piꞌ-piꞌana, an niiy ngul uwān nungantamana. Aak keenkana kampan thanttamangan yimanang kuyam wayim yumpin thant, pam prophets al-alantan.

²⁴“Niiy wiy inanganiya maꞌmangkiy iiy-iiyaniya, wukal aꞌ way min yotam thamp piꞌ-piꞌaniya, niiy work keꞌanang nyiin-nyiinaniya. Kan in ngeeyāna! Way paththam ngul wampow niiyanta!

²⁵Niiy wiyiya may yot tham piꞌ-piꞌaniya, niiy thip oth anman iiy-iiyaniya. Kan in ngeeyāna! Way paththam ngul wampow niiyanta! Niiy meech ngul iiyana! Niiy wiyiya, thengkan anman keeꞌ-keeꞌaniya! Kan in ngeeyāna! Way paththam ngul wampow niiyanta! Niiy ngangk way ngul iiyan, aꞌ puth peey-peeyan.

²⁶Niiy wiyiy-a, pam wanch yotangan thaaꞌ-kuump-kuumpantan niiyang; puth in min yaꞌa, way paththam ngul wampow niiyanta. Aak keenkanamana than pam wanch yotangan thaaꞌ-kuump-kuumpin thanang pam way anangan thanan waaꞌwin keꞌ wik God.antaman thaaꞌ-aath-aathin, puth yaꞌa, an than yaan muuk-muukamin.

²⁷“Niiy weeꞌ-weeꞌanangan kaangk ngeeyān ngayang-a, wik inangan ngeeyāna: than weeꞌ-weeꞌananga ngangk-wayangaman kalantan niiyang-a, niiyaniya ngangk minangam iiyān thant, anmana. Than nath kul uwiythan niiyant-a, niiy min iiyān thant,

²⁸than weeꞌ-weeꞌanang nathwey konchayn niiyang-a, niiyaniya koyam keꞌ konchān thanang, wik min anman thawān thant; than weeꞌ-weeꞌanangan nath way yumpiythan niiyant-a, an niiy meeꞌ-wuthanamān thant.

²⁹Nil weeꞌang nathwey piikow niiyang-a, niiy puthangkan keꞌ piikān nunang, nil puthaman mak piikow niiyang. Nil weeꞌangan nath coat niiyantaman maayiywey-a, niiy kul keꞌ thawān nungant, puth shirt thamp theeꞌān nungant paththama.

³⁰Nil pamwey nath thawiy niiyant mayak thakwey-a, yuk way minakwey-a, niiyiya keꞌ weekāna, theeꞌān nungant. Aꞌ puth nil pamang nath yuk way min niiyantaman nath maayiywey-a, yaa, kana, keꞌ thawān nungant palaman kalow niiyant.

³¹Keꞌ niiyan kaangk pam wanch wiyangan min iiyayn niiyant-a, niiy yimanangan min iiyān thant.

³²“Niiy nathwey kaangk wunaniy thonakamana pam wanch al-alantan kaangkan wuntan niiyantana. Ngul nil piip God.an ngangk min wunow niiyantam anpalan ey? An yaꞌa! Pam wanch way al-alangan ngurp thanttamakan aꞌ kampan thanttamakan kaangk wuntan thant. Puth niiyiya pam wanch yotaman kaangk wunān thanta!