Lucas 6:2-32

²Meneng minikagi se menge Parisiyo, “Doen punù ingkeliwat i Moises te keilangan eked pegterbaho se otaw te aldaw te peg-etod. Nengà lay wedà kaw tolò kenyan?”

³Timaba si Jesus, “Kenà medaet se ininang dan. Nelibelan niyo besi aw eden se insolat kidoen te kagi te Timanem tepad te ininang i David gebii. So binallos sikandin aw menge sondalo timaking kandin,

⁴yan minawop sikandin diyà te balay te Timanem, aw kinaen din se pan imbegay diyà te Timanem. Yan heman se impekaen din diyà te menge doma din. Pengkey doen punù ingkeliwat i Moises te mepakay olò iyan kànen te menge pengolo te simbahan, meneng kenà medaet se ininang i David.”

⁵Minikagi heman si Jesus, “So siak se Timanem Migpekeotaw, mepakay aw siak se mikagi aw eden se mepakay inangen aldaw te peg-etod.”

⁶Nayan, pegdateng te doma aldaw te peg-etod, dimoton si Jesus te simbahan te Judiyo, aw migtoladà. Doen otaw kidoen nekepis se belad din kowanan.

⁷Doen heman kidoen menge Parisiyo aw menenoladà te punù ingkeliwat i Moises. Nengemahà dan te idimanda dan tepad ki Jesus, aw yan se doun te gayed dan timengteng diyà kandin aw megpegolì sikandin te otaw doen mesakit te aldaw te peg-etod.

⁸Meneng netegahan i Jesus se aneng-aneng dan, aw minikagi diyà te otaw nekepis se belad, “Tindeg ka, aw diyà ka kanak.” Penga niyan, timolò se otaw ki Jesus aw dimoton kandin.

⁹Minikagi si Jesus diyà te otaw timengteng kandin, “Doen insà ko kenyo tepad te punù ingkeliwat i Moises. Eden lay se mepakay inangen tadon te aldaw te peg-etod? Meg-inang kidon lay te mèpiya, aw meg-inang kidon te medaet? Megtabang kidon lay te doma otaw, aw mengimatay kidon te doma?”

¹⁰Penga niyan, timengteng si Jesus diyà te kedita dan, aw minikagi diyà te otaw nekepis se belad, “Oladi se belad nikaw.” Pegtolò din, migkèpiya iyan.

¹¹Meneng ontò neopal se menge Parisiyo aw menenoladà te punù. Yan migpebelaw-belaway dan aw menonen dan si Jesus.

¹²Nayan, wedà kenamay, timikedeg si Jesus doton te bontod amon megtawal-tawal. Timayod sikandin te delem aw migtawal-tawal diyà te Timanem.

¹³Pegkeiselem, tinawal din se kedita te otaw tinoledaan din. Penga niyan, pinemallì din se sempolò teg dowa otaw megtelaban kandin, aw iningedanan din dan menge apostol.

¹⁴Sikandan si Simon iningedanan i Jesus ki Pedro, aw kedowa din si Andres, aw si Santiago, si Juan, si Felipe, si Bartolome,

¹⁵si Mateo, si Tomas, aw si Santiago batà i Alfeo, aw si Simon meyseg,

¹⁶aw si Judas batà te kesangay i Santiago, aw kesangay din si Judas Iscariote, sìyan migtolok ki Jesus.

¹⁷Nayan, timopang si Jesus tinekingan te menge tinoledaan pinemallì din, aw timindeg dan kidoen te tanà mepantal. Ontò medita se otaw gayed egtaking kandan, aw minakop diyà kandan se ontò medita otaw lekat te kedita te lonsod sakop te probinsya te Judiya, aw lekat te Jerusalem, aw pengkey lekat te Tiro aw Sidon medapag te dagat. Netipon se kedita dan amon menenalan ki Jesus, aw amon kegolian se mesakit dan.

¹⁸Dimoton heman kandin se otaw dinetengan te bosaw aw migkèpiya dan.

¹⁹Migtelaman se kedita te otaw memaed kandin, so doen tolos din aw yan se doun te nekebatog sikandin migpegolì te kedita dan.

²⁰Penga niyan, timengteng si Jesus diyà te menge tinoledaan din aw minikagi, “Doen keluba te kedita niyo sagkep, so lomowan se Timanem diyà kenyo.

²¹“Doen keluba te kedita niyo binallos seini, so mebesog kaw. “Doen keluba te kedita niyo nelidò seini, so sinelayen kaw te Timanem.

²²“Doen keluba te kedita niyo kebensihan te doma otaw, aw pemilangen, aw tompuyusen, aw tindàten tandà te pegtaking niyo kanak Timanem Migpekeotaw,

²³so egtindàten heman te kemonaan dan se menge telekeliwat te kagi te Timanem gebii. Aw yan se domateng diyà kenyo, keilangan ontò kaw meluba, so ontò mèpiya se ontong ibegay kenyo kidoen te langit.

²⁴“Meneng mekelelayò kaw meyeyaman, so doen den kelubahan niyo aw wedad pa ibegay diyà kenyo.

²⁵“Mekelelayò kaw menge otaw doen den kelidoan niyo seini, so bellosen kaw. “Mekelelayò kaw egkebebayat seini, so doen aldaw domateng aw mepuluk kaw aw megkelag kaw.

²⁶“Mekelelayò kaw aw iduyun kaw te kedita te otaw, so induyun heman te kemonaan niyo se otaw migpelingo-lingo telekeliwat te kagi te Timanem.”

²⁷“Meneng seini se kagi ko diyà te kedita niyo nenenalan kanak. Kedekeli niyo te pedowan se poon niyo. Inangi niyo se mèpiya diyà te otaw egkebensi kenyo.

²⁸Pemoyò kaw diyà te Timanem te keidowan din se otaw egpenollon kenyo. Pegtawal-tawal kaw heman diyà kandin tepad te otaw egtompuyus kenyo.

²⁹Aw sempaken kaw diyà te pisngi, pesempaki niyo heman se dibaloy. Aw legesen kaw memegay te ekasan niyo, begayi niyo heman se saol niyo.

³⁰Pemegay kaw diyà te otaw memoyò kenyo. Aw doen mengabat te kedònan niyo, ikà niyo egpeolì.

³¹Aw meibeg kaw te mèpiya se inangen te doma otaw diyà kenyo, keilangan mèpiya heman se inangen niyo diyà te doma otaw.

³²“Aw olò otaw doen dakel pedowan diyà kenyo se kedekelan niyo te pedowan, eked kaw duyuni te Timanem, so pengkey otaw kenà egpenimanem, dakel se pedowan dan diyà te otaw doen dakel pedowan diyà kandan.