Luk 6:2-32

²Ame gapan, Parisi nagire upi yawamo anega wan, “E iwa dimen pura bawarewa iup nuga paina yamat wanin?”

³Iesu iup namua tavewa wadiamopen menan anega gare wadiamon, “Wataget da apan Devit evene wai den enup aguguramon tani oisewa ok gapan e iravi batnak anuyan.

⁴Devit enup agureni menan God Paewa unuk ae amba God men taba buredi tugu sean, ian pirisi mugenat nainewa, ame iup mega den go me ware nan. Amba upi evene wai munen nane.”

⁵Iesu wani sia anega wadiamon, “Ne Kimani Vitana Apanewa pura bawarewa ayopewa menan ne dim da umap wapena, ameme di.”

⁶Amba Diu pura bawarewa mugawa dawa gapan, Iesu Diu opata waine paewa unuk ae waenapan wadidiam wandin. Apan da, naniwa nutup parasi tani, ap mepe den wanden.

⁷Iup wadidiamuine ge Parisi nagirewa den Iesu enu yawa wapen anun. Ap menan Diu pura bawarewa, ame wagat wamewa gapan, Iesu apan ame wat inakameta go uon menan yama yama yaviwanumun.

⁸Go mu imumu gapan ame anuiwanumune, Iesu me asigip tan menan nani parasi dena apanewa anega dien, “Onak, waenapan namumup mapa yon.” Wani apan ao yone ase ma one namup yonen.

⁹Iesu waenapan inamup anega wan, “Ne singui wayawaian. Nu pura bawarewa iup nuga dim da waiwan? Pura bawarewa gapan waenapan inamup kakaewa tain go koewa tain? Mu inakam mumain go waenapan wa danigam mumain?”

¹⁰Wani amba Iesu yangut ikukuk yawam naumo aeni, boge apan nani parasi dena ame anega dien, “Naniga ase endimat.” Me ase endimaseniwa boge kakae tan.

¹¹Go iup wadidiamuine ge Parisi nagirewa ame, anu dagimen, no kwapi aran, Iesu inap dim da tapen noa barim wanumun.

¹²Wam ame gapan Iesu God inap mup wapen menan togan da dot aen. Mum ame, ap mepe yaugai wande, God inap mup taiwandin, woup sen.

¹³Woup seni, wadiamot mega iragi munan wan, tauane amba apan aonagaet pusinawan dere om enumo, yaumu watu enamot mega nagirewa diamon.

¹⁴Ame yaumua mam. Saimon (yaua dawa, Iesu dieni ame Pita), ge Saimon gwaniwa Anduru, ge Diemis, ge Dion, ge Pilip, ge Batolomio,

¹⁵ge Matiu, ge Tomas, ge Diemis (mamewa Alopias), ge Saimon (waenapan mega men yonini apanewa),

¹⁶ge Diudes (mamewa Diemis), ge Diudes Iskeriot (Iesu omine wapi apanewa). Watu enamot mega nagirewa yaumua ameme.

¹⁷Boge Iesu tunupa aupa wandeni watu enamot mega tanamo aoma vitan pona yonan. Ap mepe, wadiamot nagirewa aruga wanumone. Mu arugataet at Diudia ge pa Ierusalem amba puiman etop pa sewa dere Taya ge Saidon gapan tauan.

¹⁸Mu Iesu nop mega anupen menan amba vek muga ugup ugup, ge airampu wa koeragam mumini nagirewa, wat inakam mumapen menan tauan. Iesu amun mega tau aen amba iravi wat inakam mumiwandin.

¹⁹Ap menan, waenapan iragi Iesu inasepen taiwanumun, iwa aro amun me gamupewa ase tau aiwandini. Ap gapan mu iragi inak wariwanumun.

²⁰Iesu wadiamot megawa anega wadiamon, “Kayakayawan taiana nagirewa aton anun, iwa God menan anuyan gututuguyan taiana, menan God toemu mega ame egawa.

²¹Amba e da da enup iniana nagirewa, e aton tan, iwa evi amba kiman maup mega gagap dorai. Amba irip turup waiana nagirewa aton anun, iwa evi amba top wa aton tai.

²²Amba, piup gapan waenapan da da anu koeam imaepi, o tandayat imaepi, o nipep diaepi, amba yauya wa koeamepi, e aton anun, iwa ne Kimani Vitana Apanewa, nenan itan wariwaniana menan.

²³Wam ame tauepi aton anun, imuya tarep warep, iwa e garewa wara wara arita iragen, aupa kiman gapan enan wanden, amat taiwan. Aton anun, iwa ta koeragam imaine nagire, omaya baewa God nop mega waiwanumune nagire, ap umap wa koeragam mumane.

²⁴Ae kaiwan, e puraput nagirewa. Aton endi anuiana wam da uon tata.

²⁵Kaiwan, e endi maup nagirewa. Enup evi amba araeta. Kaiwan, e top waiana nagirewa. Evi amba bagu sisi anui irip turup wai.

²⁶Ae kaiwan, e da wa da ta taiana nagirewa, yauya waenapan ao warine go tavewa uon, iwa wataget mu omae baewa, God nop mega tave uoni waiwanumune nagire, yaumu ap umap ao sia di wariwanumun, go mu wanene muga aigap warane.”

²⁷Iesu sia anega wadiamon, “E darinaya den, wapena anun. Anavi egawa munan anu guran, amba anu koeam imaine nagirewa, e yonan inamup kakaewa taiwanian.

²⁸Wa koeragam imaine nagirewa, munan God inap mup wan. Nipep diaine nagire, gare wa aipakam muman.

²⁹Amba orup da nawaneyap topi, gare ya tone go nawane yamu entanene sia top. Amba orup da etuya okome da ega aigape warupepi wanup gauarape men den wapi, ya watanane, ae veane, da den di warep.

³⁰Waenapan da da mup inayap wapi, e di munan. Amba orup da dim dim ega warepi, waseasepen menan sia ya wane.

³¹Menan waenapan e inayap dim dim da tat anuianawa, e mu inamup, ap umap sia tan.

³²Waenapan imumu potamu inayap warepi, e gare munan mugenat anu mumane, ap gapan God wat aipakam mega ya warai. Iwa koewa taine nagirewa evene wai den muk gare gare baigan ap anega taiwanum.