ᤗᤢᤁᤠ 6:2-32

²ᤜᤧᤰᤁᤣ᤺ᤸᤗᤧ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤱᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤶᤒᤠᤒᤣ᥅”

³ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤛᤠᤶᤕᤥᤛᤠᤵᤗᤠ᤺ᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡᤒᤡ᥅ ᤌᤡᤰᤗᤧᤱ ᤍᤠᤀᤢᤍ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ

⁴ᤂᤢᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤆᤀᤠᤱ ᤁᤢᤔᤏᤠᤜᤠ᤹ᤀᤠᤱ ᤐᤡᤖᤢᤛᤡ॥ ᤂᤧᤱᤃ ᤀᤠᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧᤖᤥ॥”

⁵ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”

⁶ᤘᤣ᤹ᤛ᤻ᤔᤠ ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤖᤢᤛᤡᤖ ᤕᤠᤃᤧ॥ ᤂᤧᤵᤔᤥ ᤆᤢᤵᤛᤠᤱ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥

⁷ᤀᤠᤸᤗ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤏᤠ᤺ᤶᤛᤡᤱ ᤕᤧᤴᤏᤥ ᤘᤣ᤺ᤴᤍᤢᤸᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥ ᤔᤧᤛᤢᤃᤢᤀᤠᤱ ᤔᤧᤘᤕᤧᤖᤥ॥

⁸ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠ᤺ᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥” ᤂᤧᤴᤏᤠᤱ ᤑᤧᤖᤧᤀᤠᤱ ᤂᤧᤵᤔᤥ ᤕᤧᤒᤧ॥

⁹ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤐᤠ᤺ᤴᤎᤡᤰ ᤛᤣ᤺ᤴᤍᤥ᤺ᤏᤡᤱᤗᤥ–ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤳᤋᤡᤴ ᤆᤥ᤺ᤰᤔᤠ ᤀᤠᤒᤡ᤹ᤒᤣ᥅ ᤜᤡᤱᤔᤴ ᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅”

¹⁰ᤂᤢᤏᤧ᤹ ᤂᤡᤖᤡ ᤀᤥᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠ᤺ᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥

¹¹ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤁᤴ ᤕᤧᤛᤢ᤺ᤴ ᤌᤣ ᤔᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴ ᤌᤰᤔᤠ ᤔᤧᤜᤣ᤺ᤰᤋᤧᤖᤥ॥

¹²ᤌᤡᤰ ᤕᤧᤴ ᤕᤧᤛᤢ᤺ᤴ ᤁᤥ᤺ᤰᤔᤠᤀᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤏᤠᤶᤍᤠ᤺ᤳᤋᤠ᤺ᤳ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥᤃᤧᤖᤥ॥

¹³ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤧᤛᤢᤖᤧ ᤁᤠᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤥᤗᤠᤶ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡ॥ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤛᤡ ᤔᤧᤳᤋᤢᤛᤡᤖᤥ॥

¹⁴ᤂᤧᤱᤜᤠ᤹ᤀᤥ ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ). ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛ. ᤕᤠᤁᤢᤒ. ᤕᤢᤜᤢᤴᤏᤠ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ.

¹⁵ᤔᤳᤋᤡ. ᤌᤥᤔᤠ ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤛᤡᤔᤥᤏ (ᤂᤢᤏᤧ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤈᤡᤗᤋᤡ ᤔᤧᤵᤔᤏᤠᤒᤠ ᤘᤕᤧ).

¹⁶ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤘᤕᤧ. ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ ᤘᤕᤧ. ᤂᤧᤴ ᤋᤠ᤺ᤴᤍᤡ ᤏᤛᤠ᤺ᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ॥

¹⁷ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤕᤥ ᤌᤩᤧᤀᤠᤱ ᤏᤧᤏᤧᤒᤠ ᤋᤧᤴᤏᤥ ᤕᤧᤶᤛᤡᤱᤗᤥ॥ ᤂᤧᤵᤔᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤜᤢᤍᤡᤕᤠ ᤌᤢᤶ. ᤕᤖᤢᤛᤗᤧᤔ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤕᤧ॥

¹⁸ᤂᤧᤱᤜᤠ᤹ ᤂᤢᤏᤧ᤹ ᤁᤢᤄᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤣ᤺ᤳᤋᤧᤖᤥ॥

¹⁹ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤢ᤺ᤔᤠ ᤔᤧᤃᤥ᤺ᤳᤋᤢ ᤌᤣᤀᤠᤱᤓᤧᤸᤗᤧ ᤁᤧᤘᤣ᤺ᤶᤒᤠ ᤔᤢᤰᤛᤠᤶ ᤂᤢᤏᤧ᤹ᤀᤥᤗᤠᤶ ᤗ᤺ᤴᤍᤧᤖ ᤐᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡᤖᤥ॥

²⁰ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤕᤠᤱᤁᤧᤛᤠ᤹ᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ᤀᤡᤴᤏᤧᤖᤥ॥

²¹ᤀᤠᤸᤗ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤄᤠᤛᤡᤀᤠᤱ ᤂᤡᤏᤡ᤹ ᤏᤡᤱᤛᤶᤗᤥ॥ ᤀᤠᤸᤗᤥ ᤔᤣᤖᤡᤱ ᤌᤰᤏᤢ ᤁᤧᤜᤠ᤺ᤵᤐᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤀᤣᤖᤡ᤹ᤖᤥ॥

²²ᤔᤧᤴᤇᤠᤶᤛᤠ᤺ᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤒᤠ. ᤁᤧᤶᤏᤠ᤹ᤖᤡᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤔᤧᤎᤠᤛᤢᤀᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ॥

²³ᤂᤧᤴ ᤕᤧᤶᤔᤥ ᤛ᤺ᤳᤋᤧᤶᤔᤧ᤹ᤀᤥ. ᤀᤥᤔᤢ ᤗ᤹ᤖᤧᤶᤔᤧ᤹ᤀᤠᤱ ᤗᤠ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤢᤶᤄᤥ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤕᤧᤖᤥ॥

²⁴ᤁᤖ ᤀᤠᤸᤗᤥ ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛ᤺ᤵᤔᤠᤴ ᤏᤢ ᤏᤡᤱᤘᤠ᤹ ᤋᤠ᤺ᤔᤠᤴ ᤂᤡᤏᤡ᤹ ᤜᤡᤱᤔᤴᤏᤥᤀᤣ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

²⁵ᤀᤠᤸᤗᤥ ᤁᤧᤄᤠᤒᤠᤀᤠᤱ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤰᤔᤧᤴᤈᤠ ᤁᤧᤒᤥ᤺ᤰᤂᤡ᤹ᤖᤥ॥ ᤀᤠᤸᤗᤥ ᤁᤧᤀᤣ᤺ᤵᤐᤠᤖ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤣᤖᤡᤱ ᤌᤰᤏᤢ ᤁᤧᤜᤠᤒᤡ᤹ᤖᤥ॥

²⁶ᤀᤠᤸᤗᤥ ᤔᤏᤠᤜᤠ᤹ᤖᤧ ᤏᤢ᤺ᤖᤡᤰ ᤔᤧᤔᤧᤳᤋᤢᤛᤡᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥”

²⁷“ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴ ᤁᤧᤄᤧᤶᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

²⁸ᤂᤡᤏᤡ᤹ ᤛᤠᤱᤃᤪᤠ ᤁᤧᤔᤧᤵᤐᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥

²⁹ᤜᤠ᤺ᤳᤗᤧ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤏᤧ᤹ ᤘᤣ᤹ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴᤏᤠᤱ ᤂᤧᤴ ᤋᤥ᤺ᤴᤍᤧ ᤐᤡᤖᤧ᤹॥ ᤜᤠ᤺ᤳᤗᤧ ᤛᤠᤰᤁᤧᤸᤗᤧᤰ ᤁᤧᤛᤢᤱᤄᤣ᤺ᤰᤘᤠ᤺ᤴ ᤁᤧᤏᤠᤵᤐᤠᤱ ᤋᤣ᤹ᤖᤢ᤹. ᤂᤧᤴᤏᤡᤴ ᤁᤧᤈᤠᤱᤔᤠ ᤋᤣ᤺ᤳᤋᤡᤴᤏᤠᤱ ᤐᤡᤖᤧᤍᤣ᤺ᤛᤧ᤹ᤀᤥ॥

³⁰ᤜᤧᤰᤁᤩᤠᤱ ᤁᤧᤏᤠ᤺ᤰᤐᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤈᤡᤃ᤺ᤰᤘᤠᤜᤠ᤹ ᤁᤧᤍᤣ᤹ᤒᤠᤜᤠ᤹ ᤕᤠᤶᤔᤥ ᤕᤠᤱᤏᤠ ᤔᤧᤏᤠ᤺ᤰᤋᤧᤛᤧᤴᤏᤧ᤹ᤀᤥ॥

³¹ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤀᤠᤰᤂᤣ ᤁᤧᤶᤔᤧᤳᤋᤡᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤂᤡᤏᤡ᤹ᤀᤠᤱ ᤒᤠ ᤜᤧᤰᤁᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

³²ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ᤖᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥅ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥