Luki 6:2-32 - Dónbeenì páaníi fĩnle vũahṹ

Luki 6:2-32

Click on verse(s) to share them!

²Á ɓa *Farizĩɛwa ɓúi mɔn mu á ɓa wee bío làa ba: «Lée webio nɔn mí wee wéráa bìo kà? Wa làndá hò mu.»

³Ó o Yeesu bía nɔn ɓa yi: «Bìo ó o *Daviide yánkaa wó ká arɛ́n lè mí nùpua á le hĩni dà á mi dĩǹ yí kàránna yí mɔn le?

⁴Orɛ́n míten zon le Dónbeenì zĩi á zoó lá le Dónbeenì hãmu búurú á là, ò o ɓuan ho ɓúi lée nɔn bìa làa wó bò mín yi. Ká a ɲɔǹ lá yí ko ò o wé mu, lé bìo le *Dónbeenì yankarowà mí dòn lé bán wee wé là ho.»

⁵Ò o tĩ́n pá bĩnía bía nɔn ɓa yi: «O *Nùpue Za lé yìa á ho Sabaa bìo wi níi yi.»

⁶Ho Sabaa mu ɓúi zoǹ ó o Yeesu van ho kàránló zĩi yi á vaá zoó wee kàrán ɓa nùpua. Mu zoǹ à nìi ɓúi wi bĩ́n á nín-tĩánì bàhó húrun.

⁷Á ho *làndá bìo zéenílowa lè ɓa Farizĩɛwa bò mí yìo o Yeesu wán le mí ì loń ká a pá à wɛɛ́ nùpue ho Sabaa zoǹ, lé bṹn ɓa à dĩ̀n wán á à yíráa wo ò kooní yi.

⁸Ó o Yeesu zũna ɓa yilera ò o pá bía nɔn o nìi na bàhó húrun yi: «Lii hĩ́ní vá ɓueé lée dĩ̀n hen kà ɓa nùpua yahó le ɓa mi fo.» Ó o nìi lií hĩ́nɔn á vá ɓueé lée dĩ̀n.

⁹Ó o Yeesu bía làa ba: «Le ĩ tùa mia làa bìo ɓúi: Lé mu yɛ́n ó o nùpue ko ò o wé ho Sabaa zoǹ? Lée bè-tente lée, tàá lée bè-kohó? Lé ho kã̀ní a nùpue lée, tàá lé ho ɓúe o?»

¹⁰Ò o Yeesu lora ɓa ɓúenɓúen yi khíi fò ò o bía nɔn o nìi yi: «Hóoní ũ bàhó.» Ó o nìi hóonía ho á ho dɛ̀ɛnía wan.

¹¹Á ho làndá bìo zéenílowa lè ɓa Farizĩɛwa sĩa cã̀ mu yi làa sòobɛ́ɛ, á ɓa wee wã̀aní mín yi: «Lée webio á wa yàá à wé á à yíráa wo ò fì níi yi coon?»

¹²Wizonle ɓúi ó o Yeesu hĩ́nɔn le mí yòó wé mí fìoró le ɓúee wán, ó o yòó fìora le Dónbeenì yi bĩ́n fúuu cãana.

¹³Bìo ho tá tɔ̃n, ó o von mí nì-kenínia kúaa mín wán, á hueekaa ɓa pírú ɲun ɓa tĩ́ahṹ á có yèni làa tonkarowà. Hĩ̀a kà lé ɓa yènnáa:

¹⁴O Simɔn na ó o có yèni làa Piɛre, o Ãndere na lé o Simɔn mu ɓàn za, o Zaaki là a Zãn, o Filiipu là a Baatelemii,

¹⁵o Matiye là a Toma, o Alifee za Zaaki, o Simɔn na lé ɓa Zelootewa kuure nùpua nì-kéní,

¹⁶o Zaaki za Zudaa, là a Zudaa Isikariote na khíi dé o Yeesu o zúkúsa níi yi.

¹⁷Bṹn mɔ́n, ó o Yeesu bĩnía bò lè mí nì-kenínia lion ho tá pɛ̀ɛrú yi hen na ó o mɔ́n-bèwa cɛ̀rɛ̀ɛ dĩ̀n yi. Ɓa minka zã̀amáa mún wi bĩ́n. Ɓa ló ɓa *zúifùwa kɔ̃hṹ kùaráa ɓúenɓúen yi, ho Zeruzalɛɛmu lóhó, lè ho Tiire lè ho Sidɔ̃n lórá na wi mu yámú ɲumu ɲii ló-zàwa yi.

¹⁸Ɓa ɓúenɓúen wà ɓuee ɲí a Yeesu cɔ̃́n á mún ǹ cànka ò o wɛɛ́ ɓa vɛ̃́ɛna. Bìa ɓa cĩ́náwa wee beé lò wee yí míten.

¹⁹Ɓa nùpua ɓúenɓúen wee cànka à ɓa yí o túii yi, lé bìo le Dónbeenì pànká na wi o yi á wee lé lée wɛɛ́ ɓa nùpua ɓúenɓúen.

²⁰Ó o Yeesu wã́a yòó lora mí nì-kenínia yi ò o bía: «Minɛ́n na lé ɓa nì-khenia, mi ɲúná sĩ, lé bìo le Dónbeenì bɛ́ɛnì á mi níní wi yi!

²¹Minɛ́n na le hĩni wee ɓúe ho zuia, mi ɲúná sĩ, lé bìo á bìo mi wee ca á mi ì yí á mu ɲii ì sí! Minɛ́n na wee wá ho zuia, mi ɲúná sĩ lé bìo mi khíi dĩ hã konsĩní!

²²«Ká ɓa nùpua khíi ɲina mia, á pã́ mia, á wee là mia, á wee yáa mi yèni o *Nùpue Za bìo yi, se mi ɲúná sĩ.

²³Mi zã̀maka à wé coronka lé bìo le Dónbeenì bũ̀iá beenì pan mia ho wáayi mu bìo yi. Mu bon, lé kà síi á ɓarɛ́n ɓàn ɓùaawa mún yánkaa beéraráa le *Dónbeenì ɲi-cúa fɛɛrowà lò.

²⁴Ɛ̀ɛ ká minɛ́n nàfòró ɓànsowà á ho yéréké khíi sá yi, lé bìo á mu bìo ɓúenɓúen mí yú vó, á bìo máa bĩní máa bè mu wán máa na mia.

²⁵Minɛ́n na wee dí bùubaa ho zuia á ho yéréké khíi sá yi, lé bìo á bìo cɛ̀rɛ̀ɛ hĩni khíi tè mia. Minɛ́n na wee dĩ hã konsĩní ho zuia á ho yéréké khíi sá yi, lé bìo mí bìo khíi wé ho yahó sèró lè le wɛ́ɛ.

²⁶Minɛ́n na ɓa nùpua wee wíoka yèni á ho yéréké khíi sá yi, lé bìo á lé kà síi á ɓàn ɓùaawa mún yánkaa wó làa bìa fù le mí lé le Dónbeenì ɲi-cúa fɛɛrowà ká mu ɲɔǹ yí bon.

²⁷«Àwa, minɛ́n na wã́a dĩ̀n wee ɲí ĩ cɔ̃́n ɓúenɓúen lé minɛ́n á ĩ wee bío bìo kà a na yi: Mi wań mi zúkúsa. Bìa ɲina mia à mi wé mu bè-tentewà na yi.

²⁸Bìa wee dánkání mia à mi wé dúɓua yi. Bìa wee yáa mi yèni à mi wé fìo na yi.

²⁹Hàrí ká a ɓúi dó ũ sáahó yi, à ũ yèrèmá hìa so dá a yi. Ká a ɓúi fó ũ kánɓun, à ũ mún día le o fé ũ báká.

³⁰Yìa fìora bìo ũ cɔ̃́n, ũ na mu wo yi. Yìa lá ũ bìo, à ũ día le o ɓua.

³¹Bìo mi wi à ɓa nì-vio wé na mia, à mi wé mu ɓàn síi à na ɓa yi.

³²Ká bìa wa mia lé bán mí dòn á mi wa, á mi wee leéka le mi so pá à bĩní ì yí bìo mu mɔ́n le? Hàrí ɓa bè-kora wérowà mún wa bìa wa ɓa.