Luuka 6:2-32

²Kaa yoga e Farisa'en mbii ɓe: —Ko saabii so oɗon ngolla ko dagaaki gollude ɲalaande fowteteende?

³Iisaa jaabii ɓe, wii: —Tama on njanngaali ko Daawuuda waɗi nde yolbi, kaɲum e yimɓe mum?

⁴O naati e ley hukkum ceniiɗo oo, o ɲaami buuru cakkaaɗo oo, o hokki hen yimɓe makko. Tawee nee, yottinooɓe sadaka tan nduŋanaa ɲaamde oon buuru.

⁵O wii ɓe kasen: —Ɓii Neɗɗo jey ɲalaande fowteteende.

⁶Ɲalaande fowteteende wonnde, o naati suudu waajordu omo waajoo. Gorko mo junngo mum ɲaamo waati ana tawaa ton.

⁷Dunkee'en Sariya e Farisa'en ana ngattani Iisaa hakkille. Ana ƴeewa yalla o anniyiiɗo sellinde gorko oo e ley ɲalaande fowteteende ndee, faa keɓa wullanaade mo.

⁸Kaa nde wonnoo omo anndi miilooji maɓɓe, o wii mo junngo mum waati oo: —Imma, dara hakkunde yimɓe! Gorko oo immii, darii.

⁹Caggal ɗum, Iisaa wii ɓe: —Miɗo lamndoo on: e ley ɲalaande fowteteende ana dagoo gollude ko moƴƴi naa gollude ko boni? Danndude neɗɗo naa halkude ɗum?

¹⁰E oon wakkati, o ƴeewi ɓe fuu, o wii mo junngo mum waati oo: —Fooccu junngo maa! Oon foocci ngo tan, ngo selli faa warti hono no wonngo ngoo nii.

¹¹Ɗum metti ɓe sanne, hedde eɓe piya dabare no ɓe kaani waɗude Iisaa.

¹²E ley ɗeen ɲalaaɗe, Iisaa yalti, yehi dow waamnde haayre faa waɗa duwaawu. O waali waɗude duwaawu.

¹³Nde weetunoo ndee, o noddi taalibaaɓe makko ɓee, o suɓii hen sappo e ɗiɗon, o inndiri ɗum'en nelaaɓe.

¹⁴Kamɓe ngoni: Simon mo o innditiri Piyeer e Andire miɲum e Yaakuuba e Yuhanna e Filipa e Bartolome

¹⁵e Matta e Tomaa e Yaakuuba ɓii Alfaa e Simon noddirteeɗo Kiranoowo suudu baaba

¹⁶e Yahuuda ɓii Yaakuuba e Yahuuda Isikariyota jammbotooɗo mo oo.

¹⁷O jippodii e maɓɓe, o darii e nokku jaajuɗo, kanko e heewɓe e taalibaaɓe makko. Jamaa keewɗo iwri e ley leydi Yahuudiya fuu e Urusaliima e gure tiimuɗe maayo geeci gila Tirus faa Sidon.

¹⁸Ɓe ngari hettindanaade mo e sellineede e ɲawuuji maɓɓe. Ɓe ladde torrunoo cellinaama.

¹⁹Yimɓe ɓee fuu ana njiɗi memde mo, sabi baawɗe ana njalta e makko cellina ɗum'en fuu.

²⁰E oon wakkati fuu, o hunci gite makko o ƴeewi taalibaaɓe makko ɓee, o wii: —Onon misikiina'en, on mbelii hoore, sabi onon njey Laamu Laamɗo oo.

²¹Onon yolbuɓe jooni, on mbelii hoore, sabi on kaaran. Onon woyooɓe jooni, on mbelii hoore, sabi on njalan.

²²On mbelii hoore so yimɓe mbaɲii on, ndibbii on, njennii on, mbonnii inɗe mon saabe Ɓii Neɗɗo.

²³Ɲannde mum, ceyee, ilino-ɗon, sabi mbarjaari mawndi ana doomi on dow kammu. Hono non ɓe ngaɗunoo annabaaɓe aranndeeɓe ɓee.

²⁴Kaa bone woodanii on, onon arsukunte'en, sabi on keɓii neema mon.

²⁵Bone woodanii on, onon haarɓe jooni, sabi on njolban. Bone woodanii on, onon jalooɓe jooni, sabi on cuŋlan, on mboyan.

²⁶Bone woodanii on, so yimɓe fuu manii on, sabi hono non ɓe ngaɗunoo annabaaɓe peneeɓe ɓee duu.

²⁷—Kaa onon hettindantooɓe kam ɓee, miɗo wiya on: njiɗee konnee'en mon, tikkanɓe on ngaɗanon ɗum'en moƴƴere.

²⁸Nduwanee huɗooɓe on, torrooɓe on duu, ɲaagano-ɗon ɗum'en Laamɗo.

²⁹So won piiɗo ma banaawo, accu ɗum fiye bannge goɗɗo oo duu. So won teetuɗo ma dolloke maa, pati haɗu ɗum forgo oo duu.

³⁰Neɗɗo fuu ɲaagiiɗo ma, ndokkaa ɗum. Teetuɗo ma jawdi maa, njoppiraa ɗum.

³¹Ngaɗiranee yimɓe no njiɗ-ɗon ɓe ngaɗirana on nii.

³²So yiɗuɓe on tan njiɗaton, ɓural hongal keɓaton? Fay luuttooɓe ana njiɗi yiɗuɓe ɗum'en.