LLUK 6:2-32

²Aku-siku tiring kanuku kene Perisi-yima-ni Yesos yunundu niku mele: “Kána! ⸤Kóru molemulu⸥ ena-Sambateliinga ‘Kongun naa teai.’ nimba pelemú ung-manele nambimuna nunga lumbili anduli yima-ni ung-manele toku pula toku kene aku-siku tekemeleye?” niring.

³Yesos-ni pundu topa kene nimba mele: “Eni Pulu Yili-nga bukna sukundu ⸤anda-kolepa yi nuim king⸥ Depit-ni tirim mele nimba molemú temanele kanuku kene temaneliinga pulele naa piliilimiliye? Depit kene yunu-kene wasie puring yima kene enini engle-ni kolku kene,

⁴Depit Pulu Yili mulurum sell-lkuna lkundu pupa, Pulu Yili-nga kumbi-kerina lirim pllawa kalúlima liipa nomba, yunu-kene wasie puring yima sirim nuringko kanili. Pllawa kaluli kanumandu Pulu Yili-ni ung-mani sipa kene nimba mele: “We-yambuma-ni aima naa nai. Pulu Yili popu tunjuli yima mindi nangi.” nirim ⸤ung-mani kanili topa pula turum⸥ kanili. ⸤Eni numanu tale nambimuna piliilimiliye? Depit yunu-ni ui aku-sipa tirim mele eni piliiku kis naa piliilimiláliinga, pe ekupu na lumbili anduli yima-ni tekemele mele akili kanuku kis naa-ko piliai.⸥” nirim.

⁵“Mania Omba Mana-Yi Au Talurum Yili-ni Sambat enama nokulemáliinga ⸤Sambat ena kene yambuma molku kunjingíndu tingí mele kapula nimbá kanili⸥.” nirim.

⁶Penga walse, kóru mululi ena-Sambat tenga, Yesos omba Juda-yambuma máku toku Pulu Yili-nga ungele piliiring lkuna lkundu pupa kene ung-bo tonjupa mani sirim. Lku kanuna yi te mulurum, yunga ki-bokundu kamu kolupa kukurum.

⁷Kanu-kene akuna muluring Perisi-yima kene, Pulu Yili-nga ung-manimanga puluma piliiku ung-bo tonjuku mani siring yima kene, enini ‘Yesos-ni ulu te tepa kis-simba kene yu kot tenjimulú.’ niku ulu te tepa kis-simba te ⸤taki-taki koruku molku kene⸥ ‘⸤Kóru molemulu⸥ ena-Sambatele kene yu-ni yili tepa kaí tembanje.’ niku yunu lakuku kanuku muluring.

⁸Enini numanale-ni piliiring akili piliipaliinga Yesos-ni ki kolupa kukurum yi kanilindu nimba mele: “Yambuma molemelena oku ola angiliui.” nirim kene yili yunu akuna omba ola angiliirim.

⁹Kanu-kene Yesos-ni yimandu nimba mele: “Eni i-sipu walsipu piliiker. ‘Sambat ena kene ulu nambulka ulu te kapula temulúye? ‘Sambat enaliinga ung-manele-ni “Teai.” nilimú mele teamili.’ nimbu yambuma liipu tapunjumulú kene kapula mola yambuma tepu kis-simulú kene kapulaye? ‘Naa kolangi. Kona pangi.’ nimbu temulále kapula mola topu konjumulále mandaye?’ nimbuliinga walsiker.” nirim.

¹⁰Aku-sipa enini walsipa kene yunu-ni enini pali nem-nemi nimba kanupa kene ki kukuli yi kanilindu nimba mele: “Nunga kili sunu si.” nirim kene yili-ni yunga kili sunu sirim kene ki kolupa kukurumele alsupa kamu kaí lirim.

¹¹Aku-sipa tirim kanuku kene arerembi lakuku kolku eni-enini anju-yandu tombulku niku mele: “Tepa kis-sikimeliinga yunu nambulka teamiliye?” niku muluring.

¹²Penga walse sumbulsuli Yesos yunu Pulu Yili-kene popu topa ung nimbándu ma-pangi tenga ola pupa Pulu Yili-kene popu topa ung nimba mulupili kolea tangurum.

¹³Ipulam-ui yunu lumbili andúlimandu “Wai.” nimba kene ‘Eninga yi engkaki-rurepu nanga kongunale tenjangi liipu mundambu.’ nimba kene yi akuma makó topa kene eninindu nimba mele: “Eni ‘Nanga kongunale tenji-pangi.’ nimbuliinga liipu mundukur yima.” nirim.

¹⁴⸤Yi rurepu makó turum kanumanga bima i-sipa mele:⸥ Saimon (yunga bi te Pita) yunu kene, Pita angin Endru kene, Jemis kene, Jon kene, Pillip kene, Batollomiu kene,

¹⁵Matyu kene, Tomas kene, Alpias-nga málu Jemis kene, “Oliu Juda-yambuma oliuliu gapman molamili.” niring talape-yi Saimon kene,

¹⁶Jemis málu Judas kene, Judas-Iskeriot, Yesos penga liipa ele-túma sirim yili kene, ⸤yi akuma ‘nanga kongun tenji-pangi liipu mundukur.’ nimba makó turum yima⸥.

¹⁷Kanu-kene yunu kene, yunu-ni “Nanga kongunale tenji-pangi.” nimba liipa mundurum yi kanuma kene, ma-pangina mania uring kene yunga lumbili anduring yambu pulele kene, kolea Judia distrik muluring yambu pulele kene, kolea-auli Jerusallem piring yambu pulele kene, numú-kusa kéluna lirim kolea-auli Taya kene Saidon-selenga piring yambu pulele, yambu akuma yunu mulurumna sukundu-sukundu oku liiku máku turing.

¹⁸Yunu temani-kaí topa, ung-mani sipa tirimele piliingíndu uring kene, yunu-ni enini kuru turum yambuma ‘Tepa kaí tipili.’ niku uring. Eninga yambu mare numanuna kuru kis mulurumuma tepa kaí tirim-ko.

¹⁹Kuru tuli yambuma tepa kaí tili tondulale yunu-kene pípili mulurumeliinga enini uringma pali ‘Yunu ambulumulú.’ niku yunu mulurumna nondupa-nondupa uring. Kanu-kene oku yunu ambuluring kene tondulu kanili-ni enini pali tepa kaí tirim.

²⁰Kanu-kene Yesos mania molupa yunga lumbili anduli yima olandu-sipa kanupa kene eninindu nimba mele: “Eni korupa pulimúma Pulu Yili eninga yi nuim kingele molupa eni nokulemáliinga eni “Numanu kaí pípili molku konjangi.” nilimú kupulanum-na molemele.

²¹“Eni ekupu engle tolemúma eni penga walse olu tembaliinga eni “Numanu kaí pípili molku konjangi.” nilimú kupulanum-na molemele. “Eni ekupu kola telemelema eni penga walse tae tingéliinga eni “Numanu kaí pípili molku konjangi.” nilimú kupulanum-na molemele.

²²“Mania Omba Mana-Yi Au Talurum Yili piliiku molemele yambuma, eni nanga yambuma molemeláliinga we-yambuma-ni eni-kene numanu kis panjiku, “Oliu molemuluna anjupa pai.” niku, enindu “Eni yambu kísima.” niku, niku kis-siku, eninga bima piliiku kis piliiku tingí kene eni “Numanu kaí pípili molku konjangi.” nilimú kupulanum-na molemele.

²³“⸤Yambuma-ni eni aku-siku mele telemeláliinga⸥ eni mulú-koleana pungí kene kanuna ⸤Pulu Yili-ni⸥ eni méle kalupa konjumbaliinga ⸤yambu kanuma-ni eni aku-siku teku kis-singí⸥ kene numanu lakuku siku, numanu aima kaí pípili molai. Yambuma-ni ekupu eni mindili silimele mele akili, aku-siku eni naa molangi kóru-ui Pulu Yili-ni “Ninjai!” nimba ung nimba sirimuma piliiku yambuma niku silsiliiku anduring yambuma we-yambuma-ni enini kepe mindili siringko kanili.

²⁴“Akiliinga-pe eni kamako lelemelema, ekupu eni molku konjuku numanu kaí pípili molemele mélema kórunga nosulimele, pe aku-siku naa mulungéliinga mindili noku molku kis-singí.

²⁵Eni ekupu olu telemú yambuma penga walse engle-ni kulungéliinga mindili noku molku kis-singí. Eni ekupu tae telemele yambuma penga walse eni kola tingéliinga mindili noku molku kis-singí.

²⁶We-yambuma-ni pali eni kape niku taki-taki enindu “Yambu kaíma.” ningí kene eni mindili noku molku kis-singí. Yambu kanuma-ni enindu ung kaíma niku kape ningí mele ui eni naa molangi kóru-ui Pulu Yili-ni “Ninjai!” nimba ung nimba sirim ung te naa piliiku we gólu toku yambu niku siring yambumandu yambu imanga anda-kolepalima-ni ung kaíma aku-siku niringko. ⸤Pulu Yili-nga ungma sumbi-siku niring yambumandu kape naa niku mindili siring kanili.⸥” ⸤nirim.⸥

²⁷⸤Aku-sipa nimba kene Yesos-ni we muluring yambumandu nimba mele:⸥ “⸤Akili na lumbili andúlimandu niker⸥ akiliinga-pe na-ni ung nikerele piliiku molemele yambuma, enindu ung te kene wasie niambu piliangiko. Eni eninga ele-tu yambuma numanu monjuku, eni-kene numanu kis panjilimele yambuma teku kaí teai.

²⁸Enindu ‘Yambu kísima kene molku kis-sangi.’ nilimele yambumandu anju munduku ‘Yambu kaíma kene molku konjangi.’ niai. Eni teku kis-silimele yambuma ‘Pulu Yili-ni membu sipa liipa tapunjupili.’ niku eni eninga popu toku mawa tenjai.

²⁹“Yambu te-ni nunga kumbi-keri ekendunga lkarauwa-ni tomba kene topele toku ‘Ekendunga kamu lkarauwa-ni tupili.’ ni. ‘Nunga wale-pakuli sulu kaiéle liimbú.’ nimbá yambale nunga wale-pakuliele kepe ‘pali we liipili.’ ni.

³⁰“Mélema si.” niku mawa tingí yambuma pali mélema we si. Nunga mélema we liimba yambalendu “Alsukunu nanu si.” ni naa niani.

³¹“‘Yambuma-ni nu-kene teangi.’ niku piliillu mele, nu-ni anju yambuma aku-sikunu ti.

³²“Ulu-pulu-kis telemele yambuma kepe enini anju-yandu kondu kolemele kanili piliiku kene eni yandu kondu kolemele yambuma mindi kondu kulungéle kapula mólu. Eni kanuku kis piliilimili yambuma pali kondu kolai.