Lukaj 6:2-32

²A Parijär akai indan irail: Menda komail kin wiada, me jota pun, en wiaui ni ran en japat?

³Iejuj ari kotin japen majani on irail: Komail jota wadoker, me Dawid wiadar ni a men manadar, i o me ian i?

⁴Duen a pedelon on nan tanpaj en Kot, o ale prot en kajanjal, o kankan o pil ki on me ian i, me jota pun, aramaj en tunole, jamero kan eta?

⁵O majani on irail: Nain aramaj pil kaun en japat.

⁶A kadekadeo ni eu japat a kotilon on nan jinakoke kaweweda. A aramaj amen mia, me pa a pali maun motorla.

⁷A jaunkawewe o Parijär akan majamajan i, ma a pan kakelada i ni ran en japat, pwe re en kadipa i.

⁸A kotin ani ar lamelam ap majani on aramaj o, me pa a motorla: Uda kodo met! A ap uda ko on waja o.

⁹Iejuj ap kotin majani on irail: I men idok re omail, da me pun en wiada ni ran en japat ren me mau de me jued? En kolekol de kawela maur en aramaj?

¹⁰I ari kotin aupwil jili po ’rail majani on i: Kapawei pa om! A ap wiada, pa a ap kelailada, a maula dueta me teio.

¹¹Irail ap makaradar kaualap o kapukapun pena, da me re pan wiai on Iejuj.

¹²Kadekadeo ni ran oko, a kotidala pon nana pwen laolao. I ari kotin laolao on Kot lao waja ran.

¹³A lao ran pajan, ap kotin molipei pena japwilim a tounpadak kan. A kotin piladar ekriamen, me a kamareki wanporon.

¹⁴Jimon me a kotin kaadaneki Petruj, o ri a Andreaj, o Iakopuj, o Ioanej, o Pilipuj, o Partolomäuj,

¹⁵O Matäuj, o Tomaj, o Iakopuj nain Alpäuj, o Jimon, me adaneki Jelotej,

¹⁶O Iudaj nain Iakopuj, o Iudaj Ijkariot, me panala i.

¹⁷A lao kotin ian ir kotidi don waja kij nan jap patapat o, japwilim a tounpadak kan toto o aramaj nederenia pokon don i jan nan Iudäa, o Ierusalem, o Tiruj, o Jidon, re mi pon oror, pwen ron i o kakelailada jan ar jomau kan;

¹⁸O me kalokolok ren nen jaut akan ap kelailadar.

¹⁹A aramaj karoj men doke i, pwe rojon kin pwiliwei jan i, kakel irail karoj.

²⁰A ap kotin aupwil jili pon japwilim a tounpadak kan majani: Meid pai komail, me jamama, pwe noumail wein nanlan.

²¹Meid pai komail, me men manadar anjau wet, pwe komail pan medila. Meid pai komail, me kin janejan anjau wet, pwe komail pan kaurur.

²²Komail meid pai, ma aramaj akan kailon kin komail, o kaje komail la, o kidaue komail, o kawela ad omail, pwe dene me jued, pweki Nain aramaj.

²³Komail en peren ni ran o, o lujiluj, pwe kilan, pwain omail me lapalap nanlan, pwe iduen me jam arail akan wiai on jaukop akan.

²⁴A me juedi on komail kapwapwa kan, pwe komail anekier omail peren.

²⁵Juedi on komail, me medier, pwe komail pan dupokala. Juedi on komail, me kin peren anjau wet, pwe komail pan mauk o janejan.

²⁶Juedi on komail, ma aramaj akan karoj pan lokaia mau kin komail; pwe iduen me jam arail akan wiai on jaukop likam akan.

²⁷A I indai on komail, me kin roneron, pok on omail imwintiti, wiawia mau on me kin kailon kin komail,

²⁸Kapaiada, me kin karia komail la, kapakapa kin ir, me kainjenjuede kin komail;

²⁹O me pikir uk ni apali en likin jap om, pil ki on i pali teio, o me pan ki jan om likau pup, pil mueid on i noum jakit.

³⁰Ki on karoj, me kin poeki re om, o me pan atia jan om kapwa, koe der poeki re a, a kapuredo.

³¹A duen me komail men, aramaj en wiai on komail, iduen me komail en wiai on irail.

³²Pwe ma komail pok on, me kin pokepoke komail, da me pan katin pamail? Pwe me dipan akan pil kin pok on kompoke parail.