LUKA 6:2-32

²MaFarizi amohiwa yahimukohaga, yiiraga: “Dhinakooddihiwa nlabo na Sabuddu, muneerelana ddi?”

³Yesu ahawaakulaga, wiira: “Nyo kamweelengile dheerile Davidi ni akwaaye aganna dala?

⁴Ahivolowaga nyuba ya Mulugu, othukula mikaathe dhoreelihiwa, oja. Waavaha ale yannigiyena. Mikaathe nde dhihinarumeedhihiwa ojiwa bure mbwenye anamakutha weekiwa.”

⁵Yesu ahenjedhedhaga, wawaaddela: “Mwana a Muthu dili Nabwiya a Sabuddu.”

⁶Sabuddu mmohiya, ahivolowaga nyuba ya malobelo, egi osuuziha. Vano, mwemule mwahikalaga mulobwana mmohi akwile ndada na moono wooja.

⁷Anamasuuziha a malamulo ni maFarizi yoomusugwaga, esayelaga woona akala amuyilihe muthu nlabo na Sabuddu wi ekalena yomusumelela.

⁸Mbwenye Yesu aganonile moobuwelelo eewa, ahimwiirelaga mulobwana ole. “Venya, osusedhe vaari va.” Oliye ovenya, okala owimeleene.

⁹Vano Yesu ahawiirela aliwa: “Ginowukohani, munoona havi? Nlabo na Sabuddu dhinarumeedhiwa siivi? Wiira dhapama, naari dhabure? Ovulumusa, naari opa?”

¹⁰Vano ahasugwaga, yamwapelege, omwiirela mulobwana ole: “Katapula ndada naawo.” Oliye wiirana ndo, ndada oyila.

¹¹Mbwenye aliwa yahitakaleliwaga vajinjivene, okanganelaga mwakaleligiisu esayelaga dhoofuna omwiirana Yesu.

¹²Nlabo nimohi mwa mudhidhi olene, Yesu ahidhowaga wi alobele omwangoni. Ahivireliwaga mahiyu mateene alobelaga wa Mulugu.

¹³Vano ogasile, ahawiithanaga anamasuuza aaye, waasakulavo kumi ni abiili, mwa ayene. Waasakulavo, yaavahiliye ndina na arumiwi:

¹⁴Simawu, amvahiliye ndina na Peduru; ni Andere, ddibilaaye; Tiyago ni Zhuwawu; Filipi ni Baritolomeyo;

¹⁵Matewuzi; ni Tome; Tiyago, mwaana wa Alifiyu; ni Simawu, eeriwa Muzeloti;

¹⁶Zhuda, mwaana a Tiyago; ni Zhuda Esikariyothi, ole ampelekile Yesu.

¹⁷Yesu, vamohi ni anamasuuza aaye, yakitaga omwangoni. Ahiimelaga vamusewasewani vatugumanege anamasuuza ajinjeene, ni muthithi mulubale wa athu amohi, yadheelaga murudda wateene wo oZhudeya, ni oZheruzalemi, ni a seresere ya nyaza yo oTiru ni oSidoni.

¹⁸Yadheelege omwiiwa ni oyilihiwa dhiredda. Ale yarabulihiwa ni mineba dhabure yooyilihiwa.

¹⁹Anamwinji ateene yoosayelaga omukahinya, vowi kopolo dhookuma mwa Oliye, wayilihaga ateene.

²⁰Vano Yesu ahawang'anaga anamasuuza aaye, wawaaddela, wiira: “Oreelihiwa di nyo, mwihinna yego, vowi Omwene wa Mulugu bweenyu.

²¹Oreelihiwa di nyo mwinna dala dhiinova, vowi muneere orubala. Oreelihiwa di nyo munaandda dhiinova, vowi muneere oteya.

²²Oreelihiwa di nyo athu yowiiddani, ekoodda weedda ni nyo, yuruwanagani, enyemulaga ndina neenyu woona nabure, mwaha wa Mwaana a Muthu.

²³“Teyelani nlabo nenddo, agalalani ni olupa mwaha wi yothuviwa yeenyu si yulubale odhulu. Vowi yeere ndo awale-wale eewa ni anamavuhulela.

²⁴“Mbwenye ooddilu di nyo oreela, vowi muhakela yowuhagalasani.

²⁵Ooddilu di nyo munarubala mudhidhi ola, vowi munodha mvoliwe. Ooddilu di nyo munateya dhiinoveva, vowi munodha mukubanye ni wuundda.

²⁶Ooddilu di nyo, yootamalagani athu ateene, vowi awale-wale eewa yeerile ndo ni anamavuhulela ooratha.

²⁷“Mbwenye Ginowuwaaddelani nyo, munagiiwa: Mwaadhivelege amwiiddani eenyu. Mwawiirelege dhapama ayene enowiiddani.

²⁸Mwareelihege ayene enowulumelani, mwalobelelege ale enootabusani.

²⁹Ole onoddwadhani mbarutuni, mmurugunusedhe kukuru emohi. Onowaakani kazako, kamukooddihedhe wuwaakani maleyaya.

³⁰Mwaavahege ateene enoolobani, ole onathukula eli yeenyu, kammusanye wi owelihedheni.

³¹Dhatedhene dhinafuniinyu wi athu yuwiirelegeni, nyo mwawiirelege aliwa.

³²“Mwaadhivelaga alene enoodhivelani, munadha muthuviwe ddi? Anamathegeene enowaadhivela teto alene enaadhivela aliwa.