Lucas 6:2-32

²Zee lee lak fariseo mnabdizh lo xaa: —¿Chozhiin nle re gu kwaan nanzhaalt le gu zhe sab?

³Jesús mkeb nzhé lo re xaa: —¿Che zer lab re gu Xkyech Dios kwaan mle David tub welt leezha ngok nlaan xaa nu ngok nlaan re xmig xaa?

⁴Mzeeb xaa leen yidoo cheen Dios, nu mzen xaa re pan kwaan nak cheen Dios ndaw xaa, kwaan nebse re ngwleyy nzho mod gaw nu noka mzaa xaaya ndaw re xmig xaa.

⁵Nu noka nzhé xaa: —Na nak Xaa Mzhin Ngok Myet nu nkano na yalnabeyy zee nzho mod nabeey na zhe sab.

⁶Lee stub sab, zhe kwaan nzholl re xaa Israel lo Dios, Jesús mzeeb pa nkasa xaa Israel nu mzelo xaa mseed xaa re xaa. Nu baa nzo tub xaa mbizh yaa lad li.

⁷Nu lee re maestr xaa nlu xtizh Dios nu re fariseo mlach lo Jesús zee nen che sekwen Jesús xaa ne nzak zhe sab, zee sbaa nzho mod gaazh xaa tub kwaan tich Jesús.

⁸Per lee Jesús nela nen cho kwaan nle re xaa xgab, zee nzhé Jesús lo xaa mbizh yaa: —Guxso nu bzoli xsaww lo re xaa. Lee xaabyi zee nguxso nu mzoli.

⁹Zee Jesús nzhé lo re xaa nzhi baa: —Nal lee na nabdizh tub kwaan lo gu: ¿Xana kwaan nzho mod le re myet zhe sab, kwaan wen o kwaan nawent? ¿Che wen sekwen xaa tub myet, o gut xaa tub myet?

¹⁰Zee mwii Jesús lo rese xaa nzhi lo Jesús, nu zeera nzhé xaa lo xaa mbizh yaa: —Bseli yaa lu. Lee xaabyi zee mseli yaa, nu gorzee lee yaa xaa ngokwen.

¹¹Per lee re fariseo nu re maestr mzhaal xyan doo, nu mzelo re xaa mkediizh xaaya, zee ne cho kwaan nzho mod gaazh xaa tich Jesús.

¹²Nu tub mbizh zee, Jesús ngwa yek tub yi zee wdizhno xaa Dios dubse yaal.

¹³Nu gorna ngunil yizhyo, Jesús mrezh re xaa mseed lo xaa, nu lo re xaa mseed lo xaa mleey xaa chiibchop xaa zaa xaa yalnabeyy cheen xaa lo.

¹⁴Snee le re xaa mkayaa yalnabeyy lo xaa: Simón (xaa mlole Jesús Pér), Ndres (wech Simón), Chag, Juan, Lip, Tol,

¹⁵Teo, Max, Chag (xgann Alfeo), Simón (xaa nkedoola lazh),

¹⁶Judas (xgann Chag), Judas Iscariote (xaa mzaa Jesús lo re xaa mbit xaa).

¹⁷Zee mbare Jesús naz yek yi kwaan re xaa mreke tich xaa, zee mzhin xaa tub pa lach. Baa mkasa re xaa mreke tich xaa nu noka zyen doo re myet stub naz yezh ngwa lo xaa: re xaa nze yezh Jerusalén, nu re xaa nze re yezh cheen Judea, nu re xaa nze rop yezh Tiro nu Sidón kwaan nzho roo nistoo. Mzhin re xaa baa zee kenzha xaa kwaan zaa Jesús kwent nu noka zee sekwen Jesús re yalyizh cheen xaa.

¹⁸Nu rese xaa nded bid lo re mbi mal, xaa nzho lo re xaa ne, msekwen xaa xaa.

¹⁹Kwaanzee rese xaa nzhekla gal cho Jesús, nel ne re xaa cho Jesús nroo yalngezh sekwen re xaa ne nzak.

²⁰Jesús mwii lo re xaa mseed lo xaa nu nzhé xaa lo re xaa: —Wen re gu xaa prob, nel lee pa nabeyy Dios gak xcheen re gu.

²¹’Wen re gu xaa nlaan nal, nel lee re gu gak xaa yazhe lextoo. ’Wen re gu xaa nzhonn nal, nel gwluzh lee re gu xizh.

²²’Wen re gu xaa nded bid xaa ngwii lo na, Xaa Nyaad Ngok Myet, gorna yii re myet lo gu, nu gorna koo re xaa gu yezh, nu gorna nge re xaa lo gu, nu gorna nanzheklat re xaa gon xtizh re gu.

²³Byakdoola gu, nu nix doo gok lextoo gu re mbizh ba, nel re gu kayaa kwaan gro doo naz leen yiba; nel sbaaka mnayii re xaa ne re xaa mzaa kwent kwaan nzhé Dios lo lee xaa yilo.

²⁴’Per nales ded re gu xaa rik nal, nel mkanola gu rese kwaan mle zee nix doo nzhak lextoo gu.

²⁵’Per nales ded re gu xaa nkano zyen doo kwaan nzhaw, nel gu gak nlaan. ’Per nales ded re gu xaa nxizh nal, nel lee re gu gonn nu gak nales doo lextoo.

²⁶’Per nales ded re gu xaa wen nii re myet lo nal, nel sbaa ngunii wen re myet lo re xaa mbezh mzaa xaa kwent kwaan nguné Dios lo lee xaa yilo per nawlit xaaya.

²⁷Noka Jesús nzhé: —Per lee na nii lo re gu, xaa kayon xtizh na: Bkela gu re xaa nayii ne gu, ble gu wen lo re xaa nzhedizh nawent lo gu.

²⁸Nii wen gu lo re xaa kwaan nxobde lo gu, nu gunaab gu lo Dios kwent cheen re xaa nii wdizh nawent lo gu.

²⁹Chelee tub xaa la panyet tagarlo gu, noka bzaa gu stub tagarlo gu la xaaya. Nu chelee tub xaa nzhekla kiib xchamar gu, noka laa gu kiib xaa xkamis gu.

³⁰Nu loka cho xaa naab tub kwaan lo gu, zaa guya lo xaa, nu chelee tub xaa kiib tub xcheen gu nayét gu lo xaa: “¿Ma xcheen na?”

³¹Mod nzhekla gu le xaa lo gu, sbaaka ble gu lo xaa.

³²’Chelee gu nkela gu nebse xaa nkela gu, ¿xana kwaan wen le gu gan? Noka re xaa nzeb jwalt snee nle.