LUKAS 6:2-32

²Naž benne' yodo' fariseo ka' wnnábgekle' ḻégake', na' wnnágake': —¿Biẕ chen' žonle da' bi žaḻa' gonžo ža la'y?

³Bechebe Jesusen', na' gože' ḻégake': —¿Bi beḻ-le kan ben Dabí katen' wdone', na' ḻezka' beldón benne' ka' wnníta'ḻengake' ḻe'?

⁴Wyoé'e ḻo yodo' che Dios, na' wẕi'e yet x̱til dan' ẕgó'ogake' ḻaw Dios, dan' bi žaḻa' gawžon, san de latje chégakze bx̱oz ka' gáwgaken', na' Dabín' bdawen', na' ḻezka' bneẕjwen' chegak benne' ka' bénḻengake' ḻe' tẕen.

⁵Naž Jesusen' gože' ḻégake', na' wnné': —Neda', Benne' Golje' Benách, naka' X̱ane ža la'y.

⁶Yetó ža la'y chegak benne' judío ka', wyó'o Jesusen' ḻo yo'o gan ẕdóbgake' nich yéngekle' x̱tiža' Dios, na' bsedle' benne' ka' nníta'gake' ga na'. Ḻezka' zoa to benne' ga na', benne' nžeke' ne'e ḻi ža.

⁷Benne' yodo' wsedle ka' ḻen benne' yodo' fariseo ka' ẕwíagake' Jesusen', nich ḻé'egekle' cha' yeyone' bennen' kate' nak ža la'y chégake', nich žéḻgekle' nakle gak yesbága'gake' Ḻe' ẕia.

⁸Žákbe'ele Jesusen' dan' ẕza' ḻáže'gake', na' gože' bennen' nžeke' ne'e, na' wnné': —Wzó ža'. Wzé gachje ḻáwe'le nga. Ḻa' wzó ža'te bennen', na' wzíe' ga na'.

⁹Naž Jesusen' gože' benne' yodo' ka', na' wnné': —Nnabla' ḻe'e to diža'. ¿De latje kate' nak ža la'y gonžo da' naken chawe', cha' gonžo da' ẕinnj? ¿De latje yeslažo yeḻa' nban chegak benách ka', cha' yeka'ažon?

¹⁰Naž Jesusen' bwie' benne' ka' nníta'gake' dot kwite', na' gože' bennen' nžeke' ne'e: —Bḻi no'o. Naž bennen' bḻi ne'e, na' ḻa' beyakten.

¹¹Naž bža'agak benne' yodo' ka', na' béngake' toze diža' ḻa' ḻégakze' nich žéḻgekle' bi da' góngake' che Jesusen'.

¹²Kate' ža ka' wyéj Jesusen' gan nak to ḻaw ya'ado'. Katen' bžine' ga na', bḻiže' Dios, na' dot yele bcháḻjḻene' Ḻe'.

¹³Kate' za' ža'ní', bḻiže' benne' ka' žónḻengake' Ḻe' tẕen, na' wžíe' chežinnoe' nich gákgake' wbás chie' ka'.

¹⁴Bḻiže': Smon, (bennen' ḻezka' lie' Bedw), Ndres, (benne' biche' Bedon'), Jakob, Ẕwa, Lip, Bartol,

¹⁵Matío, Mas, Jakob, (ẕi'n Alfeo), Smon, (benne' že' ḻaže'e yež chie'),

¹⁶Judas, (ẕi'n to benne' lie' Jakob), Judas Iskariote, (benne' wdíe' Jesusen' ḻo na'gak benne' ka' gótgake' Ḻe').

¹⁷Naž Jesusen' bdínneḻene' benne' wbás chie' ka' tẕen ḻaw ya'adon', na' bžíngake' to gan nak lache', gan zej nnita' benne' zanže, benne' wsedle chie' ka'. Ḻezka' zej nnita' benne' zan ga na', benne' zej nžoje' yógo'te yež gan nbab Judea, na' ḻo yež Jerusalén, na' ḻo yeždo' ka' zej nnitan' žoa'a nisdo' gan zej nnita' yež Tiro, na' yež Sidón. Benne' ki bžíngake' ga na' nich wzé nággake' x̱tiža' Jesusen', na' nich yeyákgake' ḻo yižwé' che chégake'.

¹⁸Ḻezka' beyakgak benne' ka' ẕzáka'gake' dan' yó'ogake' be' x̱iwe' ka'.

¹⁹Gónegekle yógo'te benne' zan ka' kángake' Jesusen' dan' žeyone' yógo'tegake' ḻen yeḻa' wak chie'.

²⁰Naž bwia Jesusen' benne' wsedle chie' ka', benne' ka' nníta'gake' ga na', na' gože' ḻégake': —Ba nez ẕen naken chele ḻe'e, nak nyache' ḻáže'le na'a, dan' gata' latje chele gan ẕnna bia' Dios.

²¹’Ba nez ẕen naken chele ḻe'e ẕdonle na'a, dan' weljle da' naken che Dios. ’Ba nez ẕen naken chele ḻe'e ẕbéžele na'a, dan' wẕížḻenle neda' tẕen.

²²’Ba nez ẕen naken chele ḻe'e, dan' za' ža katen' benách ka' bi ḻé'egekle' ḻe'e chawe', yebéjgake' ḻe'e gan nníta'gake', na' nnégake' chele, na' gon dítjgekle' lale, na' nnágake' naken to da' dáche'ze dan' žónḻenle neda', Benne' Golje' Benách, tẕen.

²³Le soa ḻo yeḻa' ba nez ža na', na' le yebél, dan' nak ẕen da' gata' chele ya'abá che Dios. Ḻezka' x̱a x̱na' golte chégake' ka' béngake' da' ẕinnj chegak benne' ka' bcháḻjgake' ḻo wláz Dios ža ni'te.

²⁴’Da' nyáche'ḻe'e gaken chele ḻe'e, benne' wnni'a ka', dan' ba de da' yebéḻenlele.

²⁵’Da' nyáche'ḻe'e gaken chele ḻe'e, žéljelele na'a, dan' tonle. ’Da' nyáche'ḻe'e gaken chele ḻe'e, žẕížele na'a, dan' gak nyache' ḻáže'le, na' kwež nyáche'le.

²⁶’Da' nyáche'ḻe'e gaken chele ḻe'e, ẕnnagak yógo'te benách ka' chawe' chele. Ḻezka' bengak x̱a x̱na' golte chele ka', dan' wnnágake' chawe' chegak benne' wen ḻaže' ka', benne' wnnázegake' bcháḻjgake' ḻo wláz Dios.

²⁷Ḻezka' wnná Jesusen': —Žapa' ḻe'e, zoale nga, na' žénlele chia' neda', ẕnnia': Le ži'il benne' ka' bi ẕḻé'egekle' ḻe'e chawe'. Le nnab da' chawe' chegak benne' ka' ẕžá'agake' ḻe'e.

²⁸Le nnable Dios gon chawe'e benne' ka' žóngake' ḻe'e ẕia. Le nnable' Ḻe' gákḻene' benne' ka' ẕnnégake' chele.

²⁹Cha' no benne' kape' cheḻá'a x̱ago', bze yecheḻá'a x̱agon'. Cha' no benne' ke'e laže' da' ẕoan x̱kožo'o, ḻezka' be' latje ke'e ẕon'.

³⁰Cha' no benne' nnable' le' da' de chio', bneẕjwn chie'. Cha' ke'e da' naken chio', bi yennabon'.

³¹Ka žénelele gongak benách ka' chele, ḻezka' le gon chégake'.

³²’Cha' nží'izelele benne' ka' zej nži'ile' ḻe'e, ¿biẕe da' nakže chawe' žonlen? Ḻezka' žongak benne' doḻa' ka', zej nži'ile' benne' ka' zej nži'ile' ḻégake'.