Luk 6:2-32

²Dingla na Parisaio la deken e Iesu mange, “Sur asa ning mulo tol a utna ning pa bel mulo mur a warkurai tagun a Pukakiar Sabat?”

³Pa e Iesu i keles la mange, “I mangasa, belot mulo was asaning e King Dewit i toli ning i taum ana taraila ning la armuri la murak?

⁴I kas uting na rumai ane God, i kibas pas a bret ning di tabar tar e God ono, i ieni, pa i tabar la otleng ning la armuri. A bret ning di sairasi kusun a tarai oros. I arlar ana Warkuraila sur a tena artabarla ka tetek e God lar ieni.”

⁵Pa e Iesu i atai la mange, “A Nat a Barsan ot a Leklek tagun a Pukakiar Sabat.”

⁶Ana ning a Pukakiar Sabat ulak, e Iesu i kas uting na rumai lotu, pa i asaer a taraila. Pa ning a barsan kaningia, a sot a kuna i del.

⁷A Parisaiola pa a tena asaerla ana Warkuraila la tai sur ta ngas ning lar arup e Iesu ono, pa la ngoson murmuri mang ir alangolango a tinsaman ana Pukakiar Sabat, o bel.

⁸Ika e Iesu i tasman a nuknukinla pa i atai a barsan ning a kuna i del mang, “Kamtur! Pa ur tur ting lanigo tanla rop.” I kamtur, pa i tur sa lanigo tanla.

⁹Lamur e Iesu i atai la mange, “Ar deken mulo: Asa ning a Warkuraila i atongi sur dir toli ana Pukakiar Sabat? Dir tol a wakakna o dir tol a laulauna, dir alaun tik o dir alaulau tik?”

¹⁰Pa i tai taltal tetek la rop, pa i atai a barsan mang, “Ur kodos a kum.” Pa i kodosi, pa a kuna i tostos ulak.

¹¹Pa a balanla i bukus ana balakut, pa la warwara artalai tanla sur ta utna lar toli o e Iesu.

¹²Ning a pukakiar, e Iesu i han usaot na mangir sur ir nunung. A kidol a morom ning, i nunung tetek e God.

¹³Ning i kabakiar, i kabah pas anuna tarai a asasaer teteki, pa i aslang pas ning a bonot pa pisir naur tagun la, pa i atong la a aposella.

¹⁴Ne a risanla: E Saimon ning e Iesu i saran tar ning a risana otleng e Pita, ditas ma e Endru, Jems, Jon, Pilip, Batolomiu,

¹⁵Matiu, Tomas, e Jems a nat e Alpius, e Saimon ning tagun a kunum Silot,

¹⁶e Judas a nat e Jems, pa e maurana otleng e Judas Iskariot esaning i asobor tar e Iesu.

¹⁷E Iesu pa anuna tarai a asasaer la han purum misaot na mangir, pa i tur ting na puka tostosna, taum ana nuna kunum a tarai a asasaer. A galis a tarai misaot na papar Judia pa e Jerusalem pa tagun a hananuala tumo latasi milau e Tair pa e Saidon otleng,

¹⁸la hanot sur lar longori, pa ir alangolango pas la kusun anunla na tinsamanla. Pa i kepsen a motla kusun la rop ning a motla la alaulau la.

¹⁹Pa a taraila rop, la mang sur lar tuk a palaona e Iesu, anasa a rakrakai i purum taguni, pa i alangolango la rop.

²⁰E Iesu i ngoson anuna tarai a asasaer pa i atongi mang, “Mulo ning mulo kapan, mulo angis, anasa a matanitu ane God anumuloi.

²¹Mulo ning mulo murak onone, mulo angis, anasa lamur mulor masur. Mulo ning mulo domos onone, mulo angis, anasa lamur mulor lagar.

²²Mulo angis ning a tarai la nget mulo, pa ning la kepsen mulo pa la atong laulau mulo, pa ning la atong laulau a risamulo, anasa mulo na halal a Nat a Barsan.

²³“Ana pukakiar ning dir tol a ututnala ning tetek mulo, mulor gas, mulor sirok ana gasgas, anasa anumulo arlou saot na langit i itna kol. Pa a toltolla ning, anunla mangis a tarai tagun nating la ka tol tari tetek a propetla.

²⁴Ika ir laulau tetek mulo ning anumulo na ututnala i galis, anasa mulo ka kibas pas anumulo a wakakna.

²⁵Ir laulau tetek mulo ning mulo masur onone, anasa lamur mulor murak. Ir laulau tetek mulo ning mulo langlagar onone, anasa lamur mulor bal maris pa mulor domos.

²⁶Ir laulau tetek mulo ning a taraila rop la atong leklek pas mulo, anasa a toltol ning, anunla mangis a tarai tagun nating la ka tol tari tetek a propet asasongola.

²⁷“A atai mulo ning mulo longor iau, mulor mang sur anumulo na hirua, pa mulor tol a wakakna tetek la ning la nget mulo.

²⁸Mulor angisgis la ning la nunung sur e God ir alaulau mulo, pa mulor nunung sur la ning la alaulau mulo.

²⁹Ning tik ir pasar a ris a paham, ur saran otleng ning a ris tana. Ning tik ir ras pas anuma kaen na polpol alar anuma mermer, ur noren tar otleng anuma siot tana.

³⁰Ur tabar la rop ning la nunung u. Pa ning tik ir kibas pas ta utna anumi, gong u nunung ulak suri.

³¹Mulor tol al ngas a utna tetek a tarai ning mulo mang sur lar toli tetek mulo.

³²“Ning mulo mang sur la ka ning la mang sur mulo, dir aleklek mangmangasa pas mulo? Anasa a tena laulaula otleng la mang sur la ning la mang sur la.