Lucas 6:2-32

²Di pigsagman sikandan to mgo Pariseo. Kagi dan, “Hoy, nokoy no ogyapas kow man to Aedow no Tigpahuway?”

³Si Jesus to migtabak. Kagi din, “Ajaw now og-ilinga no wada kow makabasa to pighinang ni Hari David to diya una no bontason sikandin dow mgo duma din.

⁴Migsed sikandin duon to bayoy to Diyus aw pudut to pan no inghalad to Diyus. Pigkoon din aw bogaji to mgo duma din. Na, ojow pa to mgo balaod to tinuuhan ta, iyan da ogpakakoon to sikan to mgo magdudumaya to tinuuhan ta. Di manno kinahangyanon yagboy, wadad sapadi si David.

⁵Na, siak no Anak to Otow iyan meyduon katongod to pagboot to Aedow no Tigpahuway.”

⁶Duon to yain no Aedow no Tigpahuway, migsed si Jesus duon to simbahan aw pang-anad. Mey otow duon no pawing to kalintuu no boyad.

⁷Pigpaniidan yagboy si Jesus to mgo maistru to tinuuhan dow mgo Pariseo, su ko padojawon din sikan otow duon to sikan no aedow, meyduon igkariklamu dan kuntra kandin.

⁸Di namaanan ni Jesus to hona-hona dan. Pig-ikagihan din sikan pawing, “Yagi, tindog ka duon to kabaknaan.” Dajun tindog sikan otow.

⁹Dajun usipa ni Jesus to nahimun no mgo otow, “Andei man to intugut to balaod to tinuuhan ta no oghinangon duon to Aedow no Tigpahuway, madojow ko madoot? Pagyuwas to kinabuhi ubin paghimatoy?”

¹⁰Migpan-aha-aha si Jesus to mgo otow no nakalibong. Dajun din ikagihi sikan pawing, “Kotonga sikan boyad nu.” Pagtuman din to sugu ni Jesus, dajun sikandin naulian.

¹¹Nangkaboyu yagboy sikan namanguntra ki Jesus aw sasabut dow og-amonuhon dan sikandin.

¹²Songo aedow miggamat si Jesus to bubungan su og-ampu, aw nabukasan sikandin duon.

¹³Pagkabukas on, pighimun din to mgo inanad din aw pili to sampuyu-tag-duwa no og-ilingon din to apustulis.

¹⁴Seini to mgo ngadan dan: si Simon no pighingadanan isab ni Jesus ki Pedro dow to suun din no si Andres, si Santiago dow si Juan, si Felipe dow si Bartolome,

¹⁵si Mateo dow si Tomas, si Santiago no anak ni Alfeo dow si Simon no maunungon hilabi to tribu dan.

¹⁶Pigpili din isab si Judas no anak ni Santiago dow si Judas Iscariote no iyan ogyuib kandin.

¹⁷Anoy man no nakatogbang on sikandan, migtindog si Jesus duon to patag. Nahimun duon kandin to mahan-in no mgo sakup din. Mahan-in isab to mgo otow no migduguk no diya kapuun to prubinsya to Judea dow to siyudad to Jerusalem. To duma diya isab kapuun to mgo siyudad to Tiro dow Sidon no nakapahigad to dagat, hasta diya to nakalibong no mgo banwa.

¹⁸Mig-anduon sikandan agun makapaminog to igpang-anad ni Jesus, agun isab mudojow to mgo sakit dan. Aw inggad to mangkadoot no ispiritu no migsamuk to mgo otow pigpang-abug din.

¹⁹Naningkamot sikan mgo otow no makatudi kandin, su meyduon gahom no ogyogwa likat to yawa din no ogpakauli to masakiton.

²⁰Dajun anada ni Jesus to mgo inanad din. Kagi din, “Igkadojow now no mgo pubri, su ogkasakup kow duon to sikan ogharian to Diyus.

²¹Igkadojow now no pigbontas kuntoon su diya to kayugajan oghantajon kow da. Igkadojow now no ogtiyahu kuntoon, su diya to kayugajan ogpakangisi kow da.

²²Igkadojow now ko kuntrahon kow aw likajan hasta tamajon aw ilingon to madoot tongod kanay no Anak to Otow.

²³Su sikan isab to pighinang to mgo kaaw-apuan dan to diya mgo otow no kibali ba-ba to Diyus. Na, ko mahitabu on sikan, linaksu kow tongod to kalipay su maaslag to igbayos iyu diya to yangit.

²⁴“Di sikiyu no mgo sapian, hayahay kow iyan kuntoon, di alaot kow su diya to kayugajan, wadad ogkaiman now no kadojawan.

²⁵Sikiyu no nahantoy kuntoon, alaot kow su diya to kayugajan, kanunoy kow on ogbontason. Sikiyu no ogngisi kuntoon, alaot kow su diya to kayugajan kanunoy kow ogmey-og dow ogtiniyahu.

²⁶Alaot kow ko sajaan kow to kaotawan, su pigsaja isab to kaaw-apuan dan to mgo otow to diya una no kunungkun kibali mgo ba-ba to Diyus.

²⁷“Di seini da. Higugmaa to mgo kuntra now. Dedeyjawa to ogdomot iyu.

²⁸Pangamuju kow to Diyus no kae-atan din to mgo otow no ogpanungajow dow ogyupig iyu.

²⁹Ko meyduon ogsampalu ikow, ipasampalu isab to dibayuy no pisngi nu. Ko meyduon og-agow to kabo nu, ajaw ogpogongi to pagpudut to mahalon no ilisan nu.

³⁰To ogpamuju, bogaji. To puli ogpudut to katigajunan nu, kona nud on oghawion.

³¹Hinanga diya to duma to ogkaliyagan now no iyan oghinangon duon iyu.

³²“Ko iyan da higugmaon now to otow no oghigugma iyu, nokoy pad man to ogkaiman now to Diyus? Su ngani man to mgo makasasaya, di oghigugma to diya oghigugma kandan.