SAN LUCAS 6:2-32

²Ex lati yu fariseos va talhisakmil: —¿Valiꞌiycha makꞌayatꞌik lhitapatsa chavay mas jantu xtaqkan lakatin kꞌatꞌapꞌatsꞌatꞌi ni xajulchan jastaknati?

³Ex ni Jesús va jaqaltayanal: —¿Jantu kꞌapꞌutꞌeꞌetꞌik tacha tamakal ni David kun ixtꞌaltanan tejkan tachavanil?

⁴Tejkan tanul la ixchaqa ni Dios, chꞌapal ni pan yu ixmoqslanikan Dios, va ul, ex jalaqxtaqnil ixtꞌaltanan. Chuncha makal mas vamun ni kuras ixtalhitꞌajun lakatin para kataꞌul ni anchanu pan.

⁵Ex vachuꞌ naul ni Jesús: —Ni kitꞌin yu Sasꞌatꞌa Lapanaki klhinajun tisuncha lay makakan ni xajulchan jastaknati.

⁶Ex ataun xajulchan jastaknati val. Ni Jesús tanul laqa chaqaꞌ taꞌan ixtataqxtoꞌa ni israelitas, ancha masul ixchivinti Dios. Ancha ixꞌalinta qayntaun lapanaki yu jantu lay ixmapuꞌay ixlhijakanaj makaꞌ.

⁷Yu ixtamasuy ixlhachimoꞌonkꞌan ni israelitas ali yu fariseos ixtalaqtsꞌintanuy ni Jesús. Incha kakꞌuchꞌul mas va xajulchan jastaknati ex lay kataputislajmal.

⁸Pero ni Jesús ixkꞌatsaycha yu ixtatꞌajun pastaknan. Ex junil ni lapanaki yu jantu lay ixmapuꞌay ixmakaꞌ: —Kaꞌostꞌaycha, kꞌatꞌanꞌajtꞌaycha aniy. Ex ni lapanaki ostayalcha, va ancha tayal.

⁹Ex ni Jesús lakjunil yu alati: —Kaklalhisakmiyau taun tuꞌuchun. ¿Ni xajulchan jastaknati tas lhinajun kilhachimoꞌonkꞌan? ¿Lhinajun kꞌamakꞌatꞌi yu ox u va lhinajun kꞌamakꞌatꞌi yu talaqalhin? ¿Lhinajun kꞌamalaqtꞌaxtꞌutꞌi u va lhinajun kꞌamaqnitꞌi? ¿Tas lhinajun?

¹⁰Ex ni Jesús jalaqtsꞌil tachun yu ixtamalaqachoqoxnuta ex junil ni lapanaki: —Kꞌaxnujtꞌi mimakaꞌ. Ex ni lapanaki xnujlhi ixmakaꞌ, oxicha junchoqol.

¹¹Pero ni fariseos kun yu ixtamasuy ixlhachimoꞌonkꞌan ni israelitas ayaj talukujlal. Aqtaylcha talaxaqalay, va talalhisakmiy tisuncha lay katamakanil ni Jesús.

¹²Tejkan chuncha ixtiꞌukxuntayay, ni Jesús al skꞌiniꞌ Dios laqataun aspajun. Ancha taun tatsꞌis tꞌachivinil Dios.

¹³Tejkan tunkunchoqol lakjuntaꞌil ixtꞌaltanan, jalaksaklhi pumakautꞌuy, va jalakꞌulal ixtamalaqachan.

¹⁴Laksaklhi Simón, yu Jesús junil Pedro. Vachuꞌ Andrés yu ixtꞌalaqajun ni Simón. Vachuꞌ Jacobo ali Juan ali Felipe ali Bartolomé

¹⁵ali Mateo ali Tomás ali Jacobo istsꞌal ni Alfeo ali Simón yu ixjunkan Zelote.

¹⁶Vachu Judas ixtꞌalaqajun ni Jacobo y vachuꞌ aputaun yu ixjunkan Judas Iscariote yu astan maqxtaqlhi ni Jesús.

¹⁷Ni Jesús laktꞌatajuminchal ixtꞌaltanan ni laka aspajun. Tachinchal taꞌan akpujunan, ancha tatayal. Vachuꞌ ixtaꞌalinta pumalhuu ixtꞌaltanan kun pumalhuu yu machaqan xaꞌestado Judea, yu machaqan Jerusalén, vachuꞌ yu machaqan laka putaulan Tiro ali Sidón. Tachinchal para kataqalasmaklhi ni Jesús y vachuꞌ para kalajkꞌuchꞌukal ixtaqanꞌatkꞌan.

¹⁸Vachu ni Jesús palay jalakmakal ni lapanakni yu jamamaqanlqajnivay ni jantu ox espíritus.

¹⁹Tachun ni lapanakni ixtachꞌapaputun ni Jesús, ixtapꞌasta taxtuniy para kalajkꞌuchꞌul ni taqanꞌanin tejkan lakpiklay.

²⁰Ex ni Jesús jalaqtsꞌil ixtꞌaltanan, va lakjunil: —Lajꞌox kaxajtachal mijatsukuntikꞌan ni uxiknankꞌan kilpatanin, tapaxtoqniyan kꞌatꞌanutꞌikcha taꞌan lhachimoꞌonun ni Dios.

²¹’Lajꞌox kaxajtachal mijatsukuntikꞌan yu chavay chꞌavanitꞌikcha, astan kꞌaꞌotsꞌayapitik. ’Lajꞌox kaxajtachal mijatsukuntikꞌan yu chavay alhunatꞌik, astan kꞌalajꞌachꞌanapitik.

²²’Lajꞌox kaxajtachal mijatsukuntikꞌan tejkan taxkayyan ni lapanakni, tejkan jantucha tatꞌaltananputunan, tejkan talaktuꞌuyan, vachuꞌ tejkan tamanuniyan jalaklkanti por kilapanakni untꞌatꞌik ni kitꞌin yu kval Sasꞌatꞌa Lapanaki.

²³Ayaj kalhiꞌachꞌantꞌaꞌutꞌik kun lhuu achati ni anchanu julchan tejkan chuncha katamakaniyan. Ay kunaꞌ milhilhajatkꞌan ni laktꞌiyan. La maqancha ixpayankꞌan vachuꞌ jantu ixtalaqtsꞌinputun yu ixtalaqputeꞌey ixchivinti ni Dios.

²⁴’Pero payniꞌincha yu uxiknankꞌan maqalinin, vamun chavay lhitꞌaunatꞌik achati.

²⁵’Payniꞌincha ni uxiknankꞌan yu chavaycha tus ox otsꞌatꞌatꞌik, astan kꞌachꞌavanapitik. ’Payniꞌincha ni uxiknankꞌan yu chavaycha achꞌanatꞌik, astan kꞌamaꞌaninanapitik y kꞌalajꞌalhunapitik.

²⁶’Incha tachun ni lapanakni tanajun lajꞌoxi lapanakni untꞌatꞌik, ex payniꞌincha ni uxiknankꞌan. Maqancha ixpayankꞌan vachuꞌ talakjunil lajꞌoxi lapanakni yu jamakanunun, yu ixtanajun ixtalaqputeꞌey ixchivinti Dios.

²⁷’Pero uxiknan yu kilaqalasmatꞌau, klajunau kapꞌaxkꞌatꞌik mintꞌalaxkayninkꞌan. Kꞌamakꞌanitꞌik lajꞌoxi yu taxkayyan.

²⁸Kꞌalaklhitꞌapꞌaynitꞌik yu ox yu tanajun jantu ox kꞌatꞌapꞌasatꞌik. Kaskꞌinitꞌik Dios yu tamakaniyan laqtaqal.

²⁹Incha matichun palaqstisayan va kaxtꞌaqnin aminpalaqxtitaun. Incha matichun kamaxtunin minkutun, kamakꞌaunincha vachuꞌ kalhaꞌalcha mixkujuꞌ.

³⁰Incha matichun skꞌiniyan taun tuꞌuchun kaxtꞌaqnin. Incha tamaxtuniyan yu minavin, jantucha maqskꞌiniy kaskꞌinichꞌoꞌo.

³¹Kalakmakꞌanitꞌik yu alati vachu va tacha naunatꞌik katamakanin.

³²Incha pꞌaxkꞌayatꞌik vamun yu tapaxkayan, ¿ex tisuncha xtapal kaval? Yu talaktuꞌunun vachu va chuncha talapaxkay.