LUKA 6:2-32

²Má te Parisaio di mákái má dik gálta ngo, “Suri dánih kam kalilik án aratintin di longoi ngoro minái má uri nagogon kángit a parai ngo koion á longoi ngorer i bungán aunges?”

³A kos di ái Iesu ngoromin, “Ngádáh? Kápgamte wás pasi besang gut suri tatalen ngoromin a longoi ái Dewit i pákánbung a matpám tiklik mai rang turán?

⁴A kusak uri rum si Káláu má a top pasi beret erei di artabar mai uri narsán ái Káláu, má a ani, má a tari mul singin rang táir má di mul di ani. Má uri nagogon kángit, beret er a tam arwat mai bos tám osmapak masik sár da ani.”

⁵Mái Iesu a sopasun kán worwor mul ngoromin, “Má Natun Kálámul a konom ur on á bungán aunges.”

⁶I kesi bungán aunges mul, ái Iesu a kusak uri rumán lotu má a atintini matananu iatung. Má kesi kálámul iatung a mat i limán er mingin.

⁷Má te tám mánán uri nagogon má te Parisaio di mangwa Iesu iatung. Di nem suri da mákái ngo ái Iesu na araliu i bungán aunges, má ngorer da atiutiu Iesu suri.

⁸Mái sár ngo ái Iesu a mánán i kándi holhol má a parai singin kálámul erei a sák i limán ngo, “Una lákám má unák sámtur main.” Má kálámul erei a aptur má a sámtur iatung.

⁹Mái Iesu a parai si di ngoromin, “Ina gálta gam. Bos nagogon kángit, di atintin git suri dánih gita longoi i bungán aunges? Bung uri tángni matananu ngo bung uri longoi sápkin? Kol bung suri aliu pas di di sasam suri da liu kuluk? Kol gita tari bah git uri kálámul suri nák mat?”

¹⁰Má namur a mákmák aririu i di no ái Iesu má a parai singin kálámul erei ngo, “Una anokwai limam!” Má kálámul erei a longrai ngorer má ák anokwai limán, má limán áng kuluk kaleng.

¹¹Má tan tám mánán uri nagogon má tan Parisaio di mákái ngorer má dik bálsák, má ngorer di nguruk arliu i di sang suri dánih má da longoi mam Iesu.

¹²I bung erei, ái Iesu a tapam urami pungpung suri na sung, má ngorer i kunlán pákán libung no erei kán tu sung uri narsán ái Káláu.

¹³Má ngo ákte arasa má, a kilkilai rung di lu murmur on uri narsán sang má a ilwa pasi sángul mai aru tili di uri kán kalilik án aratintin, má ngorer a utung di mai tan apostolo mul. Má minái á ngis di á sángul mai aru á kalik án aratintin:

¹⁴ái Saimon, koner ái Iesu a tar ngisán mul mam Petero; mái Enru, tuán ái Petero; mái Iakobo; mái Ioanes; mái Pilip; mái Batolomi;

¹⁵mái Mataio; mái Tomas; mái Iakobo mul natun ái Alpius; mái Saimon, kálámul a tur rakrakai suri da sikra palai kurtara alari Israel;

¹⁶mái Iudas natun ái Iakobo; mái Iudas Iskariot, ái koner na agur tar Iesu.

¹⁷Má namur ái Iesu a sosih tiklik mai marán rang táir tilamuni pungpung má dik han sámtur iatung i belbelen pokon. Má lala matananu til Iudáiá má Ierusalem má tiladi kon pátmi aru malar á Tair má Sidon, di hut talum no iatung suri longrai kán pinpidan ái Iesu má suri na asengsegeng i di alari kándi toltolom sasam er a porta i di.

¹⁸Mái rung er a lu bal angulngul di i sápkin tanián, di purut mul, má ái Iesu a asengsegeng i di.

¹⁹Má matananu di tohtoh suri sigil Iesu kabin kán rakrakai a asengsegeng i di no sang.

²⁰Mái Iesu a soklatán má ák lu mákái kán kalilik án aratintin má a parai si di ngoromin, “Gam er gam sáhár on á liu minái, gam kuluk pala, kabin gama kusak uri lolsit si Káláu mái Káláu na kátlán i gam.

²¹Má gam kuluk pala á gam onin gam matpám, kabin namur gama lala mas. Á gam gam lu tang, gam kuluk pala, kabin namur gama nong.

²²“Má gam kuluk pala mul ngo matananu di lu mikmikwa gam má ngo di lu wás pala gam alar di, má ngo di wáng i gam, má ngo di para bengta gam kápkabin suri Natun Kálámul.

²³Káksiai sár, rang támin i di dikte longoi ngorer mai tan tám worwor tus hirá be. Má ngo di longoi ngorer mam gam mul, gama parmat má gama mil mai laes, kabin namur kamu arul na pakta ami bát.

²⁴Mái sár á gam erei gam konom onin, gamáte sák, kabin ngo gamáte otoi má i tan táit uri akuluknai bál gam.

²⁵Má gamáte sák á gam gam mas onin, kabin namur gama matpám besang! Má gam gam lala nong onin, gamáte sák mul, kabin namur na tinang i bál gam má gamák tang.

²⁶Má gamáte sák á gam ái rung er di lu para agas gam onin, kabin ngo rang támin i di sang dikte para agas di mul á tan angagur án tám worwor tus.”

²⁷Mái Iesu a sopasun i kán aratintin mák parai ngoromin, “Mái sár ina parai si gam erei gam longra iau ngo gama mámnai kamu tan kurtara. Má ái rung er di mikmikwa gam, gama abálbál pas di.

²⁸Má gama tari arasosah si di mul ái rung erei di wah i gam. Má ái rung erei di wáng i gam, gama sung Káláu sur di.

²⁹Má ngo tekesi kálámul na posri parim, una káksiai suri nák posri mul i kesi balsán parim. Má ngo tekesi kálámul na long pasi tekesi lusán i iáu, kái una ruti á kes, una bál tari mul singin.

³⁰Ái rung di sung iáu suri táit, una tari sár si di. Má ngo tekesi kálámul a lu kip bia i kam te dánih tili kam arlih, koion una hustap on suri ngo na tar kalengnai singim.

³¹Gama lu longoi mai matananu á matngan tatalen erei gam nem on ngo da longoi mam gam.

³²“Ngo una mámnai sár i kálámul a lu mámna iáu, suri dáh da para agas iáu? Wa tan tám sápkin di lu longoi ngorer mul, di lu mámna pas rung erei di lu mámna di sang!