Luka 6:2-32

²Ngan di Paresi pattu tikamata di, le nga tipasak pang di nen, “Ai, nga yelei a kayei dada yo ger kiam Yuda igunkalam be amyei ye lal ke sungunu tiap nga?”

³Motong la Yesu iraua betanga kidi Paresi tina nen, “Ang nga kakinkata rau yo igasa so yo Dawiti iyeii ye kene yo iye di tooltool ki pitolo di ye i, in pitiap, too?

⁴Ya in idewe a ilo rumu ke Maro lono, lo ikap porong yo tiyei paroranga ye nga. Ngan porong tina, ngan di tooltool ke paroranga so leu la be tikan nga, bong di tooltool sokorai, ngan tiap. Bong Dawiti ikap porong tina a ikan, inbe ikap pang di tooltool ki a tikan lapau.”

⁵Motong la Yesu iwete pang di nen, “Tool Moolmool ke Maro, in ya la iyei Tool Mai pang lal kidi Yuda ke sungunu i.”

⁶Ke kapala iman a ila, motong la lal kidi Yuda ke sungunu san mulu pombe. Le nga Yesu ilo rumu kidi Yuda ke gaongo a ipatomonai di tooltool. Ngan le ipuske tool tamoto atu yo baene oonoo ikap rama i.

⁷Ngan di Paresi pattu, inbe di pannoongoo ke ger ke Maro nga, ngan tisere dada yo be tikaua Yesu pang ye di kuto maimai ke karatanga betanga a tiweteweta ye urata ki yo iyei nga. Le nga matadi kenen ye be tikamata, ole ikarata tool tani yo ikap rama in ye lal kidi Yuda ke sungunu, too tiap.

⁸Bong Yesu ikamata di tina yo lodi wetewete nen nga, le nga iwete pang tool tani yo baene ikap rama in nen, “Oi, kumadit a se kukodo dama kidi tooltool nga.” Le nga tool tani imadit lo ikodo ye ni tani in.

⁹Motong la Yesu iwete pang di nen, “Oo, nga be atorang. Ger ke Maro iwete belei ye lal kidi Yuda ke sungunu? Iwete be tayei dada dook mata pang di tooltool, too be tayei dada dook tiap pang di? Too, iwete be talon di tooltool a tiyepe dook mata, too be tagarung di a timmata?”

¹⁰Yesu matana pang ye di tooltool tina le imot, motong iwete pang tool yo baene ikap rama in nen, “Oo, kupadunu baem in.” Le nga tool tani ipadunu baene, ngan baene tani in dook mata mulu.

¹¹Bong di kuto maimai ke ger ke Maro tiye di Paresi katedi malmal dook tiap pang Yesu, le di tapdi tiwetewete ye soo so yo be tiyeii pang Yesu i.

¹²Ke kapala iman a ila, motong la ye ke atu in Yesu inau a ilo pang ye kawal atu a be nen ngan lo ipatarau pang Maro. Le ye bong tani in ipas le ipatarau pang Maro le du muntu.

¹³Muntu ke se, motong la ikiu di galiunu tina a timan ye, ngan le ipootoo di sangaul be ru la itar di be tiyei aposol panga nga.

¹⁴Ngan di tooltool tina ngan atu ene la Simon yo Yesu ikiui ene san ye Pita i. Inbe ipootoo Antares yo Simon tani in taini i, inbe Yemis ye Yowan ye Pilip, inbe Batolomiu,

¹⁵inbe Matiu ye Tomas ye Yemis yo Alpias natunu i, inbe Simon yo tiwete ene san ye Selot i,

¹⁶inbe Yuta yo Yemis natunu i, inbe Yuta Iskariot, tool tani yo be pang dama ni ngan itara Yesu la di koi ki baedi i.

¹⁷Motong Yesu iye di aposol ki tina sangaul be ru, ngan tipa ke kawal a tisi a si tikodo ye tana lolowo atu. Ngan di galiunu tina alunu kaiye tiyepe nangan. Inbe di tooltool alunu kaiye tipa ke tana mai Yudia, inbe malala mai Yerusalem a tisi, inbe kapala tipa ke tiek ye malala maimai yo Taia le Saidon, ngan tise a se tiyepe lapau.

¹⁸Di ngan timan pang ye Yesu a be man tilongo betanga ki, inbe ikarata di ye matamatenge kidi a nen ngan tinidi dook mata mulu. Inbe di tooltool kapala yo so sadi tiyepe ye di nga, ngan inganga so sadi ye di a tinidi dook mata mulu.

¹⁹Inbe di tooltool alunu tina tikapye be titoko Yesu tinini, yesoo gurana mai san iken ye, le ikarata di tooltool le imot yo matamatenge ikap di, ngan le tinidi dook mata mulu.

²⁰Motong la Yesu matana pang ye di galiunu tina, inbe iyei ne, “Ang di tooltool yo ballingamim tiap nga, ngan lomim ponana, yesoo Maro ole iyei urata dook mata pang a matan kalang.

²¹Ang di tooltool yo nookoot ngan kakana pitolo nga, ngan lomim ponana, yesoo ole Maro iyei urata dook mata pang le kakan kapo sung. Ang di tooltool yo nookoot ngan katangtang nga, ngan lomim ponana, yesoo ole Maro iyei urata dook mata pang le kangele.

²²Ang di tooltool yo di tooltool tikamatang katoo Tool Moolmool ke Maro, a lodi dook tiap pang inbe tingangang nga, ngan lomim ponana. Inbe ang di tooltool yo tiwete betanga dook tiap pang, inbe tigarung emim a tiwete be ang ngan di tooltool dook tiap nga, ngan lomim ponana lapau, yesoo ole Maro iyei urata dook mata pang.

²³“Kumata le be tiyei urata nen pang nga, ngan lomim ponana a kapases, yesoo balingi ke urata kootoonoo kiang la inamang a iken ye malala ke Maro ngo. Awete nen nga, yesoo muku ngan di tiudi tiyei urata gaongo nen ngan pang di Maro koonoo lapau.

²⁴Bong atoo, ang tooltool yo ballingamim nga, ngan kin kakamatang dook leu, yesoo so yo lomim ponana ye nga, ngan nangan leu la kakap koot nga.

²⁵Atoo, ang di tooltool yo nookoot ngan kakan kapo sung nga, ngan kin kakamatang dook leu, yesoo pang dama ni, ngan ole kakana pitolo. Atoo, ang di tooltool yo nookoot ngan lomim ponana a kangele nga, ngan kin kakamatang dook leu, yesoo pang dama ni nga, ngan ole lomim modoko a katang.

²⁶Atoo, ang di tooltool yo di tooltool kapala tiyitmak emim nga, ngan kin kakamatang dook leu, yesoo in dada tani yo muku ngan di tiudi tiyeii pang di tooltool kaplungunu yo tiwete di ye Maro koonoo, in nain.”

²⁷Yesu iwete mulu nen, “Bong ang di tooltool yo katar talngamim a kalongo betanga kiau nga, ngan awete pang nen, lomim pang di koi kiang mai san, inbe kayei dada dook mata pang di tooltool yo tigarungang, ngan lapau.

²⁸Inbe tooltool yo tiwete betanga dook tiap a be tigarungang ye nga, ngan kapatarau pang Maro be iyei urata dook mata pang di. Inbe di tooltool yo tiyei dada dook tiap pang nga, ngan kapatarau pang Maro ye di, a be nen ngan ilon di.

²⁹Kumata be tool atu ipodo pangam nga, ngan kuportak le kupasanga pangam san pang ye lapau. Inbe kumata be tool atu ipinoo sousoungu matolene kiong nga, ngan kin kulele be, bong kumalum pang a ikaua sousoungu mannipunu kiong in lapau.

³⁰Inbe kop so pang di tooltool le imot yo titorong ye so nga. Inbe kumata be tool atu ikap so kiong nga, ngan kin kuwete katkat panga a ipamulu be.

³¹Ngan nanga, dada dook mata yo lomim be di tooltool tiyei pang nga, ngan ang ole kayei dada gaongo leu pang di nen lapau.

³²“Kumata be lomim mai san pang di tooltool yo lodi mai san pang, ngan leu nga, ngan ole sei be ikamatang a iyitmak emim be ang nga tooltool dook mata i? Ngan di tooltool ke yeingi noonoo, ngan lodi mai san pang di tooltool yo lodi mai san pang di, ngan lapau.